O coñecido cantautor, intérprete e showman Pablo Bicho preséntase acompañado polo seu habitual equipo humano formado por unha excelente selección de veteranos músicos que conseguen fusionar diferentes estilos de rock, rumba… Nos seus concertos fan un percorrido pola súa obra de autor, música mestiza e positiva, chea de ritmos quentes que contaxian a todos os espectadores. Será hoxe a partir das 23 horas no Castelo de San Antón dentro do ciclo Son de noite.

Hoxe no Teatro Rosalía de Castro e en función única poderemos gozar co proxecto musical galegocubano Descarga ao vivo. A función comezará ás 22:30 e o prezo das entradas é de 6, 7, 9, 13 € (usuarios de carné xove, maiores de 65 anos e desempregados/as teñen un desconto do 20%).

Poucos espectáculos poden presumir dunha novena tempada e dun éxito de público tan grande coma os Monólogos de la Vagina, unha viaxe hilarante e esclarecedora de Eve Ensler cara á última fronteira, a zona prohibida no corazón de toda muller. Foi un dos grandes éxitos na programación do Teatro Rosalía del 2007 e agora volve ao mesmo escenario, os días 24 e 25 de xullo, para que todos os que non o puideron ver no seu día poidan facelo agora e para que repitan os que queiran gozar de novo deste espectáculo. Son uns monólogos íntimos, sexuais, profundos e divertidos que serán interpretados por Maite Merino xunto a Mª Jose Gil e Paloma Catalán, tres expertas en monólogos que levan nove anos conversando co público sobre a muller e o seu universo máis íntimo. Será o venres 24 e o sábado 25 de xullo no Teatro Rosalía a partir das 22.30 h.

A Concellaría de Cultura e mulleres de Monte Alto organizan un acto de homenaxe e recoñecemento a todas aquelas mulleres que directa ou indirectamente sufriron as consecuencias da represión da ditadura franquista. Música e poesía para honrar a memoria das que nunca tiveron oportunidade de falar e defenderse, para as que foron silenciadas e para as que aínda hoxe son dignas depositarias de feitos moi dolorosos.

No acto participan Xurxo Souto, a poeta Dores Tembrás, os músicos Moncho do Orzán e Fernando Ceide, Yolanda Balbís e a Concelleira de Cultura María Xosé Bravo. Será o xoves 23 de xullo ás 12 da mañá no Campo da Rata, diante do momumento de Isaac Díaz Pardo.

O proxecto Descarga ao vivo que combina o traballo de músicos cubanos e galegos chega mañá xoves 23 de xullo ao Teatro Rosalía de Castro. Esta experiencia única botou a andar en Cuba o ano pasado con motivo da Feira Internacional do Libro da Habana e agora viaxa de volta ao noso país. Un espectáculo irrepetíbel que conta coa participación de Xabier Díaz (voz e percusión), Ugia Pedreira (voz), Guadi Galego (voz), Alejandro Vargas (piano e teclados), Raciel Jiménez (batería), José Manuel Díaz (contrabaixo), Adonis Ríos (percusións), Pedro Pascual (acordeón e bouzouki), Marcos Teira (guitarra flamenca), Edelmiro Fernández (gaita), Quim Farinha (violín), Óscar Fernández (zanfona), Pablo Pascual (clarinete baixo) e Gutier Álvarez (violín). A función comezará ás 22:30 e o prezo das entradas é de 6, 7, 9, 13 € (usuarios de carné xove, maiores de 65 anos e desempregados/as teñen un desconto do 20%).

O filme Led Zeppelin: The song remains the same de Peter Clifton e Joe Massot, esta semana no Fórum Metropolitano dentro do ciclo Cinenterraza.
Horario: Mércores 22, 22:30. Xoves 23, 22:30.

