Sábado 30 de abril ás 19:00 h.
Domingo 1 de maio ás 17:30 h.
Fórum Metropolitano
Entradas: 4 euros (abono de 3 entradas por 9 euros).

"Hai xente que bebe area, pero non porque lles guste, senón porque nunca probaron a auga. Que contamos? O que lles pasa a catro persoas que viven a cada lado dunha parede e un día empezan a vincularse cos seus veciños. Que rescatamos? O valor de vencer o medo ás situacións novas e descoñecidas ás que nos enfrontamos a diario". "Area e auga" é unha obra representada polo Teatro do Andamio, con Tatiana Likhacheva, Gema Ulloa, Nacho Martín e Álvaro Guevara, baixo a dirección de Álvaro Guevara.

Sábado 30
Sala O Túnel (Coliseum)
22:30
Entradas: 15 euros (12 euros en venda anticipada).

Nun momento na súa carreira no que podían ser considerados coma uns "afortunados perdedores", Sex Museum presenta o seu último álbum titulado "Again and again" no que interpretan 11 cancións cunha frescura pouco común nun grupo que parece xa non mirar ao seu redor para buscar referencias. Agora que o probaron todo, decidiron mirar para dentro e deixarse levar por eles mesmos. Soan como son, como viven, como falan e como respiran.

Domingo 1
Palacio da Ópera
20:30
Entradas: 9’30, 14’70, 18’50 e 27’20 euros.

Cerre de tempada de luxo a cargo do titular da Orquestra Sinfónica de Galicia, Víctor Pablo Pérez, quen presenta un programa centrado nas capacidades expresivas da voz. Neste sentido, dous son os compositores escollidos para evidenciar a emotividade, beleza e calidade vocal da soprano guipuscoana Ainhoa Arteta, gran protagonista da velada: Richard Strauss (1864-1949) e Giacomo Puccini (1858-1924). Do primeiro, destacamos a herdanza dos instintos musicais do seu pai (Franz) que ben o puideron ter conducido a ser un neno prodixio, ao estilo de Mozart. Pero non foi así: en Múnic recibiu unha boa educación xeral que se habería de traducir nunha traxectoria artística de grande empaque que o converteu, segundo a opinión do público, no compositor máis grande do mundo e un dos directores mundiais máis reputados. Do segundo, e no terreo estritamente musical e estilístico, cabe remarcar o apropiado dos seus libretos, a lexitimidade do dramatismo que envolve os seus protagonistas e a súa capacidade de nos ofrecer cancións tenras e sensuais. Puccini alcanza naturalmente a melodía e por iso mesmo se pode afirmar que é un compositor instintivo (como apunta Harold C. Schonberg). As versións de Arteta explican o porqué do éxito da soprano que venceu nos concursos convocados polo Metropolitan Opera National Council Auditions de Nova York e o Concours International de Voix d’Opera Plácido Domingo de París, de xeito previo ao seu debut operístico, acontecido en Estados Unidos, no ano 1990.

"Merendas con contos" é unha actividade destinada a nenos e nenas de 3 a 7 anos acompañados dos seus pais ou coidadores. Recolle o convite dende o sábado anterior á realización da actividade. Os contos sobre os que xira a actividade desta semana ("Ras e princesas") son: "El sapito vegetariano", de Elisa Ramón, "Ranilda", de Mar Pavón, e "Ronsel de Poesía", e serán interpretados pola Compañía do Trinke Trinke.

As datas das sesións e para retirar os convites son:

Sábado 30 de abril ás 18:30 h. Biblioteca Infantil e Xuvenil (rúa Durán Loriga, 10). Convites desde o luns 25 de abril.
Martes 3 de maio ás 17:30 e 19:00 h. Biblioteca Municipal da Sagrada Familia (Antonio Pereira, 1). Convites desde o sábado 30 de abril.
Mércores 4 ás 18:30 h. Biblioteca Municipal de Monte Alto (Praza dos Avós, s/n, 3º). Convites desde o sábado 30 de abril.
Xoves 5 ás 18:30 h. Biblioteca Municipal do Castrillón (Praza de Pablo Iglesias, s/n). Convites desde o sábado 30 de abril.
Venres 6 ás 18:30 h. Biblioteca Municipal dos Rosales (Praza Elíptica, 1). Convites desde o sábado 30 de abril.
Sábado 7 ás 18:30 h. Biblioteca Municipal do Fórum Metropolitano (Río Monelos, 1). Convites desde o sábado 30 de abril.

Sábado 30
Biblioteca Municipal dos Rosales (Praza Elíptica, 1)
18:00
Entrada libre até completar capacidade.

