Despedimos o ano cun adianto da programación de artes escénicas do primeiro semestre de 2010 que realiza a Concellaría de Cultura coa colaboración de Caixanova. Que teñades unha feliz noitevella e un aínda máis feliz aninovo. Vémonos o ano que vén!

Programación cultural xaneiro-xuño de 2010: descargar PDF (3,6 MB)

A Domus presenta unha exposición coa que se clausuran os actos de celebración do Ano Darwin nos Museos Científicos Coruñeses. “Illas de Cabo Verde: primeira escala do Beagle” é unha exposición do Museo de Historia Natural da Universidade de Santiago de Compostela que fala sobre as illas de cabo Verde como laboratorios naturais de evolución e diversificación, as expedicións científicas para estudar os moluscos mariños de alí, a aportación destas expedicións ao avance do coñecemento destes animais e o papel das novas tecnoloxías no estudo dos moluscos mariños.

Unha desas expedicións foi a do H.M.S. Beagle, o barco no que Charles Darwin fixo a súa viaxe de descubrimento científico. Entre o 16 de xaneiro e o 7 de febreiro de 1832 fixo escala nas Illas de Cabo Verde, onde estudou e recolleu mostras de animais, plantas e rochas, e fixo importantes descubrimentos, como a observación, nun acantilado, dun estrato de cunchas mariñas a uns 13 metros sobre o nivel do mar que o levou a desenvolver a súa propia teoría da elevación dos continentes.

Ao igual que noutras illas oceánicas de orixe volcánica, foi pouco despois da súa formación cando, de xeito fortuito, chegaron ás illas de Cabo Verde os primeiros moluscos mariños. Procedían das costas de África e doutras zonas máis afastadas.

Co paso do tempo estas poboacións de moluscos mariños foron evolucionando ata orixinar novas species exclusivas destas illas. As erupcións volcánicas causaron drásticas reducións no tamaño dalgunhas poboacións. Os individuos sobrevivintes continuaron evolucionando, xerando novas poboacións, de maneira semellante ao que sucedera cando se formaron as illas.

Como consecuencia destes procesos e das características propias das illas de Cabo Verde, na actualidade existe unha elevada variedade de moluscos exclusivos. Por iso este arquipélago continúa a ser un laboratorio natural para coñecer a evolución dos moluscos mariños.

A exposición que se presenta agora na Domus percorre todos estes aspectos a través de paneis gráficos, vídeos, vitrinas con exemplares dos moluscos e un xogo didáctico interactivo.

Unha parte importante da mostra detense nas expedicións realizadas nas Illas de Cabo Verde, que pódense diferenciar en dous períodos:

- Dende o descubrimento do arquipélago ata 1975. As illas constituían unha etapa das grandes expedicións, nas que adoitaban facer pequenas recoleccións de moluscos e unha listaxe das especies atopadas, na maioría dos casos con moitos erros. Corresponden a esta época, entre outras expedicións, as viaxes do Beagle e do H.M.S. Challenger (Gran Bretaña).

- Dende 1975 ata a actualidade. No ano 1975 ten lugar unha expedición de malacólogos portugueses ás Illas de Cabo Verde. Tras quedaren fascinados polos moluscos deste lugar, volveron ao ano seguinte e publicaron, en 1977, o libro “Seashells from Cape Verde islands”, baseado no material que recolleran. A partir deste momento comeza unha serie de expedicións, que continúan na actualidade, nas que se fai un estudo máis profundo dos moluscos deste arquipélago. Ademais, os avances científicos e técnicos dos últimos anos permiten desenvolver moitas máis liñas de investigación que as morfolóxicas e anatómicas feitas polos naturalistas.

O Festival de Titeres María José Jove pon hoxe punto e final á súa edición de 2009 coa compañía Elfo Teatro que estará ás cinco da tarde na Sede da Fundación María José Jove para reprentar a obra Cuentos de ratitos. Despois, ás sete da tarde, Tanxarina presentará Titiricircus no Fórum Metropolitano. As entradas poden adquirirse no despacho de billetes de cada espacio desde unha hora antes do inicio da función ao prezo de tres euros, ou ben o abono familiar para tres persoas ao prezo de seis euros.

Podedes descargar en PDF o programa do concerto de mañá mércores 30 de decembro ás 21 horas no Rosalía. A entrada é libre.

