Martes 29
Fundación Paideia Galiza (Praza de María Pita, 17)
20:00
Entrada libre até completar capacidade.

Fernando Díaz-Castroverde recollerá o Premio Repsol 2011, outorgado pola súa obra "Microbios e outros paquidermos", publicada recentemente por Galaxia.

Xoves 24
Teatro Rosalía de Castro
20:30
Entrada libre até completar capacidade.

A Asociación Cultural Alexandre Bóveda organiza o XV Memorial de teatro Ibán Toxeiro, que contará coas seguintes actuacións:
- Grupo de teatro da A. C. Alexandre Bóveda coa representación de "Vida, paixón e morte de Alexandre Bóveda", de Xoán Carlos Mexuto.
- Bucanero Teatro con "Kungfundidos".
- Druída danza con "O anxo exterminador".
- Entrega do IV premio "Alexandre Bóveda de teatro amador Ibán Toxeiro" para o Grupo de teatro do Centro de maiores da Obra social de Novacaixagalicia.
- Todo aderezado coa música en directo de Canta compaña.

Mércores 29
Centro Social Novacaixagalicia (Avenida da Mariña, s/n.)
20:00
Entrada libre até completar capacidade.

Acto de entrega do IX "Premio de Poesía Novacaixagalicia" a Emma Pedreira, tras o que a autora recitará poemas do libro premiado Antítese da ruína.

Sábado 11
Domus (Rúa Santa Teresa, 1)
A partir das 11:00

Alumnos de cinco equipos de Xinzo de Limia, Ourense, Guntín, Santiago de Compostela e Cambre defenderán os seus traballos na final do XIII "Premio Luis Freire de Investigación Científica para Escolares". Durante o acto, no que se contará coa presenza de familiares e compañeiros de estudos dos participantes, os estudantes deberán expor e defender os seus traballos ante o Xurado.
Estas son as preguntas finalistas e que competirán polo primeiro premio:
- Cales son as mellores condicións para hidratar legumes? Presentado por Laura Domelo Borrajo, Alvaro Dopozo Feijoo e María González Sotelo, do IES Lagoa de Antela de Xinzo de Limia.
- Pódese empregar auga dos deshumidificadores nas baterías eléctricas? Presentado por Diego Dorribo Dacuña , Julián Fernández González, Adrián Gómez Blanco e Brais Sandín Fernández, do IES Universidade Laboral de Ourense.
- Pódese ver medrar a herba? Presentado por Adrián Balsa García, Sofía Díaz Varela, Lucas Lombardía García e Laura López López, do CPI Tino Grandío de Guntín.
- Os nosos carballos sobrevivirán á chuvia ácida? Presentado por Esperanza Alvarez Vilas, Brenda Hermida Varela, Rosana Martins Cotón e Noemí Pena Vidal, do IES de Sar de Santiago de Compostela.
- Pódese recuperar completamente, con calor, unha pelota de tenis de mesa abolada? Presentado por Damián Moar Botana e David Viñas Barciela, do IES David Buján de Cambre.

Convocado polos Museos Científicos Coruñeses, El Corte Inglés e a Asociación de Amigos de la Casa de las Ciencias trátase dun premio de investigación dirixido aos estudantes de secundaria en Galicia que busca fomentar o interese pola ciencia e a formación en actitudes científicas. Tras a exposición dos traballos o Xurado retirarase a deliberar e emitirá o fallo, o que terá lugar sobre as 13:00 horas do mesmo sábado 11 de xuño, para continuar coa entrega dos premios, patrocinados por El Corte Inglés. Os gañadores recibirán como premio unha viaxe a Valladolid para realizar unha visita ao seu Museo da Ciencia. Tamén haberá premios para os demais finalistas. Ademáis, os Museos Científicos Coruñeses farán entrega a todos os finalistas dunha guía didáctica da exposición "Eureka!", sobre ciencia e creatividade, que se exhibe na Domus. Trátase dun material que acaba de ser publicado e que inclúe infomación e actividades relacionadas cos temas tratados na mostra.

Luns 30
Biblioteca Municipal dos Rosales (Praza Elíptica, 1)
19:00
Entrada libre até completar capacidade.