O ciclo "Érase unha vez o cine: Introducción á historia do cine en 6 sesións" achegará o público interesado ao mundo cinematográfico a través do visionado comentado e contextualizado de fragmentos de películas dende os inicios ata o cine moderno. Nesta terceira sesión: "O cine clásico e a eclosión do documental".

Sábado 30 de abril
Biblioteca do Fórum Metropolitano
Horario: 17:30
Entrada: inscrición previa, convite a recoller o sábado anterior.

"Descubrindo xuntos", programa para bebés de 1 a 2 anos.

Sábado 30
Los Cantones Village (Centro de Ocio)
12:00 e 18:00
Entrada libre até completar capacidade.

Dentro das actividades do Día Internacional da Danza, mostra de traballo das escolas participantes: Conservatorio Profesional de Danza da Deputación da Coruña, Druida Danza, Artestudio, Eidos, Soul, Latincross, Carmen, Temple Flamenco, Aula de Danza da Universidade da Coruña, Trintaetres, Alahadanza, Presto Vivace. Organizado por Ampadanza.

Sábado 30
Biblioteca Miguel González Garcés (Rúa Miguel Glez. Garcés, s/n.)
11:30
Entrada libre até completar capacidade.

Dentro da programación infantil da Biblioteca, "Lume", da Compañía de títeres Babaluva.

Sábado 30
Praza das Conchiñas
12:30
Entrada libre até completar capacidade.

Comeza a campaña "O galego medra contigo!", organizada pola Concellaría de Mocidade, Solidariedade e Normalización Lingüística, co concerto de Pablo Díaz e Tic Tac.

Sábado 30
MACUF (Avenida de Arteixo, 171)
18:00
Entrada libre até completar capacidade.

Finaliza o Ciclo "13 pelis para as/os peques", organizado pola Concellaría de Mocidade, Solidariedade e Normalización Lingüística, proxección de "Rex, un dinosauro en Nova York".

Sábado 30
CGAI (Durán Loriga 10)
18:00
Entrada libre até completar capacidade.

Dentro do Ciclo "Off Galicia", proxección de "Curtametraxes de Samuel Lema e Nani Matos": "O show de..." (2010, 18 minutos). Dirección e guión: Samuel Lema. Mario, un garda de seguridade pusilánime e estraño, ten problemas coa súa dona, que foxe da realidade vendo o seu reality favorito, "O show de..." Un revólver con dúas balas, unha chamada telefónica e un drogadicto lanzarán a Mario ao estrelato mediático coa axuda do programa; e "Dies die" (2009, 18 minutos). Dirección e guión: Nani Matos. Avelino é un septuaxenario que vive centrado no coidado da súa muller, Teresa. A vida de Avelino transcorre con certa normalidade ata que empeza a notar síntomas moi similares aos de Teresa. Presentación a cargo dos seus autores.

Do venres 29 de abril ao venres 27 de maio
Libraría Endo (Rúa Entrepeñas, 41, baixo)
De luns a venres: de 10:00 a 14:00 e de 16:30 a 20:30 h.
Sábados: de 10:00 a 14:00 e de 17:00 a 20:00 h.
Entrada libre até completar capacidade.

Rubén Mariño expón a súa obra de "Caricaturas e ilustracións". A inauguración terá lugar o venres 29 de abril ás 20:30 h., e estará salpimentada coa actuación do grupo musical "Los Triguis", formado por José Brea, Javier Rey e Rubén, que tocarán diferentes versións de cancións dos anos 80.
Previamente, o mesmo venres 29, a partir das 18:30 h., terá lugar unha nova sesión dos "Contos da avoa", actividade dedicada especialmente a nenas e nenos. Nesta edición o conto protagonista é "Tonino, o invisible" do italiano Gianni Rodari.

Do luns 2 ao xoves 5 de maio
Biblioteca Miguel González Garcés (Rúa Miguel Glez. Garcés, 1)
De 10:00 a 13:00 e de 17:00 a 19:00
Prezo: de balde previa inscrición.

Obradoiro de creación literaria a cargo de Marina Mayoral.

Venres 29
Real Academia Galega (Rúa Tabernas, 11)
20:00
Entrada libre até completar capacidade.

