A Coruña Cultura » Sen clasificar

Programa AchegArte

admin — Tue, 24 Nov 2009 17:35:53 +0000

Xa podes consultar toda a programación de AchegArte!

Se queres inscribirte en algún dos obradoiros podes facelo nas Bibliotecas municipais durante esta semana ou na Secretaría de AchegArte no mesmo día do obradoiro.

Vémonos en AchegArte!

O Teatro Rosalía acolle a obra Náufragos

admin — Wed, 16 Sep 2009 09:00:31 +0000

A Concelleira de Cultura, María Xosé Bravo, presentou onte a obra de teatro Náufragos de André Roussin a cargo Teatro Galileo que acollerá o Teatro Rosalía de Castro os vindeiros xoves e venres ás 21.00 horas. Trátase dunha comedia que fala da convivencia humana tal e como destacou a Concelleira durante a presentación.

Un matrimonio de clase alta e o seu amigo común son víctimas dun naufraxio. Afortunadamente conseguen chegar até unha illa aparentemente deserta, onde deben facer fronte a un novo xeito de vida. Naquela illa os personaxes mestúranse entre eles, e os diálogos de dobre sentido funcionan coma un bisturí que vai abrindo a esencia das paixóns humanas. As tres persoas agardan un barco como quen agarda a Godot, máis na espera establécense novos xeitos de relacións sentimentais que cuestionan as relacións humanas contemporáneas. Mais logo intervén un cuarto personaxe que rompe novamente a orde sentimental establecida entre os personaxes. Deste xeito o espectáculo amósanos o míolo das relacións humanas e descúbrenos as raras complicacións destas, nun texto cargado de humor e ironía.

A obra está dirixida por Pedro Rubín e interpretada por Ana Santos, César Cambeiro, Paco Campos e Raúl Varo. As representacións terán lugar o vindeiro xoves 17 e venres 18 de setembro ás 21.00 horas e a entrada será de sete euros.

Concerto de Lila Downs, hoxe na Coruña

admin — Fri, 22 May 2009 12:44:55 +0000

Hoxe ás 22 horas no Coliseum da Coruña, concerto de Lila Downs pertencente ao ciclo Música con raíces. Entradas á venta por 12 e 18 €.

Recital poético de Luz Pozo e Manuel Álvarez Torneiro

admin — Mon, 11 May 2009 23:12:35 +0000

A Agrupación Cultural Alexandre Bóveda informa que hoxe martes 12 de maio terá lugar un novo recital do ciclo Poetas coruñeses con Manuel Álvarez Torneiro e Luz Pozo, presentados por Xavier Seoane. Será ás 20:30 no salón de actos da asociación (R/ Olmos 16-18, 1º) con entrada libre.

O Ballet Folklórico Nacional de Cuba no Coliséum

admin — Fri, 24 Apr 2009 07:54:24 +0000

A esencia cubana, a través do ritmo da música e o baile das súas xentes, encherá hoxe o escenario do Coliséum coa presenza do Ballet Folclórico Nacional de Cuba co seu espectáculo A raíz do tempo.
A principal agrupación folclórica do país antillano foi fundada a comezos de 1962 polo folklorista cubano Rogelio Martínez Furé e o coreógrafo mexicano Rodolfo Reyes Cortés. Desde as súas orixes propúxose contribuír ao rescate e á revitalización das danzas e músicas tradicionais da súa terra, seleccionando aquelas de máis valor artístico para organizalas de acordo coas máis modernas esixencias teatrais, sen traizoar a súa esencia popular. 43 anos despois da súa fundación, ten desenvolvido un estilo de arte folklórico teatral de grande efectividade escénica e estética, que reflicte as diversas tradicións culturais cubanas, tanto de orixe europea (hispánicas ou francesas), como de antecedentes africanos (yoruba, congo, carabalí, arará, etc.) ou chegadas a Cuba doutras illas caribeñas. Levan realizado máis de 80 xiras por 45 países e teñen recibido, entre outros premios, o Tonel de Ouro e o Colar de Prata, Dijón (Francia) e o Templo de Ouro, Agrigento (Italia).
A función está prevista para as 21.30 h. e é certo que o público que asista, como sucede en todas os lugares en que o Ballet Folclórico Nacional de Cuba presentan os seus espectáculos, ficará abraiado e enmuderá co xenio orixinal dun pobo en que o ritmo e a sensualidade son innatos.

Homenaxe a Rosalía de Castro no Día Mundial da Poesía

admin — Fri, 20 Mar 2009 14:38:11 +0000

A Concellaría de Cultura da Coruña celebra o Día Mundial da Poesía cunha homenaxe á máis grande das poetas galegas, Rosalía de Castro. Ás 13:00 do sábado 21 de marzo na Sala de Exposicións de Durán Loriga celebrarase un recital poético-musical coa participación de Tonecho Castelos Boutureira (violín), Pablo Gómez Esqueira (acordeón) e as poetas Lucía Aldao, Tati Mancebo, Diana Varela Puñal, Paloma Calvo Varela, Berta Dávila e Olga Patiño. O público asistente recibirá como agasallo unha edición do poema “A Sir John Moore” realizado coa colaboración do Padroado Rosalía de Castro. Inaugúrase tamén unha exposición con obras de Julia Ares, Soledad Penalta, Yolanda Ferrer, Carmen Chacón, Dorda, Carmen Senande, Anxeles Penas e Dolores Gálvez con escultura, fotografía, pintura e gravado feito por oito artistas coruñesas. A exposición estará aberta do 18 ao 22. Ademais, até o 6 de abril unha mostra bibliográfica percorrerá na Biblioteca de Estudos Locais a traxectoria vital e creativa da autora de Cantares gallegos e Follas novas.

Noitenova, actividades de lecer nocturno na Coruña

admin — Fri, 13 Mar 2009 10:00:40 +0000

Organizado pola Concellería de Mocidade, Solidariedade e Normalización Lingüística do Concello da Coruña, o programa NOITENOVA ofrécelle aos mozos e mozas entre 14 e 30 anos unha serie de actividades de lecer (xogos, música, pequenos espectáculos artísticos, deportes, actividades circenses, novas tecnoloxías, astronomía…) para que as teñan en conta á hora de planificaren a súa fin de semana. Podedes descargar o folleto co programa para os meses de marzo, abril e maio picando aquí.

Últimos días para ver a exposición sobre Curros Enríquez

admin — Fri, 21 Nov 2008 06:00:23 +0000

A exposición sobre Curros Enríquez organizada pola Real Academia Galega, Na fronte unha estrela, finaliza o próximo domingo 23 de novembro. Pode verse até esa data no Pazo Municipal, de 12:00 a 14:00 polas mañás e de 18:00 a 21:00 en horario de tarde.

Curso na Luís Seoane

admin — Wed, 15 Oct 2008 20:26:15 +0000

CURSO DE INICIACIÓN Á ARTE CONTEMPORÁNEA E ACTUAL

A Fundación Luis Seoane abre o prazo de matrícula para a terceira edición do Curso de Iniciación á Arte Contemporánea e Actual. O curso pretende achegar a arte contemporánea, desde as primeiras vangardas do século xx ata as manifestación actuais, a un público adulto que non precisa dispor de coñecimentos previos sobre a materia, a través de conferencias impartidas por especialistas na materia con apoio audiovisual. Os interesados poderán dirixirse ao teléfono 981216015 ou a través do email info@luisseoanefund.org