14325 foron as visitas que acadou en xaneiro o blog de información cultural da cidade, superando en catro mil as obtidas no mes de decembro. Máis de catorce mil visitas que consultaron en total case setenta e catro mil páxinas, unha media de 2400 por día, cifra que mellora nun 15% os datos de decembro.

O progresivo aumento de lectores do blog ten paralelismo co éxito da nosa conta en Facebook, que a finais de 2009 chegou ao máximo de amigos que permite ter o sistema, cinco mil. Foi por iso que abrimos este novo espazo en Facebook, que é onde agora deixamos mensaxes coas últimas novidades da cultura na Coruña. Máis de 1300 persoas fixéronse "seareiras" da nosa páxina en apenas un mes. Dúas razóns, o blog e Facebook, para sentírmonos ben satisfeitos. Grazas a todas e a todos polo voso apoio!

Hai uns días foron presentadas polas Concelleiras de Cultura e Mocidade as novas salas de ensaio e concerto do Coliseum, que estarán funcionando a pleno rendemento a mediados de marzo.

As salas de ensaio representan unha mostra de apoio aos grupos xuvenís da cidade, que desde agora disporán de tres salas de ensaio e unha de control e gravación para dar a coñecer os seus traballos e realizar os seus ensaios. Actualmente a Concellaría de Mocidade está no proceso de contratación do acondicionamento acústico das salas (9.000 euros), o backline no que se inclúen mesa de mestura, baterías, amplificadores para guitarra e baixo e teclados (12.000 euros), un sistema de vídeo (6.000 euros) e o equipamento da sala de control (35.000 euros). O prazo de solicitude para os grupos xuvenís (compostos maioritariamente por menores de 30 anos) está aberto ata o 31 de marzo; pódese descargar a folla de inscripción a través da páxina web do Novo Espazo Xuvenil do Centro Municipal de Información Xuvenil. As novas salas de ensaio darán cabida a un total de 40 grupos polo que de superarse esta cifra procederase ao sorteo, tal e como se recolle no Regulamento que foi consensuado co sector, tanto para a entrada de grupos como para establecer os horarios. Este sorteo será semestral para permitir que disfruten destas salas o máximo posible de grupos da cidade.

A Concellaría de Cultura presentou pola súa banda a nova sala de concertos do Coliseum: "O Túnel", con capacidade para algo máis de 600 persoas e que permitirá traer a cidade unha serie de propostas que ata o momento non tiñán cabida pola falta dun espazo axeitado. O nome O túnel fai referencia tanto á súa forma e ubicación dentro do Coliseum como á súa vontade de dar resposta a un nicho de mercado existente na cidade nunha aposta pola música urbana sen limitacións en canto a estilos musicais.

Froito dun investimento de máis de medio millón de euros, esta nova sala de concertos conta cun espazo de 300 metros cadrados e funcionará en conexión e coordinación coas salas de ensaio contando ademáis con programación cultural propia. Deste xeito non só permitirá descubrir aos grupos con máis futuro da cidade, senón tamén axudar os máis novos a darse a coñecer funcionando como unha factoría de creación. Así esta sala de concertos acollerá as propostas máis vangardistas con estilos moi variados: indie, música electrónica, rap, rock ou pop independente...

Asimesmo permitirá traer á Coruña propostas artísticas que á iniciativa privada non lle sexan rendibles introducindo O túnel nos circuitos estatais. O obxectivo do seu departamento é que esta nova sala de concertos teña programación propia desde finais de abril e animou a todos os axentes e promotores da cidade a poñerse en contacto coa Concellaría para poder disfrutar desta nova sala. María Xosé Bravo incidiu no feito de que esta sala traballará tamén baixo outras marcas xa consolidadas e para iso están a manterse contactos co sector, caso dos organizadores do Festival Sinsal. Os obxetivos a medio prazo pasan por situar nun par de anos O túnel dentro do panorama estatal como un referente neste tipo de concertos e cuns prezos razoables.

Achegarte foi para os lectores de Fervenzas Literarias a mellor iniciativa literaria de 2009. O ciclo de recitais Poetas di(n)versos ocupou ademais a quinta praza nesa mesma votación. Moitas grazas a todas as persoas que nos apoiaron antes, durante e despois da celebración da gran feira da cultura que facemos.

A Concelleira de Cultura María Xosé Bravo presentou esta mañá o Espazo Cultura Coruña, un directorio participativo e xeolocalizado de todos os espazos e eventos de índole cultural presentes na cidade e dispoñible a través de Internet e integrada na web A Coruña Cultura. Os datos están categorizados en diversas temáticas que fan máis sinxela a procura e o filtrado da información nas listaxes e no mapa: arte e exposicións, cinema, museos, música e danza, obradoiros e conceferencias, patrimonio cultural e asociacións culturais, entre outras categorías presentes nesta web.

