Esta fin de semana temos dúas actuacións da Orquestra Sinfónica de Galicia. Hoxe venres 20 e baixo a dirección de Víctor Pablo Pérez a orquestra interpretará o Concerto para violín e orquestra, en mi maior, op. 64, a Sinfonía nº3, en la menor, op. 56, "Escocesa" e a Sinfonía nº4, en la maior, op. 90, "Italiana", composicións todas elas de Felix Mendelssohn cuxo bicentenario celebramos en 2009. Participará coma solista Isabelle Faust (ao violín). A función comeza ás 20:30 no Palacio da Ópera e as entradas teñen prezos de 9, 14’30, 18 e 26’40 €. O programa repítese o sábado 21 de febreiro dentro do ciclo Festiclass, con entradas a prezos populares (4'5, 7'15, 9 e 13'20 €).

O sábado 21 de febreiro actúa no Playa Club unha das lendas da música xamaicana, Linval Thompson. O concerto está organizado pola Asociación Cultural Coruñesa Negus e conta co patrocinio da Concellería de Cultura do Concello da Coruña. Será o seu único concerto en Galicia dentro da xira "GHETTO LIVING" EUROPEAN TOUR 2009. O prezo das entradas é de 10 € en venta anticipada (Portobello, Discos Nonis; Ferrol: Discos M4; Santiago: GONG Discos; Vigo: HONKY TONK) e 12 € nas billeteiras.

Linval Thompson, de verdadeiro nome Linval Spencer, naceu en Kingston, Xamaica en 1959 e hoxe é considerado un dos máis importantes artistas da escena reggae mundial. Colaborou coa maioría dos grandes produtores xamaicanos, nun principio como cantante de "The Luminaries", con Augustus Pablo (Natty Dread A Pressure Dem) e Lee Perry (Kung Fu Man), e despois como produtor de artistas como Wailing Souls, Freddy McGregor ou Barrington Levy. Linval Thomsom fixo moito polo reggae nestas tres últimas décadas. A súa voz persoal traspasou as fronteiras e descuberto novos estilos, é coñecido como o compositor de himnos e cancións roots: Cool Down Your Temper e Don´t Cutt Off Your Dread Locks son os seus hits máis recoñecidos, sen esquecer que foi un dos produtores pioneiros dos comezos do Dance-Hall xunto a Juanjo Lawes, creador do selo Volcano. Despois dun longo retiro en Xamaica volve pisar os escenarios europeos máis importantes, demostrando que a súa forza e voz seguen intactas.

Polo escenario do Playa pasará tamén Lone Ark Riddim Force, a banda liderada polo cantante e produtor Roberto Sánchez (A-Lone Productions). Despois de numerosos discos, actuacións en directo e ser a backing band de Earl Sixteen, Alton Ellis, Kiddus I, Earl Chinna Smith, Alpheus e Horace Martin entre outras grandes figuras da escena xamaicana, Lone Ark Riddim Force comeza o ano da man de Linval Thompson. O seu propio son "roots" fai desta banda aclamada por todos os artistas cos que traballou unha das máis competitivas na escena europea.

MySpace de Linval Thompson

MySpace de Lone Ark Riddim Force

O filme cubano El cuerno de la abundancia de Juan Carlos Tabío, esta semana na Sala Fernando Rey do Fórum Metropolitano dentro do ciclo Alén do mar.

Horario: Xoves 19, 20:30. Venres 20, 20:30 e 23:00. Sábado 21, 17:30 e 20:30 (a proxección do venres ás 23:00 é gratuíta).

As mozas da lenzaría (Die Herbstzeitlosen) de Bettina Oberli, esta semana na Sala Marilyn Monroe do Fórum Metropolitano dentro do ciclo Retallos de muller. O filme proxéctase en versión orixinal con subtítulos en castelán.

Horario: Xoves 19, 20:15. Venres 20, 20:15 e 22:45. Sábado 21, 17:15 e 20:15 (a proxección do venres ás 22:45 é gratuíta).

O xoves 19 de febreiro no Salón de Actos da Biblioteca González Garcés (Rúa Miguel González Garcés, 1) pronunciará unha conferencia Felipe Senén sobre o tema O entroido en Galicia: máscaras, ritos e símbolos, na que explorará as diferentes maneiras de celebrar o entroido que teñen as diferentes vilas galegas e o xeito en que nelas se mesturan contidos populares e cultos. O acto comezará ás 20 horas e a entrada é libre.

Podedes consultar cales son os dez escollidos na web do obradoiro, que tamén recolle a carta de Santiago Auserón xustificando a súa decisión. Ademais, aínda estades a tempo de apuntarvos coma oíntes ao obradoiro, que se celebrará no Fórum Metropolitano e cuxo programa fica detallado aquí. Para iso abonda con enviardes un correo electrónico a este enderezo indicando o nome e un número de teléfono de contacto.

