Onte luns 8 de marzo, día internacional das mulleres, o Concello da Coruña inaugurou a exposición VISIBILIDADE. A partir de Resetea: Cambia o teu rol, ao que unimos uns textos que conforman un percorrido reflexivo arredor dos traballos e profesións, a Concellaría de Igualdade e Participación Cidadá proponnos unha viaxe que reivindica a corresponsabilidade entre homes e mulleres, sen máis límite que a imaxinación, poñendo en valor os múltiples logros acadados así como evidenciando auqeles sectores laborais aínda profusamente masculinizados. A exposición poderá verse na Sala de Exposicións do Palacio Municipal até o 4 de abril.

A mellora da calidade de vida dos países en vías de desenvolvemento pasa pola incorporación da muller á vida económica, social e cultural. A exposición Nais de África mostra os retratos que Gabriel Tizón fixo dunhas nais que comprenden idades entre 14 e 65 anos, da rexión de Biur, en Guinea Bissau. Reivindica o valor destas mulleres na súa sociedade. Traballan dentro e fóra de casa, son responsables da educación e a supervivencia dos seus fillos... son unhas heroínas anónimas. A exposición estará nas ventás exteriores da Subdelegación do Goberno até o día 11 de abril.

Hoxe venres 5 ás 20 horas no vestíbulo da Domus inaugúrase unha exposición fotográfica de Xacobe Meléndrez: Caiuco, fame e emigración.

Desde o pasado 25 de febreiro e até o 21 de marzo pode verse na Casa da Cultura Salvador de Madariaga a exposición MULLERES X MULLERES, a homenaxe artística dun grupo de creadoras a unha selección de figuras destacadas en diferentes disciplinas, "entrelazadas todas elas pola distorsión das desigualdades da nosa historia, mais liberadas xa, por fortuna, das correas dos estereotipos sociais que tiñan determinado outro pasado para si, outro futuro para nós". Podedes descargar aquí mesmo o catálogo da exposición (PDF, 11 MB).

Hoxe ás 20:00 inaugúrase na Casa Museo Casares Quiroga a exposición DI SOMOS ID, que forma parte dun proxecto de normalización lingüística do IES Menéndez Pidal. Estarán presentes o director deste centro, Almudena García, a coordinadora do proxecto, Mercedes Queixas, coordinadora provincial de Equipos de Nomalización e Dinamización Lingüística e a concelleira de Cultura, Mª Xosé Bravo.

Esta exposición do fotógrafo Raúl Vázquez sobre os tópicos identitarios galegos é o fío condutor dun programa de actividades que recibiu o premio de innovación convocado pola Secretaría Xeral de política Lingüística. O obxectivo fundamental deste traballo é intentar superar os prexuízos sociolingüísticos que impiden manexar a nosa lingua con normalidade; estes prexuízos vense nas imaxes que nos mostra o autor, e con elas queren convidar a cada espectador a ollarse a si mesmos para recrear eses tópicos, entendéndoos, interpretándoos, asumindo as súas contradicións dialécticas, superando a lectura zafia e chabacana que nun primeiro momento se pode facer deles, e ao mesmo tempo saber algo mais dun mesmo, tanto na dimensión individual (o eu), como na colectiva (o nós).

Atapuerca e a evolución humana, que reúne as reconstrucións das pezas máis importantes achadas na Gran Dolina e na Sima dos Ósos, poderá visitarse do 26 de febreiro ao 25 de abril na Sala Municipal de Exposicións en Palexco e servirá para dar a coñecer os depósitos burgaleses da Serra de Atapuerca en toda España como paso previo e preparación á apertura en 2010 do Museo da Evolución Humana de Burgos. Este Museo está presente na exposición a través dun espazo específico no que se detallan as súas instalacións e os contidos que albergará. A exposición está dirixida por Juan Luis Arsuaga, co-director do Equipo de investigacións de Atapuerca, e virá apoiada por actividades complementarias como conferencias e proxección de documentais que abordan distintos aspectos relativos á evolución humana e á relevancia científica dos Depósitos de Atapuerca. Haberá visitas guiadas para grupos escolares, previa inscrición no teléfono 981 18 98 40, e conferencias no Salón de Actos da Domus, de acordo ao seguinte programa:

26/02/10 ás 20h: Darwin e a evolución humana, a cargo do Profesor Juan Luis Arsuaga
11/03/10 ás 20h: A paisaxe de Atapuerca ao microscopio a cargo da Doctora Gloria Cuenca Bescós.
15/04/10 ás 20h: CSI Atapuerca a cargo da Doctora Ana Gracia Téllez.

