Todos os martes na Biblioteca Infantil e Xuvenil de Durán Loriga está a se desenvolver un obradoiro de escritura creativa impartido polo escritor e guionista Pedro A. Ramos García. O obradoiro está deseñado para rapaces e rapazas a partir de 15 anos, e para asistir é preciso inscribirse ou ben na web das Bibliotecas ou ben chamando á Biblioteca Infantil e Xuvenil no tfno.: 981 184 388.

Mañá martes 27 ás 20:00 na Biblioteca de Estudos Locais (na rúa Durán Loriga) impartirá unha conferencia o historiador Xosé Ramón Barreiro, Presidente da Real Academia Galega, co título “A Coruña na Guerra da Independencia”. A entrada é de balde até completar o aforo.

O vindeiro martes 27 de xaneiro André Pena Graña intervirá dentro do ciclo Economia, História, e Realidade Social organizado pola Agrupaçom Cultural O Facho cunha palestra que leva por título Galiza, o berço dos celtas da Europa atlântica (Brigantia, Breogam, Berobreo e Hércules. Olhando trás-a lenda). Doutor en Arqueoloxía e Historia Antiga pola Universidade de Santiago de Compostela, André Pena Graña é Historiador, Arqueólogo e Arquiveiro do Concello de Narón, e está especializado en investigacións sobre a cultura céltica do atlántico europeo e a supervivencia de trazos culturais da antiga Gallaecia no reino galego medieval e no folclore galego contemporâneo. O acto celébrase ás 20 horas no local da Fundación Caixa Galicia, situado no Cantón Grande da Coruña.

O sábado 24 e o domingo 25 o Teatro Rosalía de Castro acolle unha nova entrega do Ciclo Caixanova, desta volta coa función “Cosmética del enemigo”, adaptación teatral da novela de Amélie Nothomb a cargo de Concha Busto Producciones. A obra está protagonizada por José Pedro Carrión e Jesús Castejón; dirixe José Luis Sáez. O espectáculo comeza os dous días ás 20:30. O prezo das entradas é de 6, 7, 9 e 13 € (os usuario de carné xove, maiores de 65 anos e desempregados teñen un desconto do 20%).

Tamén o sábado 24 e o domingo 25 Teatro del Andamio representa a obra “A preguiza (La fiaca)” de Ricardo Talesnik, con Anxo Tirado, Mari Lodeiro, María Martín, Carlos Martín e Bárbara Grandío. Dirixe Álvaro Guevara. A función terá lugar no Fórum Metropolitano o sábado ás 20:30 e o domingo ás 19:00. A entrada custa 5 € (3 € para os usuarios de carné xove, maiores de 65 anos e desempregados).

Ademais do concerto de hoxe da Orquestra Sinfónica de Galicia dedicado a Félix Mendelsson, a música seguirá ocupando o Palacio da Ópera o resto da fin de semana. Mañá sábado 24 celebraremos ás 12 da mañá un concerto en familia, “Canto por cantar”, con entradas gratis para os nenos e cun prezo de só dous euros para os adultos. E o domingo 25 hai o tradicional concerto da Banda Municipal de Música dirixida por Marcel van Bree. A función comeza ás 12:15 e a entrada é libre até completar aforo.

A primeira edición da Mostra de Ciencia e Cinema organizada pola Asociación de Amigos da Casa das Ciencias tivo o privilexio de presentar en Galicia o último traballo de Werner Herzog, Encounters at the end of the world. Onte xoves soubemos que Encounters at the end of the world é un dos cinco finalistas aos Oscars na categoría de mellor longametraxe documental, xunto a Man on wire, Trouble the water, The Betrayal-Nerakhoon e The Garden. A cerimonia de entrega dos Premios da Academia terá lugar o domingo 22 de febreiro.

A proxección do documental de Werner Herzog celebrouse o sábado 25 de outubro de 2008 na Sala Leonardo da Vinci da Domus, poucos días despois da súa estrea absoluta en España limitada ás cidades de Madrid e Barcelona. O director alemán está considerado un dos cineastas vivos máis importantes e a Mostra quixo darlle un especial protagonismo á súa obra incluíndo dentro da programación outro filme seu máis, The wild blue yonder, premiado no Festival de Venecia e inédito en España.

A Mostra de Ciencia e Cinema contou co patrocinio da Dirección Xeral de Investigación, Desenvolvemento e Innovación da Consellería de Innovación e Industria, da Concellaría de Cultura do Concello da Coruña e dos Museos Científicos Coruñeses. O proxecto tivo ademais o apoio da Axencia Audiovisual Galega e do Centro Galego de Artes da Imaxe. A Asociación de Amigos da Casa das Ciencias traballa xa na preparación da II Mostra de Ciencia e Cinema.

Este sábado 24 ás seis da tarde hai unha nova sesión de cinema para os máis pequenos da casa no MACUF (Avenida de Arteixo, 171, Agrela-Bens). Desta volta o filme que se proxecta é Daniel o fedello, e a entrada é de balde. Lembramos que o MACUF dispón de aparcadoiro gratuíto, e que poden achegarse ao recinto collendo o bus urbano número 11. O ciclo está organizado pola Concellaría de Mocidade, Solidariedade e Normalización lingüística.