O Centro Galego de Artes da Imaxe (CGAI) (Rúa Durán Loriga, 10 baixo, A Copruña) comeza hoxe luns día 20 de xullo (20.30 horas) o ciclo dedicado ao cineasta portugués Miguel Gomes (Lisboa, 1972) coa proxección dunha sesión de curtas realizadas por el. O ciclo Miguel Gomes / Carta branca a Miguel Gomes estenderase o resto do mes e está formado polos seus traballos, dúas longametraxes e seis curtas, e cinco títulos escollidos por el e relacionados tanto coa súa obra como co cinema portugués contemporáneo. O día 30 Gomes manterá un coloquio co público, moderado polo crítico Martin Pawley, coincidindo coa presentación da súa última longametraxe, Aquele querido mês de agosto, gañadora do premio maior no BAFICI bonaerense.

O cineasta portugués Miguel Gomes (Lisboa, 1972) é obxecto dunha retrospectiva sobre a súa obra, unha traxectoria avalada este ano polo éxito crítico e o premio no BAFICI de Bos Aires por Aquele querido mês de agosto. Ao mesmo tempo, o CGAI concedeulle carta branca, liberdade de elección a Gomes para que presentase toda unha serie de títulos portugueses que tivesen que ver dunha ou doutra forma co seu cine, uns por relación directa -mesmo en ocasións con firmes afinidades profesionais-, outros porque representan o cine portugués no que Gomes, por distintas razóns, se recoñece.

Gomes explica desta maneira o resultado das súas eleccións: “Rapace foi o único filme no que traballei sen ser realizador, monteino con João Nicolau, que xa participara como montador ou actor en filmes meus. Escollín Quando Troveja para dialogar con A Cara que Mereces (o seu realizador, Manuel Mozos, escribiu comigo o argumento d’A Cara, onde interpreta o personaxe de Harry). E escollín Nós por Cá Todos Bem de Fernando Lopes, un dos fundadores do cinema novo portugués para dialogar con Aquele Querido Mês de Agosto. Intentei optar por filmes menos coñecidos e por iso as ausencias de filmes de Manoel de Oliveira e Pedro Costa, mais non conseguín deixar fóra a Joâo César Monteiro e Recordações da Casa Amarela, un dos filmes claves da miña cinefilia. O barroco O Bobo é precisamente unha das máis descoñecidas óperas primas de todo o cinema portugués. Jardim é o primeiro filme dun realizador máis novo ca min, un singularísimo e extravagante “documental” sobre o xardín Calouste Gulbenkien onde a cámara toma por momentos o lugar dos cágados e patos que flotan no lago.”

Difícil sería poñerlle unha etiqueta ao que nos ofrecen Balakandra. Nas súas cancións mestúranse o rock co jazz, o pop co bluegrass, o blues co chachacha ou country e mesmo detéctanse algúns ritmos balcánicos, todo isto pasado pola peneira do folk galego. Os concertos de Balakandra non deixan indeferente a ninguén e atrapan o público nunha viaxe polos sons do mundo.

Forman Balakandra Martín Sanjurjo (mandolina, guitarra midi, violín, dobro e voz), Farru Rodríguez (batería, percusións, acordeón e guitarra), Manolo Dopico (guitarra acústica e española, mandocelo e voz) e Amparo Calvo (voz e percusión).

Balakandra actuará mañá sábado 18 de xullo nas escalinatas da Domus a partir das 22:00. A entrada é de balde.

A música tradicional, a poesía e a vangarda dun estilo musical ligado a Galicia fusiónanse en Roi Casal dunha forma natural e harmónica, sen imposicións e sen modas. Nace así Lendas Douradas, resultado dun proceso de interpretación da cultura dun país baixo a perspectiva dun cidadán do século XXI. Un disco para unha nova xeración de galegos e galegas que ven no feito diferencial de todas as culturas do mundo o meirande tesouro que posúe a humanidade.

Lendas Douradas recolle 12 temas maioritariamente cantados e compostos por Roi Casal, que dende o ano 2000 forma parte de Milladoiro e se abre agora un nome propio cun disco que nace dun coidado estudo das composicións tradicionais e da poesía galega onde se aposta polo idioma de noso como soporte fundamental.