Con motivo da entrega de premios do "Concurso de contos do Barrio dos Rosales", terá lugar un programa de actos composto por unha pequena presentación, a actuación musical dos rapaces da Escola de Música e, posteriormente, a entrega de premios.

Sábado 21
Xardíns de Méndez Núñez (diante do monumento a Curros Henríquez)
12:30
Acceso libre.

Ofrenda floral da A. C. O Facho, durante a cal o seu presidente dará a coñecer os gañadores dos "Concurso de Contos de nenos para nenos Carlos Casares" e o "Concurso de Teatro Infantil". Na cerimonia haberá musica de gaiteiros.

O mesmo sábado, 21 de maio, ás 20:00 horas, na sala de conferencias do Centro Social Nova Caixa Galicia (Avenida da Mariña, s/n.) efectuarase a entrega dos premios.

CONCURSO LITERARIO DE CONTOS DE NENOS PARA NENOS CARLOS CASARES:

"A Agrupaçom Cultural O Facho tem a honra de comunicar-lhes o falho do concurso literário Contos de nenos para nenos Carlos Casares na convocatória ano 2011, segundo acordo do jurado formado polos escritores Xabier P. DoCampo, Breogán Riveiro Vázquez, Xosé Manuel Martínez Oca, e Soledad González Maside, directiva d'O Facho (sem voto):

1º.- Prémios da categoria A (Nenos e nenas de 9 a 12 anos):
- Primeiro prémio: Pesadelo, de Ignacio Mañá Mesas, aluno do IES Europa (Ponferrada, O Berzo).
- Segundo prémio: Un día feliz na vida de Xoán de Alva Pensado Ferreiro, aluna do CEIP San Xosé Obreiro (Meicende, A Corunha).

2º.- Prémios da categoria B. (Rapaces e rapazas de 13 a 16 anos):
- Primeiro prémio: Folga xeral, de Matías Núñez Gil, aluno do IES Celanova (Ourense).
- Segundo prémio: Amor e maltrato, de Ana María Gil Rey, aluna do C.P.I. de Zás (A Corunha).

Agradecemos a participaçom de todos os concursantes e felicitamos mui especialmente aos ganhadores. Também queremos recordar que o acto de entrega de diplomas e prémios será o dia 21 de Maio as 20 horas, na sala de conferencias do Centro Social Nova Caixa Galicia (Avenida da Marinha, s/n.) da cidade da Corunha.

Parabéns e cumprimentos.

A Corunha, Maio de 2011.

Assinado: Soledade González Maside, da Agrupaçom O Facho e Secretária do Júri."

CONCURSO DE TEATRO INFANTIL:

"Depois de ter lido as obras apresentadas ao Concurso de Teatro Infantil convocado pola Agrupaçom Cultural O Facho, o júri conformado por pessoas de reconhecido prestigio no âmbito teatral galego, Susana Alejandra Longueira Regueiro, Xosé Manuel Rabón Lamas e Francisco Pillado Maior, tomou o acordo de declará-lo Deserto como resulta da análise dos textos. Os originais nom premiados poderám ser retirados, no prazo de 30 dias, no local de O Facho, prévio correio  dirigido ao endereço postal da Agrupaçom (Rua Federico Tapia, 12-1º, 15005 A Corunha). No caso de que o autor ou autora nom resida na Corunha poderá solicitar que lhe sejam enviados por correio postal.

Na cidade d’A Corunha, 13 de Maio 2011.

Asso. J. Alberte Corral Iglesias
Secretário d'O Facho."

Fallo do xurado do 7º "Concurso fotográfico Xurxo Lobato":
"Reunido o xurado do 7º Concurso fotográfico Xurxo Lobato no IES Monelos, presidido por Xurxo Lobato e formado por Pablo Mella, Xosé Díaz, Tino Fraga e como secretarios do Xurado Ramón Martínez e Blas Rodríguez ,expresa a súa satisfación pola mellora continua da calidade dos traballos presentados e o seu incremento con respecto a edicións anteriores (192 participantes e 500 fotografías) e decidiu otorgar os siguientes premios:

- 1º Premio, pola foto "Noite Azul" de ALEJANDRO TORRECILLA LÓPEZ, do IES Rafael Puga Ramón (A Coruña):

- 2º Premio, pola foto "Pasión" de LEIDY YULANI HOYOS URIBE, do Colexio Marcote (Vigo):

