Mañá mércores 27 de xaneiro o doutor Ramón Couto Turnes impartirá a conferencia La medicina natural ante el envejecimiento. Organiza a Asociación de Alumnos e Ex alumnos da Universidade Senior da Coruña. Será a partir das 18:00 no C.U.R (Almirante Lángara, s/n - antiga Esc. de Empresariais), con entrada libre até completar capacidade.

Hoxe martes 26 de xaneiro prosegue o ciclo de concertos organizado pola Sociedad Filarmónica no Teatro Rosalía de Castro. O Cuarteto Dominant ofrecerá unha actuación a partir das 20:00, con entradas a 10 € (3 € para os menores de 25 anos).

Hoxe martes 26 de xaneiro o Catedrático de Economia Aplicada da USC Xavier Vence Deza falará dentro do ciclo Economia, História e Realidade Social organizado por O Facho. A súa charla versará sobre As Caixas e a Crise financeira. O acto celébrase ás oito do serán no local da Fundación Caixa Galicia no Cantón Grande da Coruña.

Mañá luns 25 de xaneiro ás 21 horas no Fórum Metropolitano arranca unha nova edición de Forumfolk coa actuación de Iván Villar e Nelson Quinteiro, Contra2. O seu espectáculo Danza e contradanza é unha proposta innovadora de canto e danza tradicional galega arredor da voz e o corpo. A través da voz, mesturada en directo con escenas sonoras e efectos musicais e de son, faise un percorrido polo mundo tradicional dos oficios, o amor, o desamor…que se ve plasmado nunha nova danza tradicional fusionada con pinceladas doutro tipo de movementos.

Tedes máis información sobre a función e os artistas no espazo dedicado a Fórumfolk deste blog. O prezo das entradas é de 5 € (3 € para maiores de 65 anos, usuarios de carné xove e desempregados).

Dende o mércores 20 de xaneiro ata o domingo 21 de febreiro de 2010 está aberta na Casa da Cultura Salvador de Madariaga (Durán Loriga, 10) a exposición DIscurso abstracto. Organizada polo Concello da Coruña, esta exposición amosa obras de Fernando Pereira, un dos autores coruñeses que máis ten investigado dentro da abstracción pictórica. Movéndose preto da pintura máis xestual, as súas composicións, de trazo potente e ricas en estímulos visuais teñen xa un grande recoñecemento da crítica especializada.

Discurso Abstracto nace como contrapunto aos últimos traballos figurativos do artista, e sobre todo a raíz do proxecto Mulleres en Pé de Guerra. Foi entón cando Fernando Pereira decidiu facer unha serie con "arte ausente de literatura", en palabras de Mónica Barros, autora do texto do catálogo. O pintor busca unha pintura ‘pura’, baseada na composición, a cor (por presenza ou por ausencia) e a liña (que lembra a Action Painting). Pereira presenta na Casa de Cultura Salvador de Madariaga 21 lenzos acompañados de lonas do detalle e dun video que, xunto coas súas reflexións, nos axudan a gozar con maior fondura da visión das pezas. A exposición pode ser visitada de luns a domingo, de 12 a 14 e de 18 a 21h.

Descargar catálogo da exposición: PDF, 2,1 MB

Dentro da programación do festival Iberojazz esta fin de semana poderemos disfrutar do espectáculo Só de Carlos Blanco no Fórum Metropolitano de A Coruña. As dúas funcións programadas son o sábado 23 de xaneiro, ás 20:30, e o domingo 24 de xaneiro, ás 19:00. O prezo das entradas é de 7 euros (5 euros as entradas de prezo reducido).

Hoxe venres 22, ás 21.00 h, na Terraza Jazz do Fórum Metropolitano, o baterista coruñés Carlos López en formación de quinteto.

Carlos López dirixe un elenco de novos talentos do jazz español e portugués. Cunha actual posta en escena, presentará o seu novo The last minute experience, un traballo musical baseado en ritmos hip hop, funky, e clásicos de Pink Floyd, acompañados por un Videojockey.

Mañá venres 22 e o sábado 23 o Ciclo de Teatro Caixanova leva ao Rosalía a obra El encuentro entre Descartes y Pascal joven, de Jean Claude Brisville, na montaxe dirixida por Josep Maria Flotats e protagonizada por el mesmo na compaña de Albert Triola. As funcións serán os dous días ás 20:30. O prezo das entradas é de 8, 10, 13 e 17 € (os usuarios de carné xove, maiores de 65 anos ou desempregados/as teñen un desconto do 20 %).

