Sábado 15
20:00
Sala Túnel (Coliseum)
Entrada de balde até completar aforo

O certame A Coruña Son pechará por todo o alto a súa edición de 2010 este sábado cun concerto protagonizado polos grupos gañadores. A clausura terá como escenario a recentemente estreada sala Túnel, situada nos baixos do Coliseum. En total serán seis os grupos e solistas participantes, e que ofrecerán unha completa panorámica da escea actual da música galega, con estilos que van desde o heavy ao pop, pasando pola canción de autor. Todos eles participan, desde o pasado día 10, no obradoiro de composición, produción e autoedición impartido por Gastón Rodríguez, Andrés Teijeiro, Bieito Romero,
Xabier Díaz, Carmen Rey e Sergio Lago. Antes, as súas maquetas foron seleccionadas a través da páxina web do certame. Os participantes son Batital, Fuco Xabier, Javier Ferreirós, Avante, Qronopios e Os John Deeres.

Podedes escoitar e descargar as cancións destes gañadores na páxina web do certame. Aquí tedes uns vídeos que esta mesma semana fixemos sobre o obradoiro de canción:

Este sábado, concerto!!!!!

Desde hoxe e até o venres os grupos seleccionados traballarán as súas propias composicións até o concerto do sábado na sala Túnel (Coliseo), día en que mostrarán a súa arte en público. O obradoiro consiste no estudo de técnicas de composición, produción e edición da man experta de Gastón Rodríguez, Andrés Teijeiro, Bieito Romero, Xabier Díaz, Carmen Rey e Sergio Lago.

Os grupos gañadores da III edición do certame de canción galega ACoruñaSon son os seguintes:

-Avante

Estes grupos e solistas, que representan os diferentes estilos que están a desenvolverse hoxe en día no ámbito da canción galega, desde o pop ao Heavy, pasando pola canción de autor, asistirán entre o 10 e o 15 de maio a un obradoiro de composición, produción e autoedición impartido por Gastón Rodríguez, Andrés Teijeiro, Bieito Romero, Xabier Díaz, Carmen Rey e Sergio Lago.
O obradoiro concluirá o sábado 15 de maio cun gran concerto de todos os grupos gañadores na sala Túnel (nos baixos do Coliseum da Coruña) ás 21:00. A entrada é libre até completar aforo.
As persoas interesadas en asistir como oíntes ao obradoiro poden inscribirse enviando un correo a  acorunason10 at gmail.com. Xa se poden escoitar os grupos gañadores e descargar as súas cancións na páxina web do certame http://acorunason.eu.

A Concelleira de Cultura, María Xosé Bravo, presentou esta mañá o certame A Coruña Son 2010 que este ano chega a súa terceira edición e co que se persegue fomentar a creación musical en lingua galega ao tempo que se dan a coñecer artistas tanto os xa coñecidos como os máis novos.

ACoruñaSon é un certame de creación de canción popular organizado polas Concellarías de Cultura e de Mocidade, Solidariedade e Normalización Lingüística do Concello da Coruña. Este Certame, que ten como obxectivo fomentar, descubrir e promocionar novos autores e autoras de canción popular en galego, ábrese coa selección de dez autores.

Os dez terán como premio a asistencia a un obradoiro de canción popular de cinco días de duración impartido por profesionais galegos de prestixio, onde traballarán as súas propias composicións. A actividade final do obradoiro será a gravación dun disco colectivo durante un concerto ao que serán convidados representantes de todos os sectores da industria musical galega.

Os autores que non fosen seleccionados entre os dez participantes do obradoiro, así como outras persoas interesadas en asistir ao Obradoiro de Canción Popular, que terá lugar do 10 ao 15 de maio na Coruña, teñen a posibilidade de matricularse en calidade de alumnos ou alumnas oíntes. Para formalizaren a matrícula deberán seguir o proceso que se indicará proximamente no sitio do certame.

Hoxe ábrese o prazo de presentación de maquetas que se estenderá ata o vindeiro 11 de abril. Todos aqueles autores e autoras que queiran participar no certame ACoruñaSon e reúnan os requisitos expostos deberán rexistrarse e enviar a súa maqueta en formato de vídeo e/ou MP3 a través do sitio web xunto co formulario de inscrición no certame.

Cada concursante debe participar cun mínimo de dúas cancións e un máximo de cinco. A maqueta deberá ser da propia autoría do concursante, orixinal, non divulgada anteriormente, nin suxeita a limitacións e/ou obrigas contractuais previas de ningún tipo. As maquetas están abertas a calquera estilo dentro dos límites da música popular: pop, rock, electrónica, folk, jazz, canción de autor, etc… Cada maqueta non deberá superar os 100 MB, tanto no caso dos vídeos como nos MP3. Os usuarios e usuarias poderán ver e escoitar libremente as maquetas de todos os participantes inscritos no Certame.