- 3º Premio, pola foto "Disfrázate conmigo esta noche, no notarán la diferencia", de SARA PÉREZ SEIJO do IES Francisco Sánchez (Tui):

* Accésits:
- "Cuento de lágrimas callejeras", de Irene Lopez Carro, do IES Virxe do Mar (Noia).
- "La cima es la mitad del camino", de Sofía Alejandra Izquierdo Ausina, do IES Fernando Wirtz Súarez (A Coruña).
- "Caballos", de Adrián Ferreira Cabado, do IES Rafael Puga Ramón (A Coruña).
- "Destino Galicia", de Sara Marcote Silva, do Colexio Marcote (Vigo).
- "Marina", de Marina Crecente López, do IES Monelos (A Coruña).
- "O mencer da mariña", de José Carlos Lorenzo García, da Escola de Imaxe e Son do Colexio Marcote (Vigo).
- "Caminante hay camino…", de Inés Fernández Borrallo, do IES Monelos (A Coruña).
- "Camino del peregrino", de Gema Ruibal Araújo, do Colexio Marcote (Vigo).
- "Gaivota no ar", de Rubén Liste Pérez do EIS de Lugo, Escola de Imaxe e Son (Lugo).
- "Rain", de Breogán Alamancos Millán, do Xelmírez I (Santiago de Compostela).

* Mencións especiais:

- Ao I.E.S. Monelos de A Coruña pola súa alta e constante participación durante as 7 edicións.
- Ao I.E.S. María Casares de Oleiros pola súa constante participación unida a unha alta calidade das obras presentadas durante as 7 edicións.
- Ao Colexio Marcote de Vigo por ser o centro con maior cantidade de participantes e fotos presentadas na presente edición.

En A Coruña, a 12 de abril de 2011."

Xoves 5
IES Monelos (Rúa Montes, 62)
20:00
Entrada libre até completar capacidade.

Entrega dos premios do "7º Concurso de fotografia Xurxo Lobato", dirixido ao alumnado de Educación Secundaria, Bacherelato e Formación Profesional de Galicia, convocada por Ex Monelos, a Asociación de antigos alumnos do Instituto.

Venres 29
Real Academia Galega (Rúa Tabernas, 11)
20:00
Entrada libre até completar capacidade.

Última conferencia dos "IV Encontros Cidade da Coruña", baixo o lema "Ser Escritor, Ser Escritora", organizados pola Asociación de Escritoras e Escritores en Lingua Galega, co patrocinio da Concellaría de Cultura do Concello da Coruña e a colaboración da Real Academia Galega. Antonio Gamoneda falará sobre "Da natureza e a xeración do pensamento. Linguaxe poética", e a continuación ofrecerá unha lectura poética. A presentación do acto correrá a cargo do presidente da AELG, Cesáreo Sánchez, contando tamén coa presenza do presidente da Real Academia Galega, Xosé Luís Méndez Ferrín, e da Concelleira de Cultura da Coruña, María Xosé Bravo.
Gamoneda recollerá neste acto o galardón "Escritor Galego Universal", concedido pola AELG, que destaca a altísima poesía e o insubornábel compromiso ético do autor, para quen o individuo, e por tanto o poeta, se realiza na poesía como forma de coñecemento.  A obra de Antonio Gamoneda (nado en Oviedo en 1931) esténdese desde o 1960 con "Sublevación inmóvil" até hoxe, marcada por unha fonda pegada ética que gaña forza nun exemplo de coherencia e verdade poética. Premio Cervantes en 2006, reivindícase como pertencente á cultura da pobreza: o sufrimento social penetra na súa conciencia lingüística, conferíndolle unha linguaxe poética e semanticamente subversiva. Combina un poderoso dominio do idioma coa permanente actualidade do seu mundo poético nacida da asunción da propia historia persoal e colectiva. O recoñecemento europeo e americano revélase na tradución da súa obra a distintas linguas. Foi tamén Premio Raíña Sofía de Poesía Iberoamericana en 2006 e Premio Nacional de Literatura na modalidade de Poesía en 1988.

