O 23 de marzo no Paraninfo da Maestranza.

Neste 2010 cúmprense 50 anos da prematura morte de Albert Camus en accidente de tráfico. En recoñecemento da súa figura literaria e ética, o Teatro Rosalía de Castro programou dúas funcións de Calígula a cargo da compañía L'OM Imprebis os días 5 e 6 de marzo dentro do ciclo Caixanova.

L'OM Imprebis é unha compañía singular dentro do panorama teatral español e caracterízase polo rigor no traballo e un coidado nas producións que sempre se basean nun núcleo actoral fixo, aberto e plural baixo a dirección de Santiago Sánchez. A obra conta coas actuacións de Sandro Cordero, Garbiñe Isausti, José J. Rodríguez, Selu Nieto, Gorsy Edú, Carles Montoliu, Carlos Lorenzo, Balbino Lacosta, Sergio Gayol, José Gamo, Martín Caló e Marina Barba. As entradas custan entre 10 e 21 euros (usuarios de carné xove, maiores de 65 anos e desempregados teñen un 20% de desconto).

Pisando ovos é unha compañía de danza contemporánea liderada pola coreógrafa Ruth Balbís que se caracteriza por centrar os seus espectáculos en elementos que definen e condicionan a vida das persoas, procurando novos e persoais rexistros que van dende os movementos máis radicais aos máis minimalistas. Chegan mañá 27 de febreiro ao Rosalía coa súa última produción, Tres, na que amosan os encontros e desencontros de tres mulleres condicionadas pola súa sexualidade. Encontros que se definen entre o individual e o común, a fantasía e as obsesións, o mimetismo dos corpos, e todo iso nun mundo novo no que se redescobren as tres nelas mesmas. Nesta montaxe estarán con Ruth Balbís as bailarinas Janet Novás e Andrea Quintana. A función comezará ás 21 horas no Rosalía. O prezo das entradas é de 9 € (carné xove, maiores de 65 anos e desempregados/as, 6 €).

Tres años despois da súa estrea, o director, equipo artístico e reparto que participou na montaxe que o Centro Dramático Galego fixo de A piragua de Cándido Pazó, volven reunirse para dar vida a esta historia que aborda o tema da violencia de xénero. A peza levou catro premios María Casares en 2007 (mellor texto orixinal, mellor actriz protagonista, mellor iluminación e mellor música orixinal), e conta coas actuacións de Xosé Manuel Olveira “Pico”, Susana Dans, Marcos Orsi, Iolanda Muíños, César Martínez “Goldi”, Ricardo de Barreiro e Mariam Bañobre. Dirixe Cándido Pazó. A función será o domingo 28 de febreiro ás 19:00. O prezo das entradas é de 9 € (usuarios de carné xove, maiores de 65 anos e desempregados/as, 6 €)

O sábado 27 de febreiro celébrase na Coruña o primeiro Festival de Arte e Integración, FAI, que nace coa finalidade de mostrar propostas de Artes Escénicas e Musicais que sirvan para facilitar a integración social. Estas propostas serán levadas a cabo por compañías e grupos cunha ampla experiencia profesional que dedicaron todos os seus esforzos en desenvolver espectáculos para individuos e colectivos con dificultades de integración. FAI pretende abrirse, crear vínculos, mostrar o que a arte pode chegar a facer. Ademais FAI contará con actividades paralelas á programación de espectáculos, como conferencias, mesas redondas nas que poderán participar profesionais, interesados en mellorar as súas competencias nesta área de traballo, así como público xeral interesado nesta temática. Podedes ler máis información neste documento (PDF, 1,3 MB).

Do 10 ao 14 de marzo celebrarase na Coruña o IX Festival Internacional de teatro cómico Manicómicos. Nesta edición de inverno do festival poderemos desfrutar durante cinco días dos máis destacados espectáculos do panorama cómico internacional, as novas creacións do emerxente
teatro galego e ata as máis enriquecedoras fusións de compañías multinacionais. Cinco días que farán que a cidade comece anticipadamente a saír do inverno cun sorriso case primaveral. O festival contará coa participación de:

El Retrete de Dorian Gray (Cataluña/Galicia): "Rúa aire"
Maquinaria Pesada (Galicia): "As vingadoras"
Gari Hutter (Suíza): "Juana de ArPpo"
Jango Edwards (USA): "Classics"
Los Excéntricos (Cataluña/Francia): "Rococó Bananas"

O Teatro Rosalía de Castro será o espazo creativo onde se celebrarán todos os espectáculos. Até o 28 de febreiro poderán mercarse abonos para todo o festival a prezo reducido, entre 27,30 € e 44,10 €. Podedes descargar o dossier informativo nesta ligazón (PDF, 4,7 MB)

Familie Flöz é unha compañía berlinesa que fai teatro sen palabras, empregando como único recurso o xesto e unhas máscaras. Posúe unha ampla traxectoria internacional e xa pasaron polo Teatro Rosalía de Castro con dous dos seus anterios espectáculos. Esta fin de semana presentarán no mesmo escenario Infinita, no que abordan literalmente "toda a vida humana", con escenas da infancia e a vellez das persoas. Un espectáculo cheo de comicidade, coma todos os da compañía, no que se suceden a un ritmo de vertixe as diferentes escenas.

Infinita foi creada e está interpretada por Björn Leese, Benjamin Reber, Hajo Schüler e Michael Vogel. O venres e o sábado as funcións están previstas para as 20:30, mentres que o domingo terá lugar ás 19 horas.

A compañía Efelante Elegante presenta O Forno no Forum Metropolitano
Mañá sábado 20 ás 20.30 h e o domingo 21 ás 19 h o auditorio do Fórum Metropolitano acolle a obra de teatro O Forno da compañía galego-portuguesa Elefante Elegante.

O Forno é un espectáculo musical de Commedia dell’Arte sobre a sociedade de consumo contemporanea destinado a todos os públicos a partir de oito anos. A función convida a reflexionar sobre a forma en que estamos vivindo en sociedade e a maneira en que estamos empregando os recursos naturais e o destino que lles reservamos neste inicio do século XXI. A temática é abordada a través do riso, do xesto e da música en directo, nun espectáculo inspirado na inxenuidade da Commedia dell’Arte e no burlesco brechtiano.

O vindeiro sábado 13 de febreiro ás 19:00 será presentado no Fórum Metropolitano o conto La cerillera. A empresa de recoñecido prestixio en Arxentina Omar Álvarez Títeres leva a escena unha das historias máis complexas e controvertidas escritas polo autor dinamarqués Hans C. Andersen. O espectáculo ofrécelle ao espectador unha historia que vai sendo tecida sen palabras, a través da acción implícita recreada coma un xogo para así contar unha historia difícil, complexa, moi actual, coidadosamente recreada e con moita atención polo detalle, apelando ao lirismo e a poética da imaxe.

A obra está recomendada para maiores de 6 anos. O prezo das entradas é de 5 euros, e existe un abono familiar para tres persoas polo prezo de 12 euros.