Unha proposta sen precedentes, aberta á cidadanía para achegarse de forma práctica á experiencia acústica do mar da Coruña.

OUTONARTE brinda aos cidadáns e cidadás da Coruña a oportunidade de agudizar o seu sentido do oído. Unha das actividades paralelas da Mostra de arte contemporánea que se está a desenvolver na cidade é o obradoiro sonoro a cargo do colectivo galego Escoitar.org. A experiencia terá lugar este fin de semana na sala de exposicións de Palexco. A cita é mañá e pasado, sábado 20 e domingo 21, a partir das 11 horas. Calquera persoa interesada no son e a escoita pode participar nesta actividade.

A primeira parte do seminario será o sábado. De forma amena e sinxela, os participantes terán a oportunidade de achegarse a temas relacionados coa escoita e o son. Abordaranse asuntos coma, por exemplo, a hexemonía do ollo fronte ao oído, a inmaterialidade do son, a fisioloxía do oído e a imaxe e o son como produtores de cultura.

O día seguinte, domingo, terá lugar unha sesión práctica: un paseo sonoro pola beira do mar. Na andaina rexistraranse os sons con sistemas de gravación propios da fonografía. O seminario rematará cunha escoita e discusión dos resultados desa gravación acústica do mar da Coruña.

“A CREACIÓN HOXE. RETOS E OPORTUNIDADES”

Diálogo aberto entre creadores, críticos, galeristas, escritores e os distintos axentes relacionados coa arte. Momentos para a reflexión, intercambio de experiencias e posta en común de cuestións relacionadas co presente e o futuro das artes plásticas.

Intervirán:

• Joaquín Lens, crítico de artes plásticas de La Voz de Galicia
Mar Caldas, creadora plástica

Neves Seara, creadora plástica

Jaime Oíza, responsable das salas de exposición do Concello

Miriam Pérez, da galería Ana Vilaseco

Coordina: Xulio López Valcárcel

Lugar: Sala Municipal de Exposicións Palexco

Hora: 19:30

Unha achega ás diferentes linguaxes da arte que se están a facer en Galicia.

Ambientadas con motivos mariños, a Infantil e Xuvenil e mais a de Estudos Locais da casa da Cultura Salvador de Madariaga ofrecen aos cativos participar nun xogo con Lugrís de protagonista e mesmo facer un libro en común

AS BIBLIOTECAS MUNICIPAIS DE DURÁN LORIGA SÚMANSE A OUTONARTE E PROGRAMAN ACTIVIDADES INFANTÍS E XUVENÍS AO REDOR DO TEMA DO MAR

Ademais de pór a disposición dos pequenos unha selección específica de publicacións relacionadas co océano, abre as súas portas aos centros escolares interesados en participar

A Coruña, luns 15 de setembro de 2008.- A volta ao cole motivou á Concellería de Cultura a programar actividades específicas para rapaces relacionadas coa Mostra de Arte Contemporánea que se está a celebrar durante todo o mes de setembro na Coruña. Así, as bibliotecas municipais Infantil e Xuvenil e mais a de Estudos Locais “Salvador de Madariaga” (cuxa sala de exposicións é unha das tres nas que se exhibe OUTONARTE: Sobre o espazo infinito. A creación ao redor do mar) súmanse ao salón e ofrecen aos pequenos unha ampla proposta de xogos, contacontos e cousas divertidas que facer co mar como fío condutor.

De entrada, ambas as dúas bibliotecas da casa Salvador de Madariaga mudaron o seu aspecto: ambientadas con motivos mariños, propóñenlle aos nenos e nenas da cidade mergullarse no fondo do océano e afondar nos seus coñecementos sobre o mar que nos arrodea e define. Así, unha coidada selección bibliográfica ofrécelles saber máis sobre todo o relacionado cos océanos e os seus poboadores.

As municipais da rúa de Durán Loriga tamén programaron xornadas de contacontos e xogos, en concreto, un coa obra de Urbano Lugrís como motivo principal. Os cativos poderán ademais deixar a súa pegada nun libro que, cun poema de Manuel María como eixo e base, farase coas súas achegas. Mediante versos e debuxos de seu, os raparigos e raparigas completarán o volume, que será logo incorporado a OUTONARTE.

