Xa podes consultar toda a programación de AchegArte!
Se queres inscribirte en algún dos obradoiros podes facelo nas Bibliotecas municipais durante esta semana ou na Secretaría de AchegArte no mesmo día do obradoiro.
Vémonos en AchegArte!

O vindeiro fin de semana o Palexco e o Kiosco Alfonso acollerán unha cita importante coa cultura galega, AchegARTE: A Cultura que facemos. A cultura que queremos impulsada pola Concellaría de Cultura que dirixe a nacionalista María Xosé Bravo.

A convocatoria partiu dun colectivo de persoas que reclamou da Consellería de Cultura a reedición do Culturgal, un acontecemento que reuniu a miles de persoas na cidade arredor das distintas manifestacións da nosa cultura.
A Concellaría de Cultura do Concello da Coruña fíxose eco desta iniciativa colectiva e desinteresada, achegando o seu apoio e sumando tamén o apoio da Área de Promoción Económica da Vicepresidencia da Deputación da Coruña para facermos realidade entre todos e todas esta proposta. “Unha iniciativa importante para dar visibilidade á nosa cultura, para difundila e sobre todo para demostrar que ten un peso decisivo na economía do país” tal e como destacou a Concelleira de Cultura “porque a cultura xera riqueza e emprego e porque o investimento en cultura é sempre rendíbel a longo prazo”. Nesta feira/festa da cultura ao longo da fin de semana haberá espazo para as artes escénicas, as artes visuais, a música, o libro, o audiovisual, a danza e os servizos socioculturais.

AchegARTE está pensado como un espazo de encontro, de intercambio de experiencias e difusión da cultura que facemos. Unha oportunidade para coñecermos unha mostra da ampla oferta cultural galega. Nesta cita coa cultura galega poderase gozar do noso teatro, a música, as artes plásticas, o audiovisual, a danza, a palabra cantada e falada.... mais tamén será o lugar onde mercar o libro que buscas, a música que che gusta, a película que non viches, os agasallos do Nadal; ou a ocasión para facer un obradoiro de ilustración, de danza, de música, de teatro, de pintura ou maxia, para grandes e pequenos. Unha programación para todos os públicos.

Programa completo de AchegArte (PDF, 1042 KB)

O 24 de novembro cúmprense 150 anos da publicación dun dos libros máis importantes da historia da humanidade, A orixe das especies, de Charles Darwin, e os Museos Científicos Coruñeses queren celebrar a data dun xeito singular.

Para iso programáronse dous actos na Domus, que comezarán ás 20 horas

- A estrea dunha peza de teatro realizada especificamente para este evento pola compañía teatral CasaHamlet. A peza, titulada Encontro no xardín, fai referencia a Alfred Wallace, o amigo de Darwin e investigador da evolución das especies.

- A conferencia Como a xenética nos conta a historia das poboacións humanas, a cargo de Dr. Antonio Salas Ellacuriaga, investigador do Instituto de Medicina Legal, Universidade de Santiago de Compostela.

A entrada é libre e gratuita.

Teatro del Andamio, en colaboración coa Clínica Dental Pablo Varela, presenta hoxe venres 20 de novembro ás 21.00 horas na sala do "Teatro del Andamio" nos Rosales a actuación do grupo musical Tiempo Cuatro. O custo das entradas é de 4 €, que estarán a dispor do público desde unha hora antes do concerto.

Tiempo Cuatro nace como seminario de traballo no ano 2008 para afondar no tango instrumental contemporáneo de Astor Piazzolla. A fusión de estilos é o trazo distintivo desta música, quedando de manifesto nas formas clásicas como os preludios, as fugas e as suites entre outras, que evolucionan as súas estruturas a través de contrastes rítmicos, improvisacións e construcións harmónicas complexas, contrastadas con románticas melodías e efectos sonoros característicos doutros estilos. Esta ecléctica mestura de elementos, aparentemente opostos, xera un equilibrio musical que se traduce na conxunción sonora que Astor Piazzolla xerou como Novo Tango.

Os compoñentes son Suso Iglesias (Acordeón), Javier Cedrón (Violín), Andrés Pazos (Piano) e Antonio Romero (Contrabaixo).

Esta fin de semana a entrada á Casa das Ciencias será de balde, unha medida adoptada para paliar o feito de que a fin de semana pasada non fose posíbel o acceso ao museo tralo peche do Parque de Santa Margarita pola alerta de temporal. Os visitantes terán oportunidade de participar nas experiencias interactivas das súas plantas de exposicións e asistir ás sesións de planetario:

12 h. La noche del vampiro (infantil, versión castelán)
13 h. Evolución (versión galego)
18 h. Evolución (versión castelán)

Ademáis, eses dous días, ás 17 horas celebraránse Cosmicontos, sesións especiais de teatro co planetario como fondo para nenos entre 4 e 10 anos. É unha actividade co patrocinio da Consellería de Economía e Industria. Dirección Xeral de Investigación, desenvolvemento e innovación, Xunta de Galicia. O horario de apertura da Casa das Ciencias é de 10 a 19 horas.

O filme The Curse of the werewolf de Terence Fisher, esta semana na Sala Fernando Rey do Fórum Metropolitano dentro do ciclo Terror e ciencia ficción. Horario: Xoves 19, 20:30. Venres 20, 20:30 e 23:00. Sábado 21, 17:30 e 20:30.

O filme Atarnajuat, a lenda do home veloz de Zacharias Kunuk, esta semana na Sala Marilyn Monroe do Fórum Metropolitano dentro do ciclo Cine e natureza. Horario: ATENCIÓN! Debido á longa duración do filme (2h 55min) só haberá proxeccións ás 20:15. Xoves 19, 20:15. Venres 20, 20:15. Sábado 21, 20:15.

Os días 10 e 11 de decembro terá lugar na Coruña e en Santa Cruz o seminario A conservación en acción. O desafío de conservar os océanos, organizado polo CEIDA e os Museos Científicos Coruñeses. Podedes descargar o programa completo e a ficha de inscrición premendo nesta ligazón.

Hoxe ás 20 horas na Fundación Caixa Galicia (Cantón Grande), presentación do libro Manuel María: literatura e nación. Interveñen Pilar García Negro, Teresa López, Alberte Ansede, Xoan Costa, Cesáreo Sánchez e Fernando González.