Os Premios "Prismas Casa das Ciencias á Divulgación" son unha iniciativa dos Museos Científicos Coruñeses, Concello da Coruña, que pretende potenciar a difusión da cultura científica en España, e apoiar a todos os profesionais que traballan neste campo.
Nesta convocatoria introduciuse unha importante novidade, como é a reorganización da modalidades a concurso, que avanza na liña de adaptarse ás novas tecnoloxías e formas de comunicación científica. Así, nesta edición concederanse os "Prismas de Bronce" aos mellores traballos de divulgación científica nas modalidades de audiovisuais, artigos xornalísticos, sitios web, dotado cun premio de 4.000 euros para o que se conta coa colaboración da revista Mètode, e "Prisma Especial do Xurado", modalidade dotada pola empresa PharmaMar grupo Zeltia cun premio de 9.000 euros.
Os traballos presentados deberán tratar sobre calquera tema en relación coas ciencias físicas e naturais, tanto nos seus aspectos xerais, como en calquera das súas ramas ou aplicacións prácticas, incluíndo biografías de científicos e historia da ciencia, que contribúan á mellor comprensión das ideas, actitudes e procesos científicos.
O prazo de presentación de traballos finaliza o 31 de agosto.
As bases completas poden descargarse aquí: Bases Premios Prismas Museos Cientificos Coruñeses 2011.

23 ANOS PREMIANDO A DIVULGACIÓN
Os "Prismas Casa das Ciencias" tiveron a súa primeira entrega no 1988, co ánimo de fomentar o exercicio da divulgación científica, así como apoiar e estimular a persoas e colectivos na tarea de crear productos útiles para a educación social da ciencia.
Inicialmente só contemplaba un premio de vídeos científicos, pero en convocatorias posteriores, pasouse en diferentes etapas a engadir outras modalidades: en 1993 foron os libros editados e os textos inéditos,; en 1994 incluíronse os traballos en soporte informático; en 1996 contemplouse por primeira vez a modalidade de artigos xornalísticos; no ano 2000 incorporouse o "Prisma Especial do Xurado", e en 2001 presentouse a modalidade de traballos multimedia, que supuxo unha reorganización das modalidades existentes para recoller nunha todos os soportes audiovisuais, así como os CD-ROM, páxinas WEB ou programas informáticos.
A sucesión de adaptacións aos formatos e tecnoloxías de que se serve a comunicación científica culmina en 2011 coa presentación das catro modalidades que agora se convocan: audiovisuais, artigos xornalísticos, sitios web, e "Prisma Especial do Xurado".
Nas 23 edicións pasadas permiten ofrecer algún datos. Recibíronse máis de 2.500 traballos, predominando as presentacións en multimedia e artigos xornalísticos. En canto á temática dos traballos, a máis frecuente é a zoología, a botánica, a saúde, a astronomía, a física e a química. E no referente aos participantes, un 90% son españois, e máis de 300 traballos son galegos.
A cerimonia de entrega dos Premios celébrase cada ano o sábado máis próximo ao 15 de novembro, festividade de San Alberto Magno, patrón das Ciencias. En 2011, esta reunión de divulgadores na Coruña será 12 de novembro.

Martes 26
Casa Museo Casares Quiroga (Rúa Panadeiras, 12)
20:00
Entrega libre até completar capacidade.

Entrega dos premios do XII "Certame Literario Suárez Ferrín" e conferencia de Xosé Ramón Barreiro sobre "A conflitividade social na Coruña na II República", organizada pola Fundación Instituto de Estudios Políticos y Sociales.