Hoxe xoves 21 ás 21:00 no Teatro Rosalía presentarase por primeira vez no Iberojazz a Big Band do Conservatorio Superior de Música da Coruña dirixida polo seu titular, Pepe Evangelista e actuarán como director invitado o guitarrista Steve Brown, e como artista invitado o trompetista Walter. Este espectáculo está avalado polo proxecto educativo que vén desenvolvendo o Departamento de Jazz do dito conservatorio superior. Interpretaranse composicións do repertorio orixinal da orquestra, de Steve Brown e do propio Walter White.

O concerto da Banda Municipal terá este domingo un carácter moi especial, por tratarse dunha actuación na que se fusionará a súa música coa da banda de rock "Adrián Saavedra Band". Será este domingo 24 de xaneiro ás 12:15 no Palacio da Ópera, e baixo a dirección de Marcel van Bree. A entrada coma sempre é de balde.

A Adrián Saavedra Band está formada por Carmen Rey (voz), Carlos Calviño (guitarra), Octavio Vargas (contrabaixo), Miguel Cabana (batería) e Adrián Saavedra (piano). O repertorio deste proxecto de fusión entre a música sinfónica e o rock é o seguinte:

MERZA´S CHORUS: VOCAL SHOW
NATUREZA HUMANA
GOODBYE MICHELLE
TIC TAC
ROCKSTAR (só o grupo rock)
RELATO EN BOTELLA
BARES
NUNCA MÁIS (NEVER MORE)

Ponyo no acantilado de Hayao Miyazaki (Xapón, 2008), esta semana na Sala Fernando Rey dentro do ciclo Animación.

Horario: xoves 21 ás 20:30; venres 22 ás 20:30 e 23:00; sábado 23 ás 17:30 e 20:30. Os pases do venres ás 23:00 e o sábado ás 17:30 son "sesións do espectador" con entrada reducida (1,5 €). O prezo do resto de sesións é de 3 €.

XXY de Lucía Puenzo, esta semana na Sala Marilyn Monroe dentro do ciclo Alén mar.

Horario: xoves 21 ás 20:15; venres 22 ás 20:15 e 22:45; sábado 23 ás 17:15 e 20:15. Os pases do venres ás 22:45 e o sábado ás 17:15 son "sesións do espectador" con entrada reducida (1,5 €). O resto de sesións teñen o prezo de 3 €.

Hoxe mércores 20 de xaneiro ás 20:00 o Teatro Rosalía Castro estrea O Segredo da Frouxeira, documental de Xosé Abad. En palabras do director, o documental "aborda un tema nunca suficientemente contado, pero desde unha perspectiva diferente, a dos conflitos e equívocos vividos polos familiares das vítimas. A perda, o saqueo, o silencio, a ameaza, a difamación, todo o que vai sucedendo despois de que os seus familiares fosen fusilados. A carga emocional non impide ás familias, tamén vítimas da represión, reencontrarse e reclamar o recoñecemento da verdade, sen ningún ánimo de vinganza e construíndo unha historia de enorme dignidade”. A entrada á proxección é libre e gratuíta.

Hoxe mércores 20 de xaneiro ás oito do serán preséntase na sala de prensa da Fundación Caixa Galicia (Cantón Grande, 21-24) o libro Facendo Historia con memoria de Lourenzo Fernández Prieto. No acto intervirán Ernesto Sánchez Pombo –xornalista–, Manolo Martínez Barreiro –analista político e autor do limiar–, X. Amancio Liñares Giraut –director editorial de 3C3– e o propio autor.

A Directiva da Agrupaçom O Facho acordou outorgar o premio O Facho de Ouro ao profesor Xesús Alonso Montero, "como testemunha e reconhecimento a sua longa trajectória na defesa da dignidade e da cultura do País". O acto cívico estará acompañado dunha cea homenaxe que se celebrará o sábado día 30 de xaneiro ás 21 horas no Hotel Riazor da Coruña. O prezo por persoa é de 30 €. Para reservar lugar, chamar ao teléfono 981 269 663 (tardes) ou enviar un correo electrónico.