No Castelo Grisallo todo é gris: desde o maimiño da raíña ata a súa cunca de porcelana inglesa. E tamén chove moito. A súa Maxestade xa está cansa de colocar tarteiras debaixo das pingueirsa. Pero un día chega pola porta a Compañía do Paraugas. Pouco a pouco os membros desta compañía de circo daranlle cor a tanta monotonía e farán que a mesma choiva soe a música, a música das pingueiras nas tarteiras.

Esa é a sinopse da obra de Teatro do Andamio Pingueiras e Tarteiras de Teresa González, a representar hoxe sábado 26 (ás 19.00 horas) e mañá domingo 27 de setembro (ás 17.00 horas) no Forum Metropolitano. Trátase dunha obra infantil que fala de mundo colorido e cheo de forza do Circo e como fai mudar un mundo triste e gris. Unha obra dirixida especialmente a nenos e nenas de catro a dez anos pero na que tamén os adultos desfrutarán cunha representación chea de colorido, máxia e humor.