O XXXII Concurso de baile tradicional Xacarandaina que todos os anos ven organizando a Asociación Cultural Xacarandaina terá lugar o domingo día 29 de maio. Este concurso é o certame máis veterano de toda Galicia tendo gran repercusión entre as agrupacións e escolas de música tradicional. Xacarandaina leva 32 anos organizándoo, sendo, este ano, o primeiro en realizarse no Coliseum da Coruña adaptado en formato teatro. Para a Asociación é un novo reto e un novo esforzo tanto económico como organizativo, sendo o principal obxectivo que o acto sexa do agrado de todas e todos: participantes, público e voluntariado. No concurso poden participar Asociacións folclóricas, Centros Parroquiais, Asociacións Culturais e Recreativas, Asociacións Xuvenís etc. chegados de toda Galicia: Vigo, Santiago, Padrón, Arteixo, Ribeira, Betanzos... e mesmo de fora, como os grupos do Centro galego de L´Hospitalet de Llobregat. Todos os grupos participantes deberán cumprir as bases do concurso, onde se indica que os grupos poden ser mixtos, femininos ou masculinos, e estarán formados como mínimo por oito persoas (agás cando as características do baile o precisen). O uso de traxe tradicional é obrigatorio. A categoría determinarase pola media das idades dos compoñentes do grupo e ningún deles superará a media da categoría en máis de dous anos:
- Categoría A: ata 8 anos inclusive.
- Categoría B: de 9 a 12 anos inclusive.
- Categoría C: de 13 a 16 anos inclusive.
- Categoría D: de 17 anos en adiante.
Cada grupo terá un tempo límite de 5 minutos. O grupo que exceda dito tempo, quedará descualificado. Terá que levar o seu acompañamento musical (gaiteiros, pandereteiras...) que deberá estar presente no escenario vestindo o traxe tradicional. O xurado no momento da cualificación terá en conta: autenticidade da peza, dificultade técnica e calidade na execución. En cada unha das categorías serán concedidos tres premios:
- 1º premio: trofeo e 350 euros.
- 2º premio: trofeo e 200 euros.
- 3º premio: trofeo.

O XXII Concurso de Música Tradicional Xacarandaina terá lugar o día 5 de xuño no Teatro Rosalía de Castro, en sesión de mañá e tarde. Este concurso consta con tres modalidades diferentes: pandereteiras, cuartetos de gaita e gaiteiro solista. Esta última modalidade incorpórase como novidade este ano, aínda que cando se creou o Concurso, hai xa 22 anos, era a única modalidade instrumental. A división das categorías realízase do mesmo xeito que no concurso de baile, aínda que varían segundo as modalidades: no apartado de pandereteiras cóntase con catro categorías, no de cuartetos de gaita cóntase con dúas categorías, e no apartado de gaiteiro solista existirá unha única categoría. No concurso poden participar grupos de Asociacións folclóricas, Centros Parroquiais, Asociacións Culturais e Recreativas e Asociacións Xuvenís etc. procedentes de toda Galicia. Todos os grupos participantes deberán cumprir as bases do concurso, onde se indica que é obrigatorio o uso de traxe tradicional. Concederanse tres premios por categoría, que se determinará pola media das idades dos compoñentes do grupo e ningún deles superará a media da categoría en máis de dous anos.
Cada grupo terá un tempo límite de 5 minutos, quedando descualificado o grupo que exceda dito tempo. O xurado no momento da cualificación terá en conta: autenticidade e dificultade da peza, afinación e interpretación e expresividade na interpretación.
En cada unha das categorías serán concedidos tres premios:
- 1º premio: trofeo e 250 euros.
- 2º premio: trofeo e 150 euros.
- 3º premio: trofeo.
O xurado estará composto por persoas de recoñecido prestixio do mundo do folclore, e serán alleos á Asociación Cultural Xacarandaina.

Este ano poderanse realizar as inscricións a través da páxina web de Xacarandaina, ou da mesma forma que en edicións anteriores, enviando debidamente cumprimentada a folla de inscrición adxunta por:
* Correo ordinario ao local social: A.C .Xacarandaina, rúa Historiador Vedía nº3, soto 1º, 15004 A Coruña.
* Correo electrónico:  info at xacarandaina.com
* Exclúese a vía telefónica para realizar as inscricións.
O prazo de inscrición remata o día 12 de maio para o concurso de baile, e o día 19 desde mesmo mes de maio para o de música.

O programa definitivo das actividades audiovisuais do Achegarte 2011 será o seguinte:

* Sábado 2:
* 11:30 - 12:15 h. Programación da Academia Galega do Audiovisual: proxección de curtas de animación finalistas dos Premios Mestre Mateo, "Checkout", de Ficción Producciones e Audiovisual de Servicios Kairos, "Cribba, o vampiro", de Matriuska Producciones e "Gato encerrado", de María Helena Varela Sánchez e Silvina Cornillón.
* 17:00 h. "A escola das areas" de Algarabía Animación e Lúa Films; "A Xaguarana" de Algarabía Animación e Lúa Films; "Alistán, o demo oveiro" de Algarabía Animación e Lúa Films; "O Soldadiño de Chumbo" de Algarabía Animación e Continental Producciones.
* 18:00 h. Curtas de animación de OQO Editora: "Corre corre, cabaciña"; "A princesa do Caurel"; "A bruxa regañadentes"; "Os sete cabritos" e "Un gato na árbore".
* 19:30 h. Entrega de premios e proxeccións "Curtas para Rosalía". AS-PG.