Última conferencia dos "IV Encontros Cidade da Coruña", baixo o lema "Ser Escritor, Ser Escritora", organizados pola Asociación de Escritoras e Escritores en Lingua Galega, co patrocinio da Concellaría de Cultura do Concello da Coruña e a colaboración da Real Academia Galega. Antonio Gamoneda falará sobre "Da natureza e a xeración do pensamento. Linguaxe poética", e a continuación ofrecerá unha lectura poética. A presentación do acto correrá a cargo do presidente da AELG, Cesáreo Sánchez, contando tamén coa presenza do presidente da Real Academia Galega, Xosé Luís Méndez Ferrín, e da Concelleira de Cultura da Coruña, María Xosé Bravo.
Gamoneda recollerá neste acto o galardón "Escritor Galego Universal", concedido pola AELG, que destaca a altísima poesía e o insubornábel compromiso ético do autor, para quen o individuo, e por tanto o poeta, se realiza na poesía como forma de coñecemento.  A obra de Antonio Gamoneda (nado en Oviedo en 1931) esténdese desde o 1960 con "Sublevación inmóvil" até hoxe, marcada por unha fonda pegada ética que gaña forza nun exemplo de coherencia e verdade poética. Premio Cervantes en 2006, reivindícase como pertencente á cultura da pobreza: o sufrimento social penetra na súa conciencia lingüística, conferíndolle unha linguaxe poética e semanticamente subversiva. Combina un poderoso dominio do idioma coa permanente actualidade do seu mundo poético nacida da asunción da propia historia persoal e colectiva. O recoñecemento europeo e americano revélase na tradución da súa obra a distintas linguas. Foi tamén Premio Raíña Sofía de Poesía Iberoamericana en 2006 e Premio Nacional de Literatura na modalidade de Poesía en 1988.

A exposición "World Press Photo 2011" recolle as fotos gañadoras do concurso, que por terceiro ano consecutivo se estrea no Aquarium coruñés, e estará aberta do xoves 28 de abril ao xoves 26 de maio de 2011. Trátase da exposición das mellores fotografías realizadas por fotoxornalistas de todo o mundo. Son as imaxes premiadas no maior e máis prestixioso concurso de fotografía de prensa, World Press Photo.
A fotografía gañadora desta edición é unha instantánea de Jodi Bieber que mostra a unha muller de 18 anos, Aisha Bibi, da provincia de Oruzgan, en Afganistán, que fuxiu da casa do seu marido á casa da súa familia, queixándose do trato violento recibido. Os talibáns chegaron unha noite, esixindo que Bibi fose axustizada. Pouco despois, un comandante talibán pronunciou o seu veredicto, e mentres o seu cuñado a agarraba, o marido cortoulle as orellas e o nariz. Aisha foi abandonada, pero máis tarde foi rescatada por cooperantes e militares estadounidenses. Despois dun tempo nun refuxio para mulleres en Kabul, foi levada a Estados Unidos, onde foi tratada das súas feridas e sometida a cirurxía reconstructiva. Aisha Bibi vive hoxe nos EUA. Jodi Bieber xa gañou oito premios World Press Photo e é o segundo fotógrafo sudafricano en gañar o máximo galardón no concurso. Segundo un membro do Xurado, Ruth Eichhorn, "É unha imaxe incriblemente forte. Traslada ao mundo unha mensaxe dunha potencia enorme, ao redor do 50% da poboación son mulleres, moitas das cales viven aínda en condicións de miseria, sufrindo violencia. É forte porque a muller parece tan dignificada, icónica". Pola súa banda, o xurado Aidan Sullivan dixo: "Parte do que o concurso World Press Photo fai é levar fotos a unha audiencia máis ampla, unha audiencia que se pregunta Por que? E esta foto provoca que a xente se pregunte: Como é posible…?, Que está pasando…? Para min esta era a foto que provocaba as preguntas máis importantes."
Entre a lista de gañadores desta edición figuran tamén tres fotoperiodistas españois: Gustavo Cuevas, de axencia Efe, por unha foto do collida do matador Julio Aparicio na Praza das Ventas o pasado 21 de maio e os freelance Fernando Moleres, por unha foto de mozos presos nun cárcere de Serra Leona, e Guillem Val, por un retrato dun home dinka fronte á súa casa en Sudán do Sur.
O xurado concedeu premios en nove categorías temáticas a 55 fotógrafos de Australia, Bangla Desh, Brasil, Canadá, China, Dinamarca, Francia, Alemaña, Haití, Hong Kong, Hungría, India, Indonesia, Irlanda, Israel, Italia, México, Países Baixos, Polonia, Somalia, Sudáfrica, España e Estados Unidos.
Este ano alcanzouse un récord de participación, con 108.059 imaxes presentadas a concurso, realizadas por 5.847 fotógrafos de 125 nacionalidades diferentes.