Venres 6
Galería Sargadelos (Rúa Real, 56)
20:00
Entrada libre até completar capacidade.

Continúa o "Ciclo Escrita(s) 2011", que, baixo o título de "Circunvolucións", consiste nunha serie de charlas na que se abordará a experiencia que coa(s) escrita(s) manteñen diversos autores, tratando de atravesar a partir das diferentes liñas de universo dos/das conferenciantes/conferenciantas a proliferación das inscricións que fan con nós comunidade. As charlas desenvolveranse todos os venres ás 20:00 h., até o 10 de xuño. (Aquí deixamos o programa completo: Ciclo Escritas 2011 Sargadelos). Nesta quinta charla, Edita Rodríguez falará sobre "Ferramentas artísticas como metodoloxía de intervención política. Formas culturais híbridas entre a arte, o activismo político e a organización comunitaria". Propostas que problematizan non só co medio artístico máis institucional, senón que nun contexto de arte pública, aparecen directamente relacionadas con problemáticas sociais, enleadas na lóxica do statu quo. Non producen simplemente obxectos, imaxes e mensaxes, senón intervencións efectivas ou obxectos do mundo social, tentando reinstaurar un determinado sentido da comunidade. Pretenden ser unha vocación da arte para encontrar unha resposta ás formas do poder económico, institucional e ideolóxico... producindo experiencia e coñecementos críticos.