A Coruña Cultura

Presentación do libro A revolta da Casa dos Ídolos de Pepetela

admin — Tue, 09 Mar 2010 13:00:04 +0000

O 23 de marzo no Paraninfo da Maestranza.

Visibilidade, exposición no Palacio Municipal

admin — Tue, 09 Mar 2010 11:00:01 +0000

Onte luns 8 de marzo, día internacional das mulleres, o Concello da Coruña inaugurou a exposición VISIBILIDADE. A partir de Resetea: Cambia o teu rol, ao que unimos uns textos que conforman un percorrido reflexivo arredor dos traballos e profesións, a Concellaría de Igualdade e Participación Cidadá proponnos unha viaxe que reivindica a corresponsabilidade entre homes e mulleres, sen máis límite que a imaxinación, poñendo en valor os múltiples logros acadados así como evidenciando auqeles sectores laborais aínda profusamente masculinizados. A exposición poderá verse na Sala de Exposicións do Palacio Municipal até o 4 de abril.

Conferencia de Martín Almada na Casa Casares Quiroga

admin — Tue, 09 Mar 2010 10:00:36 +0000

Hoxe martes na Casa Museo Casares Quiroga Martín Almada, supervivinte da Operación Cóndor, pronunciará a conferencia O cóndor segue voando. O acto está organizado polo Comité de Solidariedade con América Latina da Coruña e Concellaría de Mocidade, Solidariedade e Normalización Lingüística. Será a partir das 20:30, con entrada libre até completar aforo.

Os Museos Científicos convocan un concurso de vídeo afeccionado sobre o impacto da ciencia na nosa vida

admin — Mon, 08 Mar 2010 15:00:21 +0000

Os Museos Científicos Coruñeses convocan o concurso de vídeo afeccionado A ciencia na miña vida, que se realizará simultáneamente en todas as cidades europeas participantes no proxecto CASC (Cities and Science Communication). Trátase de realizar unha gravación curta, de menos de 3 minutos, cuxo contido responda á seguinte pregunta: Que problemas che gustaría que resolvesen a ciencia e a tecnoloxía no futuro?

O obxectivo é invitar aos cidadáns, especialmente aos mozos, a reflexionar sobre o papel que a ciencia xoga nas súas vidas e en particular cales son as súas expectativas acerca do que pode proporcionarlles para o seu propio futuro e o da sociedade. A actividade invítaos ademais a desenvolver a súa creatividade explorando linguaxes audiovisuais e o uso de redes sociais para promover debates sobre estes temas.

Os traballos sera valorados por un xurado que terá en conta a orixinalidade, a claridade da mensaxe e o valor artístico dos vídeos. A calidade técnica non terá moita consideración, polo que as gravacións poden ser realizadas mesmo con teléfonos móbiles ou webcams.

Categorías

Os participantes poden presentarse en dúas categorías:
- Escolares con supervision dun profesor
- Público xeral (os menores necesitan autorización do seu titor legal)

Datos técnicos

Os vídeos poden presentarse en calquera formato estandar (.avi,.flv, .mp4,.mpg,.wmv…) e poden incluír recursos como entrevistas, animacións, imaxe fixa, timelapse, etc. O contido debe ser orixinal. Os traballos, en arquivo dixital, deben enviarse, ata o 16 de abril, aos Museos Científicos Coruñeses por correo postal, ou estar dispoñibles para descargarse en Internet. Cada presentación debe ir acompañada dunha ficha co título, unha breve descrición do contido, nome dos autores, correo electronico de contacto; no caso de escolares, ademais deses datos, o nome, dirección e teléfono do centro e a ficha de autorización dos pais ou titores.

Concurso CASC
Casa das Ciencias
Parque de Santa. Margarita s/n
15005, A Coruña
Correo electrónico

Premios

Un xurado composto por profesionais da comunicación científica seleccionará ao gañador en cada categoría. Os gañadores en cada país serán premiados cunha cámara de vídeo e unha viaxe a Bruxelas, onde competirán cos seus traballos cos gañadores do resto de países participantes. Máis información e ficha de inscrición no sitio web dos Museos Científicos Coruñeses.