O concerto de Roi Casal terá lugar o venres 17 de xullo a partir das 23 horas no Castelo de San Antón. A entrada é de balde.

O director Alberte Pagán presentará o venres 17 de xullo ás 20:30 no CGAI o seu novo filme, Tanyaradzwa, un documental experimental independente rodado en Zimbawe. Segundo explica o autor Tanyaradzwa é un retrato a medio camiño entre un screen test de Warhol e a plasmación dun busto parlante confesional, a muller de Zimbawe que lle dá nome á película, que emprega a técnica da pantalla dividida. O filme dura 186 minutos e a entrada é de balde.

Exposición O DEBUXO ANIMADO AMERICANO. UNHA ARTE DO SÉCULO XX. Pezas da colección Luciano Berriatúa. Ademais, prosegue a exposición coa obra do debuxante Max, MAX HIPNOTOPÍA, até o 6 de setembro. Na Fundación Luís Seoane (Rúa San Francisco, s/n), co seguinte horario: de martes a sábado, de 11:00 a 14:00 e de 17:00 a 20:00; domingos, de 11:00 a 14:00; luns pechado.

Unha vez rematada a primeira fase das obras para a instalación da climatización, o Teatro Rosalía Castro reabrirá as súas portas esta semana con tres espectáculos singulares. O día 16, a compañía flamenca El Taller porá en escena Rosas Negras, un alegato sobre a violencia contra a muller. O día seguinte, venres 17, Clunia Jazz presentará o seu novo disco. E o domingo, a actriz e directora catalana Rosa Novell dará vida ao texto Sin noticias de Gurb de Eduardo Mendoza.

As entradas para as tres funcións xa están á venta no despacho de billetes da Praza de Ourense e a través do sistema de venta de entradas de Caixanova.

Xoves 16: EL TALLER COMPAÑÍA FLAMENCO: “ROSAS NEGRAS”. Función: 21:00. Entradas: 7 e 11 € (carné xove, maiores de 65 anos e desempregados/as, desconto dun 20%)

Venres 17: CLUNIA. Con Roberto Somoza (saxos), Nani García (piano), Baldo Martínez (contrabaixo), Fernando Llorca (batería). Función: 21:30. Entradas: 9 € (carné xove, maiores de 65 anos e desempregados/as, 7 €)

Domingo 19: “SIN NOTICIAS DE GURB”, de Eduardo Mendoza, con Rosa Novell. Música: Eugeni Roig. Función: 21:00. Entradas: 9, 10, 13 e 17 € (carné xove, maiores de 65 anos e desempregados/as, desconto dun 20%).

Mapa do ceo do mes de xullo: [descargar]

As noites son curtas na zona temperada do hemisferio norte e iso é algo que podemos experimentar se saímos de observación, pois é doado pasarmos da posta de Sol ao abrente sen apenas decatarnos.

O día 4 a Terra sitúase no afelio da súa órbita en torno ao Sol. Xúpiter xa é facilmente observábel durante case toda a noite, e o día 11 está en conxunción coa Lúa. O 13 e 14 de xullo Venus paseará xunto a Aldebarán, estrela α da constelación de Tauro, na cal tamén poderemos ver ao planeta Marte.

O día 22 ten lugar unha eclipse total de Sol que só será visíbel en Asia e o Océano Pacífico. A duración da súa fase de totalidade será a maior de todas as eclipses do século XXI, cun máximo de 6 minutos e 39 segundos.

Dúas das constelacións máis espectaculares do ceo protagonizan as noites de verán: Scorpius e Sagittarius. Nesta zona do ceo pódese apreciar moi ben a Vía Láctea, sempre e cando dispoñamos dun ceo escuro e sen Lúa. Podemos observala como un brazo esbrancuxado e tenue que atravesa o ceo entre estas dúas constelacións. Mirando entre ellas dúas estaremos apuntando ao centro da nosa galaxia. É unha parte do ceo que merece ser observada con prismáticos. No paseo atoparemos unha morea de obxectos interesantes, como nebulosas ou cúmulos de estrelas.