A primeira gran novidade deste directorio é a xeo-referenciación dos espazos e actividades culturais. Fronte a unha tradicional listaxe, esta característica aporta moito máis que a simple localización do espazo ou evento nas rúas da cidade. Dunha simple ollada, o mapa apórtanos unha visión global do panorama cultural coruñés. Os cidadáns poden así percatarse da gran cantidade de recursos culturais que teñen no seu entorno, cómo se distribúen estes espazos polos barrios da cidade ou que categoría de recursos está máis presente nunha zona concreta.

Sobor dos eventos culturáis, dunha simple ollada tamén podemos saber que estará a acontecer na cidade na próxima semana ou nun día concreto, e así rápidamente, respostarnos preguntas como... que actividades culturáis podo desfrutar no meu barrio na próxima semana? Onde poderei escoitar música en vivo nesta fin de semana? Cando teremos o próximo espectáculo de teatro no Teatro Rosalía Castro?

Unha ferramenta de divulgación

É moi habitual que un cidadán descoñeza que, a carón do seu barrio, existan diversas asociación culturais, salas de exposicións ou locais onde se pode escoitar música en vivo. Tamén, por exemplo, se descoñece a existencia de importantes museos ou elementos de patrimonio cultural afastados do casco histórico da cidade. Os mapas incitan a ser explorados e a descubrir cousas novas... un punto marcado sobre o mapa no noso barrio ou noutro lugar non esperado, chama a atención do cidadán e incita a ser estudado cun simple clic do rato.

Aberto á participación

Outra gran novidade é a participación. Sen ter coñecementos técnicos, en calquera momento e dende calquera lugar, calquera persoa responsable dunha organización de índole cultural da cidade poderá engadir ou manter actualizada a información deste directorio. Non haberá pois que agardar por unha nova edición trimestral ou anual dunha guía de recursos. A información pode estar ao día no mesmo momento grazas á colaboración da cidadanía e a Internet.

Para iso, o Concello de A Coruña organizará unha sesión formativa para tódalas entidades culturais interesadas en utilizar este sistema para darse a coñecer e para informar sobor das súas actividades. Esta sesión terá lugar o vindeiro xoves 17 de decembro ás 19.00 horas no Kiosco Alfonso.

Desde hoxe podes manterte ao día das actividades culturais da cidade no noso espazo en Twitter.

Recordamos aos nosos lectores que na sección de descargas deste blog estamos subindo arquivos moi diversos para o seu uso libre por parte de todas as persoas que estean interesadas neles: catálogos de exposicións (SOBRE O ESPAZO INFINITO. A creación ao redor do mar, catálogo de Outonarte 2008; Quen puidera convosco voar, homenaxe dos artistas plásticos a Manuel Curros Enríquez e Broken chair, do not seat, exposición de Amador Iravedra), unidades didácticas, os mapas do ceo de cada mes (tomados da Guía do Ceo 2009, editada para celebrar o Ano Internacional da Astronomía), así coma os cartaces e dossieres dalgúns ciclos de actividades especialmente significativos. A zona de descargas irase actualizando constantemente con novos contidos.

A primeira edición da Mostra de Ciencia e Cinema organizada pola Asociación de Amigos da Casa das Ciencias tivo o privilexio de presentar en Galicia o último traballo de Werner Herzog, Encounters at the end of the world. Onte xoves soubemos que Encounters at the end of the world é un dos cinco finalistas aos Oscars na categoría de mellor longametraxe documental, xunto a Man on wire, Trouble the water, The Betrayal-Nerakhoon e The Garden. A cerimonia de entrega dos Premios da Academia terá lugar o domingo 22 de febreiro.

A proxección do documental de Werner Herzog celebrouse o sábado 25 de outubro de 2008 na Sala Leonardo da Vinci da Domus, poucos días despois da súa estrea absoluta en España limitada ás cidades de Madrid e Barcelona. O director alemán está considerado un dos cineastas vivos máis importantes e a Mostra quixo darlle un especial protagonismo á súa obra incluíndo dentro da programación outro filme seu máis, The wild blue yonder, premiado no Festival de Venecia e inédito en España.

A Mostra de Ciencia e Cinema contou co patrocinio da Dirección Xeral de Investigación, Desenvolvemento e Innovación da Consellería de Innovación e Industria, da Concellaría de Cultura do Concello da Coruña e dos Museos Científicos Coruñeses. O proxecto tivo ademais o apoio da Axencia Audiovisual Galega e do Centro Galego de Artes da Imaxe. A Asociación de Amigos da Casa das Ciencias traballa xa na preparación da II Mostra de Ciencia e Cinema.

Desde o 1 de xaneiro de 2009 as rodaxes cinematográficas e televisivas na cidade da Coruña quedarán exentas de taxas, despois de que fose aceptada a proposta da Concellaría de Cultura que dirixe María Xosé Bravo para modificar a ordenanza fiscal 39, reguladora das ocupacións de terreos de uso público, como son os espazos urbanos de rúas, prazas, parques e edificios municipais. A decisión afecta a calquera rodaxe de películas de ficción, documentais e curtametraxes en calquera tipo de formato, agás as producións de carácter publicitario. De todos os xeitos os interesados deberán obter a autorización e aboar, se é o caso, os gastos ocasionados polos danos e estragos que se puideran producir.