Os centros escolares están asemade invitados a participar. As bibliotecas da casa da Cultura Salvador de Madariaga xa contan con encher o seu espazo de creación e lectura ao redor do mar cos nenos do Eusebio da Garda o vindeiro día 23.

Mañá domingo farase o segundo percorrido, que tenta facilitarlles aos cidadáns un coñecemento de primeira man dos conceptos e intencións dos autores presentes na Mostra

A Coruña, sábado 13 de setembro de 2008.- OUTONARTE oferta maña domingo, día 14 de setembro, a segunda das visitas guiadas polas distintas salas de exposicións que acollen a Mostra de arte contemporánea promovida pola Concellaría de Cultura do Concello da Coruña e que amosa as propostas de trinta e un artistas galegos novos.
O percorrido comezará as 12 horas pola sala de exposicións do Palacio Municipal de María Pita. Tres cuartos de hora máis tarde, ás 12.45 horas, a cita é en Palexco. A visita guiada rematará cun repaso polas obras que se exhiben en Salvador de Madariaga (13.30 horas, rúa de Durán Loriga).

O obxectivo destes percorridos guiados polas tres salas que acollen as propostas artísticas de OUTONARTE é facilitar ao público cidadán o seu achegamento aos conceptos que os artistas queren expresar coas súas obras. Os promotores da Mostra aspiran a que os participantes destas visitas coñezan de primeira man as propostas da arte emerxente actual que realizan os artistas galegos máis novos. Tal é, en definitiva, a finalidade de OUTONARTE: ser o escaparate anual da creación plástica actual en Galicia e favorecer a visibilidade e proxección dos novos valores.

O salón coruñés reúne máis de sesenta propostas –entre pintura, fotografía, debuxo, vídeo, escultura e instalacións- de trinta e un artistas galegos, tanto en salas como en varios espazos públicos ao aire libre da cidade. Nesta primeira edición do salón coruñés todas as obras exhibidas teñen como protagonista e fío condutor ao mar.

Mañá, sábado, ás 18 horas, haberá unha audición do instrumento musical Aquófono no Aquarium (Casa dos Peixes) a cargo dos seus inventores, os percusionistas de Parto

MARÍA XOSÉ BRAVO: “AS VISITAS GUIADAS SON UN PODEROSO INSTRUMENTO DIVULGATIVO DE EDUCACIÓN ESTÉTICA E APOIO Á ARTE”

A Coruña, venres 12 de setembro de 2008.- Todos os interesados en ver e entender as obras das vangardas artísticas en Galicia teñen unha cita esta fin de semana con OUTONARTE: Sobre o espazo infinito. A creación ao redor do mar. A Mostra de arte contemporánea da Coruña inicia mañá sábado, día 13, a quenda de visitas guiadas polas tres salas que acollen as propostas dos 31 artistas que participan nesta iniciativa, auspiciada pola Concellaría de Cultura. “Un poderoso instrumento divulgativo de educación estética, de apoio á arte”, en palabras da concelleira María Xosé Bravo.

“É un mito e unha falsidade que a arte non se entende. O que temos é que aplicar as mesmas ferramentas e os mesmos esforzos que para outros sectores culturais”, di María Xosé Bravo, quen explica o reto que se fixou á hora de organizar esta primeira mostra de arte contemporánea da Coruña: “Ser capaces de crear, ou incrementar, o hábito continuado de consumo; de goce de arte”.

OUTONARTE, que está pensada como unha exposición temporal de gran impacto público, pretende ser capaz de normalizar socialmente a existencia da arte máis contemporánea; a máis innovadora e experimental. “Sobre o espazo infinito ten como obxectivo que o público se abra á creación actual, polo que, nese sentido, as visitas guiadas xogan un importante labor de axitación e animación”, di a concelleira. As visitas guiadas que dan comezo mañá son, daquela, visitas pensadas como goce do tempo de lecer pero tamén como aprendizaxe. Foron pensadas como unha ferramenta de difusión buscando ampliar públicos para as artes plásticas, mais tamén han ser un poderoso instrumento para a promoción da arte. “Queremos que a visita se converta na mellor tarxeta de presentación dos artistas plásticos máis novos”, conclúe María Xosé Bravo.

