Presentación do libro-catálogo “Lois Pereiro: Quen corta os fíos do soño?“, onde se recollen os traballos que fixeron parte da exposición do mesmo nome. Participan: Manuel Rivas, Xosé Manuel Pereiro, Silvia Longueira e Antón Patiño.

Exposición fotográfica e informativa de Implicadas no Desenvolvemento sobre a tsunami (catástrofe ocurrida o 26 de decembro de 2004 no sueste asiático, concretamente na rexión de Tamil Nadu e onde Implicadas xa estaba traballando xunto coa súa contraparte da India, PDI). Esta exposición responde ao título “O son das buguinas”, e conta con fotos de Paco Vila Barros, ilustracións de Xulia Barros e textos de María Reimóndez.

Exposición conmemorativa do 50º aniversario da Sociedade Filatélica da Coruña, nunha homenaxe ao relevante labor cultural que realiza, mostrando as importantes coleccións dos seus socios e amigos. Participarán un total de 15 coleccións, e contará tamén con catro vitrinas contendo medallas e trofeos obtidos pola Sociedade ao longo destes 50 anos, así como libros e publicacións, diplomas e selos personalizados.

Dentro do Outono fotográfico 2011, exposición “BLOkEO/reSistencia“, de Maribel Longueira. O pobo cubano segue a enfrontarse a un bloqueo económico sen precedentes no tempo, isto creou unha forte resistencia por unha situación inxusta ditada polos poderes económicos reinantes, contribuíndo así a unha reafirmación dos seus ideais pero a largueza no tempo tamén pode activar o búmerang do blocage read.

Na Coruña cativa e afastada de comezos do século pasado, dominada aínda pola Torre, dúas mulleres decidiran casar. Había formas máis convenientes, máis discretas de levar unha relación así, fóra dos focos. Mais elas casaron como se fose posible, como se fosen home e muller, como se fosen dúas persoas libres e namoradas. Elisa e Marcela foron Mario e Marcela ante o altar e ante a cámara do estudo de Sellier, o fotógrafo. Acabaron descubertas e a noticia alimentaría durante meses a curiosidade maliciosa da prensa en Galicia, España e Portugal. “Matrimonio sen home”, escribían. Eran a muller barbuda, era un espectáculo de feira, motivo para disquisicións morbosas sobre as patoloxías sexuais e as neuroses femininas. Quixeron fuxir, mais todo era cada vez máis difícil. Maletas desfeitas na Coruña, en Porto, en Bos Aires, en México… Normal trae de volta a Marcela e Elisa, antigas estudantes da Normal. Dámoslle tamén a volta á súa historia: unha historia tráxica de amor e de fuxida. Acaso, unha simple historia de amor. A inauguración terá lugar o martes 22 de novembro ás 20:00 horas.

- Ciclo de Cine: Marcela e Elisa. (Á Volta D)O Lesbianismo No Cinema. Como parte desta exposición, preséntase un ciclo sobre o lesbianismo no cinema que, desde unha perspectiva poliédrica, pretende abranguer unha ampla variedade de enfoques sobre o tema, partindo da premisa da calidade artística dos filmes, que en ningún caso son simplemente un medio para vehicular un discurso reivindicativo, senón textos esteticamente complexos e ricos. Proxectaranse a partir das 20:00 horas, con entrada libre até completar capacidade, co seguinte programa:
- Xoves 24 de novembro. “A calumnia”, de William Wyler, 1961.
- Xoves 1 de decembro: “As margaridas”, de Vera Chitylová, 1966.
- Xoves 15 de decembro: “As amargas bágoas de Petra von Kant”, de Rainer Werner Fassbinder, 1972.
- Xoves 12 de xaneiro: “Paixón”, de Yasuzo Masumura, 1964.
- Xoves 19 de xaneiro: Sesión de curtametraxes: “Meshes of the Afternoon”, de Maya Deren, 1943; “Two Women”, de Man Ray, sen data; e “Inauguration of the Pleasure Dome”, de Kenneth Anger, 1954-56.
- Xoves 26 de xaneiro: “Go fish”, de Rose Troche, 1994.

“Codo manchado de azul turquesa” permítelle a Teo Soriano (Mérida, 1963) presentarse na cidade onde reside coa exposición máis ampla das que ten realizado. Profundo investigador da pintura, dos seus límites e as súas posibilidades, a súa obra converteuno nun dos nosos máis interesantes, sólidos e innovadores creadores. A inauguración oficial da exposición terá lugar o venres 18 de novembro ás 20:00 horas.

A exposición individual de Álvaro Negro (Lalín, 1973), “Natureza! Estás soa?”, supón o último paso na obra dun artista que evoluiu desde un desenvolvemento conceptual da pintura abstracta até investigacións noutros medios como a fotografía, xirando arredor do seu proxecto “Monteagudo”, un traballo iniciado hai tres anos e que supón unha reflexión sobre o conxunto escultórico que o alemán Ulrich Rückriem realizou na terra natal do artista lalinense.

Dentro do Outono fotográfico 2011, exposición “Fotos da xente“, coa obra fotográfica de Ramón J. Iribarnegaray, Begoña Pastoriza, Eduardo Castro Bal e Luís Ramírez. A xente pódese retratar na rúa, no estudo de fotografía ou de moitos xeitos. Cada un dos fotógrafos que aquí mostran as súas fotos ten unha visión particular da xente diante da cámara. Polo noso plató pasan continuamente persoas dispostas a ser “inmortalizadas” baixo os nosos flashes, pero non todos resultan “flasheados”. A inauguración terá lugar o venres 11 ás 20:00 horas.

“Atapuerca, Arco da Vella da evolución humana” é unha selección de 19 acuarelas do pintor Fernando Fueyo nas que están presentes de forma recorrente os lugares, os achados, a actividade humana e os animais e plantas que conviven coas escavacións arqueolóxicas dos xacementos da Serra de Atapuerca.

Do mércores 9 ao venres 30 de decembro

Dentro do Outono fotográfico 2011, exposición “Le monde habité”, coa fotografía de Gustavo García Roig e a poesía de François Davo. A inauguración terá lugar o mércores 9 de novembro, ás 20:00 horas, e, dentro dela, terá lugar un recital poético do propio autor.