O xornalista Rubén Ventureira Novo recibe hoxe no Concello da Coruña o Premio de Xornalismo “Pérez Lugín”, que este ano acada a súa LXIX edición. O Premio, dotado con tres mil euros, foi instituido pola Asociación da Prensa da Coruña e conta co patrocinio conxunto do Concello da Coruña e da Secretaría Xeral de Comunicación.

Rubén Ventureira leva escrito moitos artigos sobre a etapa coruñesa de Pablo Picasso, da que é non só un gran divulgador senón tamén un atento investigador. Do seu traballo sobre o xenial pintor beneficiámonos todos os coruñeses e coruñesas polo apoio que Rubén Ventureira prestou e presta á Concellaría de Cultura en todo o relacionado coa Casa-Museo Picasso. Hoxe queremos recoñecer publicamente o noso agradecemento e darlle a través desta anotación os nosos máis agarimosos parabéns.

Imaxe: La Voz de Galicia

O ciclo Iberojazz 09 chega mañá venres 23 ao Teatro Rosalía de Castro, que se encherá de sons flamencos e de jazz coa presentación do disco Desvaríos de Jorge Pardo e Antonio Carbonell “El Bola”, editado polo selo RTVE-Música dentro da colección Jazz en España. A banda que se subirá ao escenario do Rosalía está formada por Jorge Pardo (saxo e frauta), Agustín Carbonell “El Bola” (guitarra), Ariadna Rivas (piano), José Miguel Guzmán (contrabajo), Sergio Martínez (percusión), Antonio Amador “El Ciervo” (cantaor) e Raúl Márquez (violín). A función comeza ás 21:00 e o prezo das entradas é de 6, 7, 9 e 13 € (os usuarios de carné xove, maiores de 65 anos e desempregados teñen un desconto dun 20%).

Mañá venres 23 ás 20:30 o Palacio da Ópera será o escenario dun novo concerto da Orquestra Sinfónica de Galicia, que baixo a dirección de Víctor Pablo Pérez interpretará un programa dedicado a Felix Mendelsson no ano en que celebramos o bicentenario do seu nacemento: a Sinfonía nº , en do menor, op. 11, e a Sinfonía nº 2 en mi bemol mayor, "Lobgesang", op. 52. A Orquestra estará acompañada polos coros da OSG e a Cor Madrigal dirixidos por Joan Company e Mireia Barrera, e contará coa participación coma solistas da soprano Elena de la Merced, a mezzosoprano Maite Arruabarrena e o tenor Agustín Prunell. O prezo das entradas é de 9, 14’30, 18 e 26’40 € (os maiores de 65, menores de 26 anos e desempregados poden adquirir entradas por 6’30 € para a zona C2)

Presidente Miterrand, o paseante do Champ de Mars de Robert Guediguian, esta semana na Sala Fernando Rey do Fórum Metropolitano dentro do ciclo A política no cinema. O filme proxéctase en versión orixinal con subtítulos en castelán.

Horario: Xoves 22, 20:30. Venres 23, 20:30 e 23:00. Sábado 24, 17:30 e 20:30 (a proxección do venres ás 23:00 é gratuíta).

Garage de Lenny Abrahamson, esta semana na Sala Marilyn Monroe do Fórum Metropolitano dentro do ciclo Estreas en V.O. O filme proxéctase en versión orixinal con subtítulos en castelán.

Horario: Xoves 22, 20:15. Venres 23, 20:15 e 22:45. Sábado 24, 17:15 e 20:15 (a proxección do venres ás 22:45 é gratuíta).

O ciclo Iberojazz continúa mañá mércores 21 no Fórum Metropolitano co concerto da Brigada Bravo & Díaz “Músicas populares da Guerra Civil”. Un espectáculo multimedia que une música e cinema en clave de jazz da man do zanfonista Germán Díaz e o guitarrista Antonio Bravo, que percorrerán o cancioneiro popular da Guerra Civil Española baseado nun material recollido no libro de Luis Díaz Viana. A función comeza ás 21:00 e o prezo das entradas é de 7 € (usuarios de carné xove, maiores de 65 anos e desempregados, 5 €).

Mañá mércores 21 na sede da Real Academia Galega (Tabernas, 11) preséntase o audiovisual “Manuel Curros Enríquez. Na Frente unha estrela”, de X. H. Rivadulla Corcón. A proxección celebrarase ás 19:00. A entrada é de balde até completar aforo.

Hoxe martes 20 ás 20:00 no local da Agrupación Cultural Alexandre Bóveda (Olmos, 16-18 – 1º) terá lugar un recital poético a cargo de Xavier Seoane e Manuel Rivas dentro do ciclo “A palabra na voz de quen a crea”, que conmemora o 25 aniversario do colectivo “De amor e desamor”. A serie de recitais proseguirá ao longo dos próximos meses. A entrada é de balde até completar aforo.