A mostra inclúe ademáis unha serie de obradoiros para escolares que serán impartidos por miembros vinculados aos equipos de Atapuerca, destinados a estudantes entre 8 e 12 anos. Para participar é preciso inscribirse previamente no teléfono 981 18 98 40:

13, 27 de marzo e10 de abril de 2010, de 12 a 13’30h: Detectives do Pasado (Obradoiro de Arqueoloxía).
13, 27 de marzo e 10 de abril de 2010, de 18 a 19’30h: Coñeceremos os vertebrados (Obradoiro de Paleontoloxía)
14, 28 de marzo e 11 de abril de 2010, de 12 a 13’30h: ¿Queres coñecer qué pintaban os nosos antepasados e por qué o facían? (Obradoiro de Arte prehistórico)

Descargar dossier informativo (PDF, 888 KB)

A finais dos anos 50 un grupo de estudantes e traballadores galegos de ideoloxía esquerdista formou en Madrid o grupo denominado Brais Pinto. Dentro del convivían, entre outros, Xosé Luís Méndez Ferrín, Bernardino Graña, Reimundo Patiño, Xosé Fernández Ferreiro, Bautista Álvarez, Ramón Lourenzo, César Arias, Herminio Barreiro, Aleixandre Cribeiro, Manoel María e "Ben-Cho-Shey". A Casa Casares dedicoulle ao grupo unha exposición que pecha mañá sábado 27 de febreiro as súas portas. O horario do recinto é de 10:30 a 14:00 e de 17:30 a 20:00.

O vindeiro domingo remata A roseira dos recordos, exposición sobre Ramón Cabanillas na Sala de exposicións do Pazo de María Pita. A mostra poderá visitarse ata o domingo en horario de 12:00 a 14:00 e de 18:00 a 21:00 horas. Ao logo de 10 momentos diferentes da súa biografía, a editorial Galaxia fai un repaso por este autor de versos exaltados e directos, un autor tardío máis cunha obra que foi ponte para unir o Rexurdimento Galego coas vangardas.

Onte inaugurouse a exposición Europa foi camiño. A peregrinación a Santiago na Idade Media, que se poderá ver ata o 21 de marzo de 2010 nunha carpa instalada nos Xardíns de Méndez Núñez.

A mostra pretende mostrar ao visitante, a través de seis ámbitos diferenciados, a orixe do Camiño de Santiago, a súa construción, a vida cotiá durante a peregrinación e as infraestruturas que deron forma á principal vía de peregrinación da Europa medieval.

Europa foi camiño propón un itinerario que evoca o propio Camiño de Santiago coa vontade de que o espectador se converta en peregrino e visite algunhas dos seus principais paradas a partir da recreación de diferentes ambientes mediante escenografías: o mercado, os talleres de artesanía, os scriptoria, un hospital coa súa botica ou o interior da catedral románica de Santiago durante a Idade Media.

A mostra A peregrinación a Santiago na Idade Media foi dirixida por José Manuel García Iglesias, catedrático de Historia da Arte da Universidade de Santiago de Compostela e comisario xeral das exposicións do Xacobeo 2004. O comisario da mostra é o profesor titular de Historia da Arte da Universidade de Santiago de Compostela, Juan Manuel Monterroso Montero.

A entrada é de balde.

Dende hoxe e ata o 4 de abril poderase visitar no Kiosco Alfonso a exposición Mulleres, espello de culturas, unha mostra etnográfica sobre o universo feminino a través de 135 obxectos de todo o mundo organizada polo Concello da Coruña e a Fundación "La Caixa". Esta exposición traza un percorrido a través dunha selección de atractivas pezas, cedidas polo Museo Etnolóxico de Múnich, que adquiren nova vida como testemuños das mulleres que un día foron as súas usuarias. Cada unha das 135 pezas que compoñen a mostra é un fragmento de vida, aparentemente exótico e afastado, pero que permite abordar temas universais e compartidos por todas as mulleres do mundo.