* Domingo 3:
* 12:30 h. Proxección de "Contra a morte". Documental sobre Lois Pereiro. IBCinema.
* 17:00 - 19:00 h. Proxección de curtas de Mr. Misto Films: "Cousiñas", "O castelo da meiga", "A nena que tiña unha soa orella", "Neggy coñece a Sammy", "A flor máis grande do mundo"; "O pintor de ceos".
* 17:30 h. Pase promocional da película "A casa da Luz" (esta última no Teatro Rosalía [con convite]).
* 20:15 - 21:00 h. Presentación do guión de "O divino ferrete". Reverso.

Mércores 23
Teatro Rosalía de Castro
20:30
Entrada libre até completar capacidade.

Nova edición da gran festa do teatro galego, na que se darán a coñecer os gañadores nas trece categorías a concurso, retransmitida pola TVG. Previamente terá lugar un espectáculo de variedades do estraño circo do "Doutor Crisé", converténdose no fío condutor da Gala de entrega dos XV Premios de Teatro "María Casares". A temática escollida para o espectáculo pola Asociación de Actores e Actrices de Galicia (AAAG) consistirá, segundo Carlos Sante, nun espectáculo inspirado nas feiras e circos que percorrían o mundo amosando artistas e monstros da natureza na mesma carpa. Tamén hai referencias a filmes como 'A parada dos Monstros' de Tod Browning ou 'O noviño Frankestein' de Mel Brooks. Ritmo de espectáculo terrorífico… bailarinas zombis, cómicos excéntricos, trapecistas vampiros, cabareteiras siamesas e números sorpresa…". Esta proposta, que partiu de Willy Éter e Carlos Sante, foi a escollida nun concurso de propostas para esta gala, que é a gran festa anual do teatro galego. A dirección conxunta do espectáculo corre a cargo de Carlos Sante e de Juanillo Esteban. A dirección musical será de Gastón Rodríguez; a idea orixinal e guión, de Willy Éter; Suso Montero é o autor da imaxe gráfica da gala así como do deseño da escenografía e vestiario; produción executiva e coordinación xeral de Marta Horjales. Gonçalo Guerreiro (caracterizado como o Doutor Crisé) será o presentador acompañado por Pedro Brandariz (como o seu axudante Casemorro). No elenco tamén haberá bailarinas (Nuria Sotelo e Ángela Blanco), actrices (Sue Moreno, Yolanda Paz, Vanessa Maceiras e Irene Liaño), trapecistas (Girisho Gordon e Raquel Veganzones) acróbatas (Fredi Muiño e Pablo Reboleiro); monologuista (Juanillo Esteban); e clown (Johnny Melville). Os músicos da cerimonia serán: Gastón Rodríguez, Fernando Lamas, Ricardo Marcos Casás e Juan Tinaquero.
Os Premios de Teatro María Casares contan con 13 categorías: mellor maquillaxe, mellor vestiario, mellor iluminación, mellor música orixinal, mellor adaptación- tradución, mellor texto orixinal, mellor escenografía, mellor actriz secundaria, mellor actor secundario, mellor actriz protagonista, mellor actor protagonista, mellor dirección e mellor espectáculo. Este ano 11 espectáculos, dos 37 que se presentaban acadaron algún posto de finalista. A eles hai que sumar o Premio de Honra Marisa Soto, que neste 2011 recae no actor, autor e director Xan Cejudo. Con este galardón, a Asociación de Actores e Actrices de Galicia quere recoñecer a longa traxectoria e a singular contribución de Xan Cejudo á profesionalización do teatro en Galicia. Os XV Premios María Casares contan coa colaboración, entre outros, de AGADIC, Concello da Coruña, Fundacion AISGE, Novacaixagalicia, GADISA , Concello de Ames, Cadena Ser e TVG.
Desde a Concellaría de Cultura animamos a todo a cidadanía a disfrutar do espectáculo e de toda a Gala.