Continuando coa programación do Festival de Titeres María José Jove, hoxe día 29 de dicembro a compañía Títeres La Gaviota estará ás cinco da tarde na Sede da Fundación María José Jove para reprentar a obra El ratoncito Pérez mentres que ás sete da tarde Elfo Teatro presentará El lobo ha vuelto no Fórum Metropolitano. As entradas para as dúas funcións pódense adquirir no despacho de billetes de cada espacio desde unha hora antes do inicio da función ao prezo de tres euros (o abono familiar para tres persoas ten o prezo especial de seis euros).

O mércores 30 de decembro o Teatro Rosalía de Castro acolle un concerto da Banda Sinfónica da Federación Galega de Bandas de Música. Durante o acto estrearanse as obras finalistas e gañadoras do II Concurso Galego de Composición para Banda de Música. O concerto comezará ás 21 horas e a entrada é libre até completar a capacidade do recinto.

Ás sete da tarde de hoxe preestréase na Coruña o documental sobre sinistralidade viaria Dous de vintetantos, escrito e dirixido por Manu Mayo. A proxección para colaboradores e medios de comunicación terá lugar na sede da Fundación Paideia (Praza de Ma Pita, no 17, 15001, A Coruña).

Dous de vintetantos é un documental en primeira persoa que nos aproxima a unha realidade de difícil solución: a violencia viaria. A través do seguimento dos casos máis duros da recente historia negra da sinistralidade viaria en Galicia, achegámonos á dor das familias pola morte dos seus, e á inxustiza que rodea esta enorme lacra social. O traballo, froito dunha coprodución entre TVG e Manuel Domingo Mayo Ramos realizado co apoio da Consellería de Cultura e Turismo, parte da experiencia persoal do director, e profunda nalgúns casos tristemente de actualidade: o sinistro acontecido na rúa Jenaro de la Fuente en Vigo, onde perderon a vida Manuel García e Dolores Iglesias, o falecemento da nena Irene Fernández en Ames, a ola de atropelos en Vilagarcía de Arousa, ou as secuelas que cambiaron a vida de Javier Mouriño tralo seu accidente. Unha obsesión guía estes dous anos de traballo documental: poñer rostro e nome ás vítimas para evitar que se convirtan nun número dunha estatística negra.

En palabras do director Manu Mayo, “O vintecinco de decembro de 2007 cambiou a miña vida e a miña forma de entender a mobilidade. Ese día na A-6, á altura de Begonte, por unha obra mal sinalizada, miña muller embarazada e máis eu, case temos unha saída de vía. Isto podería ser unha anécdota persoal sen máis significado se non fose porque en Begonte morreron meus pais, nun sinistro de tráfico, cando eu tiña 17 anos. Ao día seguinte vimos na prensa a foto que adxuntamos: Julia Vázquez Pajón e Carlos Manuel Prado Vázquez pasaron por aquela obra aproximadamente á mesma hora que nós, pero en dirección contraria. Esa foi a orixe dun traballo documental en primeira persoa sobre a sinistralidade viaria en Galicia, que agora presentamos en exclusiva aos medios de comunicación e ás familias.”

Un ano máis e co gallo das Festas do Nadal o IMCE programou a visita dos Reis Magos ás seguintes asociacións de veciños e entidades:

Día 28, Zona Monte Alto:
16.00 h.- Residencia Torrente Ballester
17.00 h.- Club del Mar
18.00 h.- Asociación Faro Monte Alto
19.00 h.- Airiños da Torre
19.45 h.- Monte Alto a Cien
20.30 h.- Casa de Castilla la Mancha

Día 29, Zona Eirís - Os Castros:
16.00 h.- Residencia 3ª Edad
17.00 h.- A. VV. Eirís
18.00 h.- As Xubias
19.00 h.- Os Castros
19.45 h.- Centro Cívico Castrillón
20.30 h.- A Gaiteira

Día 30, Zona Matogrande-Bens-Ventorrillo:
16.00 h.- Residencia Es Vida
17.00 h.- A. VV. Matogrande
18.00 h.- S. Cristobal das Viñas
19.00 h.- Bens
20.00 h.- Ventorrillo

Dentro da programación das Festas de Nadal, a compañía Lírica de Galicia ofrecerá no Teatro Rosalía de Castro unha gala lírica na que intervirán as sopranos Susana Lorenzo e Teresa Mª Vázquez xunto ao tenor Cesáreo Torres acompañados ao piano por Alejo Amoedo. A gala terá lugar mañá martes 29 de decembro ás 20.30 h., e nela interpretaranse lieder, cancións e arias de Mozart, Schubert, Tschaikowsky, Strauss, Faurè, Mompou, Toldrá, Purcell, Donizetti, Verdi, Puccini e Cilea.