As visitas guiadas comezarán este sábado ás 18 horas na sala de exposicións do Palacio Municipal de María Pita. Tres cuartos de hora máis tarde, ás 18.45, en Palexco. O percorrido guiado rematará cun repaso polas obras que se exhiben na sala Salvador de Madariaga, na rúa de Durán Loriga. A iniciativa repetirase de novo este domingo, día 14 de setembro, a partir do mediodía (12 horas, sala de María Pita; 12,45 horas, Palexco; 13,30 horas, Durán Loriga).

• Sábados 13, 20 e 27 de setembro

18 h – Pazo Municipal de María Pita

18.45 h – Palexco

19.30 h – Salvador de Madariaga

• Domingos 14, 21 e 28 de setembro

12 h – Pazo Municipal de María Pita

12.45 h – Palexco

13.30 h – Salvador de Madariaga

Reflexionará sobre as coordenadas que rexen o seu traballo e dará a coñecer exemplares únicos dos seus libros de artista, describindo o seu proceso de creación.

O poeta e artista plástico Baldo Ramos (Celanova, 1971), será o encargado de inaugurar mañá xoves, día 11, as charlas e mesas redondas que integran o programa de actividades paralelas de OUTONARTE: Sobre o espazo infinito. A creación ao redor do mar, a Mostra de arte contemporánea que promove a Concellaría de Cultura do Concello da Coruña. Será na sala Palexco, ás 19,30 horas.

Baldo Ramos falará dos seus libros de artista e do diálogo que establece hai anos entre a plástica e a poesía; entre as palabras e as imaxes. Reflexionará sobre as coordenadas que rexen o seu traballo e dará a coñecer algúns exemplares únicos dos seus libros de artista, describindo o seu proceso de creación e analizando a finalidade para a que nacen.

A obra de Ramos esculca nos espazos que comparten a poesía e a pintura, como amosan, entre outros, “Raíz de voo”, “Ut pictura poesis” ou “A ferida de comprender”. Os máis recentes libros de artista de Baldo Ramos son “Homenaxe a Valente”, “Na fronteira do dicir”, “Luz primeira” e “Aldara”, todos de 2008.

Licenciado en Filoloxía Hispánica pola Universidade de Santiago de Compostela, na actualidade traballa como profesor de Lingua e Literatura Española. Ten publicados numerosos libros de poesía, dende “Raizames”, en 2001, ata os más recentes “Branco sobre negro” (2006); “Monólogo do calígrafo” (2007) e “Palimpsesto” (2008),
Recibiu tamén moitos premios, como os Arcipreste de Hita, Concello de Carral, Rosalía de Castro e mais o Celso Emilio Ferreiro, por citar algúns. Recentemente acadou un accésit do IV Certamen de Poesía Iberoamericana Víctor Jara.

Xa sobre a súa obra pictórica, Baldo Ramos expón con regularidade e mesmo ilustra libros, revistas e plaquettes.

A Mostra promovida pola Concellaría de Cultura do Concello e comisariada por Chus Martínez Domínguez, idease como unha fórmula que engloba todos os procedementos de exhibición. A selección dos trinta e un creadores e creadoras desta primeira edición de OUTONARTE atende a “unha deliberada vontade” de explorar as múltiples posibilidades das linguaxes artísticas e mesmo ofrecerlles aos múltiples rexistros e tendencias que conflúen na arte galega máis vangardista novos dispositivos expresivos.

“OUTONARTE: Sobre o espazo infinito. A creación ao redor do mar” encherá A Coruña, do 6 ao 28 de setembro, de arte, música, obradoiros e creatividade de primeira orde

O mar coma sinal de identidade galega, unha realidade que serve de elemento aglutinador, o “espazo infinito” arredor do cal xira a máis puxante arte contemporánea do país. Esta é unha iniciativa cultural orientada a apoiar e mesmo fortalecer a visibilidade e sobre todo a proxección da arte galega do noso tempo.

Descargar programación