Da man de IVÁN VILLAR, bailarín moi recoñecido no ámbito do baile tradicional e da danza no seu conxunto, e de NELSON QUINTEIRO, polifacético artista, chega DANZA E CONTRADANZA, un espectáculo que xira en torno á voz e o corpo. A través da voz, mesturada en directo con escenas sonoras e efectos musicais e de son, o dúo CONTRA2 fai un percorrido polo mundo tradicional dos oficios, o amor, desamor...

Iván Villar e Nelson Quinteiro atopan unha nova linguaxe escénica que combina a formación e experiencia destes dous artistas. Coa danza tradicional e outro tipo de movementos constrúen un espectáculo cheo de poesía, frescura e potencia escénica.

Iván Villar

Formou parte do Ballet Galego Rey de Viana dende o ano 1996 ata o 2006.
Trala disolución do mesmo participou na montaxe Vacuo do Centro Coreográfico Galego. Posteriormente incorporouse á compañía Nova Galega de Danza coa montaxe Tradicción. Dirixe e coordina o grupo Entrecaixas. En flamenco destaca como solista da montaxe Sueño Flamenco de Beatriz Gamborino e Marco
Vargas. Tamén colaborou no espectáculo Rosas Negras da Compañía El taller. No 2008 funda a compañía CONTRA2 con Nelson Quinteiro, coa que presenta agora o espectáculo CONTRA2: DANZA E CONTRADANZA.

Nelson Quinteiro

Nelson Quinteiro é un home multidisciplinar que desenvolveu nos últimos anos unha variada actividade escénica no ámbito da produción, creación, formación, dirección e interpretación. Dirixe o Festival Galego de Cabaré que celebrou no 2009 a súa cuarta edición na cidade da Coruña; a Compostela Carpa Cabaré nas Festas de Apóstolo 2009 ou a Compañía Femme Fatale, coa que presentou obras como Lerchas, Varadas, Cabaréncrise ou Cabarédeambulante. Desde hai máis de dez anos exerce como intérprete de música tradicional, e neste campo estreou en 2009 o espectáculo en solitario As mans perdidas. Ese mesmo ano fundou a compañía CONTRA2 con Iván Villar.