Aquí tedes a programación da edición 2009 do festival de títeres María José Jove:

Sábado 26
Fundación Mª José Jove. 17.00 horas
AS AVENTURAS DE POLICHINELA E A GALIÑA NEGRA
DANTHEA TEATRO
Público: + 5 anos

Fórum Metropolitano. 19.00 horas.
¡QUE VIENE EL LOBO!
KAMANTE TEATRO
Público: + 5 anos

Domingo 27
Fundación Mª José Jove. 17.00 horas.
LA CAJA AMARILLA
KAMANTE TEATRO
Público: + 4 anos

Fórum Metropolitano. 19.00 horas.
VIOLETA COLETAS
TROMPICALLO
Público: + 4 anos

Lunes 28
Fundación Mª José Jove. 17.00 horas.
OS NARIGUDOS
TANXARINA
Público: + 4 anos

Fórum Metropolitano. 19.00 horas.
LA PRINCESA ENCANTADA
TÍTERES LA GAVIOTA
Público: + 5 anos

Martes 29
Fundación Mª José Jove. 17.00 horas.
EL RATONCITO PÉREZ
TÍTERES LA GAVIOTA
Público: + 4 anos

Fórum Metropolitano. 19.00 horas.
EL LOBO HA VUELTO
ELFO TEATRO
Público: + 5 anos

Miércoles 30
Fundación Mª José Jove. 17.00 horas.
CUENTOS DE RATITOS
ELFO TEATRO
Público: + 3 anos

Fórum Metropolitano. 19.00 horas.
TITIRICIRCUS
TANXARINA
Público: + 4 anos

A partir das 20 horas dentro do ciclo Forumfolk, concerto de Cantos de Nadal, con entrada libre. Vén e canta connosco!

O ano comeza con jazz na cidade da Coruña. O pasado venres foi presentada a quinta edición de Iberojazz, que ofrecerá sete concertos e dúas master class en diferentes espazos da cidade: o Teatro Rosalía, o Fórum Metropolitano e os clubs Filloa e Garufa, que se verán incrementados co Auditorio Andrés Gaos do Conservatorio Superior de Música da Coruña e coa Terminal, club de recente creación situado na Termaria Casa da Auga.

O martes 19 de xaneiro abrirá o festival o concerto que ofrecerá o trompetista Walter White (Detroit) no club Filloa ás 23.00 h, sen dúbida un dos máis importantes tiplistas do mundo. Gravou dúos históricos con Maynard Ferguson no Ronnie Scott, rexistrados no CD Live from London, e destacou tamén como intérprete de jazz e clásica nas súas colaboracións coa Lincoln Center con Wynton Marsalis, a Woody Herman, a Jaco Pastorius e a Mingus Big Band, e como solista da Sinfónica de Detroit, á parte de colaboracións con Bob James, Dave Holland ou Kenny Wheleer. Neste concerto, formará cuarteto co trío galego-asturiano-arxentino composto por Miguel Queixas (batería), Jacobo de Miguel (piano) e Gustavo Hernán (contrabaixo), e interpretará composicións do propio Walter e do pianista Jacobo de Miguel.

O mércores 20, entre as 10.00 e as 14.00 h, o guitarrista Steve Brown (Nova Iorque), director dos estudos de jazz de Ithaca College, membro do Chuck Israels-Nacional Jazz Ensemble of New York, que colaborou e tocou con músicos como Ray Charles, Chuck Mangione, Phill Woods ou Jimmy Smith. Impartirá unha master class no Auditorio Andrés Gaos do Conservatorio Superior de Música da Coruña, centrada principalmente na improvisación e na historia do jazz. Paralelamente, o trompetista Walter White ofrecerá outra master class na Terraza do Fórum Metropolitano, entre as 10.00 e as 14.00 h da mesma data.