Conferencia de Justo Beramendi

admin — Mon, 08 Mar 2010 14:00:27 +0000

Mañá martes 9 de marzo, o historiador Justo Beramendi González falará sobre O nacionalismo galego nos finais do franquismo dentro do ciclo Economia, História e C.C. Sociais organizado pola Agrupaçom O Facho. Será ás oito do serán na aula de cultura Caixa Galicia (Médico Rodríguez nº 2, esquina Juan Flórez) na Coruña.

Nais de África, fotografías de Gabriel Tizón

admin — Fri, 05 Mar 2010 13:00:20 +0000

A mellora da calidade de vida dos países en vías de desenvolvemento pasa pola incorporación da muller á vida económica, social e cultural. A exposición Nais de África mostra os retratos que Gabriel Tizón fixo dunhas nais que comprenden idades entre 14 e 65 anos, da rexión de Biur, en Guinea Bissau. Reivindica o valor destas mulleres na súa sociedade. Traballan dentro e fóra de casa, son responsables da educación e a supervivencia dos seus fillos… son unhas heroínas anónimas. A exposición estará nas ventás exteriores da Subdelegación do Goberno até o día 11 de abril.

Calígula de Albert Camus, hoxe e mañá no Rosalía

admin — Fri, 05 Mar 2010 11:00:30 +0000

Neste 2010 cúmprense 50 anos da prematura morte de Albert Camus en accidente de tráfico. En recoñecemento da súa figura literaria e ética, o Teatro Rosalía de Castro programou dúas funcións de Calígula a cargo da compañía L’OM Imprebis os días 5 e 6 de marzo dentro do ciclo Caixanova.

L’OM Imprebis é unha compañía singular dentro do panorama teatral español e caracterízase polo rigor no traballo e un coidado nas producións que sempre se basean nun núcleo actoral fixo, aberto e plural baixo a dirección de Santiago Sánchez. A obra conta coas actuacións de Sandro Cordero, Garbiñe Isausti, José J. Rodríguez, Selu Nieto, Gorsy Edú, Carles Montoliu, Carlos Lorenzo, Balbino Lacosta, Sergio Gayol, José Gamo, Martín Caló e Marina Barba. As entradas custan entre 10 e 21 euros (usuarios de carné xove, maiores de 65 anos e desempregados teñen un 20% de desconto).

Caiuco, fame e emigración, exposición na Domus

admin — Fri, 05 Mar 2010 10:00:55 +0000

Hoxe venres 5 ás 20 horas no vestíbulo da Domus inaugúrase unha exposición fotográfica de Xacobe Meléndrez: Caiuco, fame e emigración.

Presentación dun poemario de Rosalía Fernández Rial

admin — Fri, 05 Mar 2010 08:30:42 +0000

Hoxe venres 5 de marzo ás 20:00 no local da Agrupación Cultural Alexandre Bóveda (Rúa Olmos, 16-18, 1º) preséntase o poemario musical En clave de sol de Rosalía Fernández Rial.

A autora estará acompañada por Olga Patiño Nogueira e Emma Pedreira; o recital contará ademais coa participación do músico Brais Morán.

Cinema no Fórum: V.O.S.

admin — Thu, 04 Mar 2010 13:30:38 +0000

V.O.S. de Cesc Gay, esta semana na Sala Fernando Rey dentro do ciclo Colleita española.

Horario: xoves 4 ás 20:30, venres 5 ás 20:30 e 23:00; sábado 6 ás 17:30 e 20:30. Os pases do venres ás 23:00 e o sábado ás 17:30 son “sesións do espectador” con entrada reducida (1,5 €). O resto de sesións teñen o prezo de 3 €.