O director James Benning, un dos máis grandes cineastas en activo, falará hoxe da súa obra no Centro Galego de Artes da Imaxe (r/ Durán Loriga, 10) nun diálogo aberto conducido por Alberte Pagán. O acto incluirá a proxección do seu filme Utopía. A función comeza ás 20:30 e a entrada é gratuíta.

Hoxe martes 17 de febreiro ás 20:00 hai actuación do grupo de corda do Hyperion Ensemble no Teatro Rosalía de Castro. O concerto está organizado pola Sociedad Filarmónica. O prezo das entradas é de 10 € (3 € para os menores de 25 anos).

O venres 13 e o sábado 14 o Teatro Rosalía de Castro acollerá a representación da obra de Tirso de Molina Don Juan, el burlador de Sevilla, na montaxe de Concha Busto Producciones dirixida por Emilio Hernández e con Fran Perea, Isabel Pintor, Lluvia Rojo, Marina San José, Ana Salazar, Manuel Tejada, Juan Fernández, Enrique Arce e Jorge Roelas no reparto. A función comeza os dous días ás 20:30 e o prezo das entradas é de 10, 12, 15 e 21 € (carné xove, maiores de 65 anos e desempregados, desconto dun 20%).

O pianista Rudolf Buchbinder interpretará o Concerto para piano e orquestra de Robert Schumann coa Orquestra Sinfónica de Galicia baixo a dirección de Pablo González, na que será a súa segunda visita á cidade da Coruña. O concerto celébrase o venres 13 de febreiro ás 20:30 no Palacio da Ópera da Coruña e incluirá ademais as Variaciones in memoriam Gonzalo de Olavide do compositor David del Puerto e a Sinfonía nº 7 de Antonín Dvorák. O prezo das entradas é de 9, 14’30, 18 e 26’40 €.

Mañá venres 13 o Coliseum acolle un concerto do artista venezolano Franco de Vita que forma parte da súa xira Simplemente la verdad. Na actuación colaborarán coma artistas convidados Fernando Velasco, Jorge Villamirzar e Manuel Carrasco. A función comeza ás 21:30 e o prezo das entradas é de 21 e 24 euros.

Os Museos Científicos Coruñeses comezan a celebración do Ano Darwin coa presentación aos medios da programación prevista para conmemorar a efeméride mañá xoves 12 de febreiro de 2009, xusto o día no que se cumpren douscentos anos do nacemento do científico británico. Será a partir das 19:15 na Domus, e no acto terá lugar unha breve representación especialmente elaborada para a ocasión por parte de Casa Hamlet, recoñecida entidade teatral coruñesa.

A continuación, ás 20 horas, haberá un coloquio sobre a teoría da evolución realizado en colaboración coa Unidade de Divulgación e Cultura Científica e a Facultade de Ciencias da Universidade de A Coruña, presentado e moderado polo director dos Museos Científicos, Xosé Antón Fraga, e no que intervirán diversos profesores desta institución académica (Roberto Bao, Marta Vila, Pedro Galán) e mais o divulgador Ernesto Carmena. A entrada é libre até completar o aforo.

O filme arxentino La Antena de Esteban Sapir, esta semana na Sala Fernando Rey do Fórum Metropolitano dentro do ciclo Alén do mar.

Horario: Xoves 12, 20:30. Venres 13, 20:30 e 23:00. Sábado 14, 17:30 e 20:30 (a proxección do venres ás 23:00 é gratuíta).

Ninguén me quere (Keiner Liebt Mich) de Doris Dorrie, esta semana na Sala Marilyn Monroe do Fórum Metropolitano dentro do ciclo Retallos de muller. O filme proxéctase en versión orixinal con subtítulos en castelán.

Horario: Xoves 12, 20:15. Venres 13, 20:15 e 22:45. Sábado 14, 17:15 e 20:15 (a proxección do venres ás 22:45 é gratuíta).

Hoxe mércores 11 de febreiro ás 20:30 na Galería Sargadelos da Coruña (Rúa Real, 56) presentaranse os libros gañadores do II Premio Illas Sisargas de poesía erótica convocado conxuntamente polo Concello de Malpica e a Asociación Caldeirón desta localidade. Os libros premiados foron Baile Átha Cliath de Alberte Momán, con ilustracións de Paco Souto; e Baixo o Sol de Mesina de Lino Braxe, con ilustracións de Sol Rivas. O acto contará coa participación de Paco de Tano, Sol Rivas e os dous autores, Lino Braxe e Alberte Momán. A entrada é libre.