O xoves 21, ás 21.00 h, no Teatro Rosalía, presentarase por primeira vez no Iberojazz a Big Band do CSM da Coruña dirixida polo seu titular, Pepe Evangelista e actuarán como director invitado o guitarrista Steve Brown, e como artista invitado o trompetista Walter. Este espectáculo está avalado polo proxecto educativo que vén desenvolvendo o Departamento de Jazz do dito conservatorio superior. Interpretaranse composicións do repertorio orixinal da orquestra, de Steve Brown e do propio Walter White.

O venres 22, ás 21.00 h, na Terraza Jazz do Fórum Metropolitano, o baterista coruñés Carlos López en formación de quinteto, dirinxindo un elenco de novos talentos do jazz español e portugués e cunha actual posta en escena, presentará o seu novo The last minute experience, un traballo musical baseado en ritmos hip hop, funky, e clásicos de Pink Floyd, acompañados por Videojockey.

O sábado 23, ás 23.30 h, no club A Terminal, presentará o seu primeiro proxecto artístico en solitario o trompetista cubano afincado na Coruña, Hansel Luis, que actuará en formación de cuarteto cun proxecto baseado na fusión da tradición cubana co jazz de vangarda europeo. Estará acompañado por recoñecidos músicos da escena coruñesa, como o pianista Sergio Delgado, o baterista Miguel Cabana e o baixista Octavio Vargas.

Na seguinte semana, o xoves 28, ás 21.00 h, na Terraza Jazz do Fórum, o saxofonista Roberto Somoza presentará o seu novo CD The vanguard, disco gravado para unha formación de octeto e dedicado ao saxo alto, cunha sección rítmica de luxo formada polo baixista Kin García e polo baterista Fernando Llorca, onde o metal adquire un gran protagonismo e onde o saxofonista galego amosa a súa versatilidade musical a través deste instrumento.

O venres 29, ás 21.00 h, e coincidindo co peche do festival, o contrabaixista ferrolán afincado en Madrid, Baldo Martínez, presentará no Teatro Rosalía o seu último traballo discográfico Projecto Minho, en formación de Grande Ensamble, que vén de estar nominado aos Premios da Música pola SGAE e considerado mellor disco de jazz do ano 2008 pola revista Cuadernos de Jazz, conta cun elenco de intérpretes e solistas de alta calidade, como a vocalista Maite Dono, o saxofonista Alejandro Pérez, o trompetista David Herrigton, o zanfoñista Germán Díaz, o guitarrista Antonio Bravo, e a percusionista Lucía Martínez, o baterista Pedro López e o tubista Chiaki Mawatari.

Para o peche, o mesmo venres 29, no club Garufa, o dúo de baixistas ourensáns Loren Tabarés e David Cid, nun novo proxecto co pseudónimo Beatles Jazz Bass, recreará a música dos Beatles adaptada a ese instrumento como solista e en formación de cuarteto.

O libro do fotógrafo Xurxo Lobato No país das vacas, editado por Xerais, será presentado na Fundación Caixa Galicia da Coruña (no Cantón Grande) o día 21 de decembro, luns, ás 20,00 horas. Intervirán no acto Lourenzo Fernández Prieto, Antón Reixa, Xosé Turnes, Manuel Bragado e Xurxo Lobato.

Os Museos Científicos acordaron ampliar o prazo de presentación de propostas de investigación para o Premio Luís Freire até o 22 de xaneiro de 2010. O premio está dirixido aos estudantes de secundaria en Galicia que busca fomentar o interese pola ciencia e a formación en actitudes científicas. O primeiro paso que os estudantes deben dar para participar é formularse unha pregunta á que desexen dar resposta, para despois deseñar a investigación que lles permita obter resultados e conclusións.

Os escolares que desexen participar teñen ata o próximo 22 de xaneiro para enviar as súas preguntas. Posteriormente, os admitidos, que serán comunicados o 30 de xaneiro, terán 3 meses para desenvolver os seus traballos. A fase final terá lugar na Domus o 12 de xuño de 2010, e a ela concorrerán os cinco mellores traballos seleccionados.

O primeiro premio consiste nunha viaxe a un lugar ou instalación de interese científico-cultural (nas pasadas convocatoria visitaron as excavacións de Atapuerca e o parque natural Arribes del Duero ), a subscrición á revista Muy Interesante, e un cheque-agasallo de El Corte Inglés para o profesor. O Premio está convocado polos Museos Científicos Coruñeses e El Corte Inglés, en colaboración coa Asociación de Amigos da Casa das Ciencias. Máis información e bases na web dos Museos.