DESENVOLVEMENTO DO CERTAME E PREMIOS

Do 22 de marzo ao 12 de abril de 2010 poderán rexistrarse os e as participantes no concurso. Durante este tempo non se poderán votar as cancións.

Do 12 de abril ao 2 de maio de 2010 o público poderá votar polas cancións participantes no certame. Cadaquén poderá votar unha vez por tantas cancións como desexe.

VOTACIÓN DE MAQUETAS

Considérase que un voto é válido unha vez se teña recibido na pantalla da páxina Web unha mensaxe de voto válido. O sistema permite deixar comentarios ás cancións, sempre realizados en ton de respecto polos demais.

Os 10 gañadores/as de ACS10 serán escollidos exclusivamente polos votos dos usuarios. A selección final será dada a coñecer o día 2 de maio de 2010 a través da web do certame e directamente por correo electrónico ou teléfono aos candidatos e candidatas.

Mañá sábado 28 de febreiro ás 20:00 no Paraninfo da Universidade da Coruña (edificio do Rectorado, na Maestranza) terá lugar o concerto final co que remata a edición 2009 do obradoiro de cancións A Coruña Son, dirixido polo cantante e compositor Santiago Auserón e organizado polas Concellarías de Cultura e de Mocidade do Concello da Coruña co obxectivo de fomentar, descubrir e promocionar novos autores e autoras de canción popular en galego. O concerto estará conducido pola cantante Uxía Senlle e nel intervirán os creadores e creadoras das dez cancións seleccionadas: Sandrísima (canción Tic-Tac), Sergio Zearreta (Fincapé), Fracasados de antemano (Menezes), Pulpiño Viascón (Quérote na praia do Orzán), Magritte (Alpinista), Supersound (Onde estás), Marisol Manfurada (Instinto básico), Maus vizinhos (Gira caindo), Ángeles Dorrio (O cativo) e La pelvis (Psicomuiñeira). As dez finalistas e todas as cancións que se presentaron ao certame poden ser escoitadas e descargadas na web do certame. A entrada ao concerto é libre até completar o aforo.

Dentro da programación do obradoiro de canción popular A Coruña Son hoxe xoves 26 de febreiro Xurxo Souto impartirá unha conferencia co título O influxo afro-americano na canción galega. Durante o relatorio haberá ocasión de escoitar diferentes exemplos que reflicten a pegada dos sons atlánticos na música popular galega. O acto terá lugar no auditorio do Fórum Metropolitano de cinco a oito da tarde, con entrada libre.

O músico e escritor Xurxo Souto é autor entre outros dos libros O retorno dos homes mariños, Contos da Coruña e Os tres trebóns. Desde outubro de 2005 é Director de Programas da Radio Galega, emisora na que conduce o espazo musical Aberto por reformas.

Auserón imparte un taller de canciones evocando el ritmo de Aristóteles o los cantos de la «Odisea»
Rodri García

Agarró la guitarra que estaba sobre el escenario, la extrajo de su funda y la afinó durante unos momentos. Los acordes sonaron en el auditorio del Fórum Metropolitano, mientras los asistentes al taller de canciones A Coruña Son 09 se iban sentando. Luego, Santiago Auserón guardó la guitarra y se dispuso a iniciar su docencia (aunque la escuela no era de calor). El gesto del ex líder de Radio Futura, que confesó su falta de experiencia pedagógica, parecía el del futbolista que acaricia la hierba y se santigua antes de pisarla. «Los autores de canciones somos un gremio privilegiado; en otros tiempos se diría sagrado y, aunque no soy especialmente religioso, me gusta ese sentido de lo sagrado», arrancó. Luego evocó a los griegos, con sus dioses, para afirmar que los compositores son «hijos de las musas, nietos de la memoria (la Mnemósine) y quizá bisnietos del olvido, porque a veces es necesario pasar página, cambiar de rumbo».[Ler artigo completo]

Sesión de mañá (10:00-14:00):
TEORÍA: A harmonía desde a Antigüidade até os nosos días. Cuestións filosóficas e musicais. PRÁCTICA: Análise melódica e interpretación das cancións.

Sesión de tarde (17:00-20:00):
RELATORIO: "O influxo afro-americano na canción galega", por Xurxo Souto. Mostras sonoras e exemplos, con intervención dos participantes.

Lugar: auditorio do Fórum Metropolitano.
Máis información: web A Coruña Son.

Sesión de mañá (10:00-14:00):
TEORÍA: A melodía e as súas relacións co ritmo, coa harmonía e coa frase.
PRÁCTICA: Análise melódica e interpretación das cancións.

Sesión de tarde (17:00-20:00):
Sesión dedicada ás cancións participantes no Certame que non foron seleccionadas para o Obradoiro. Debate sobre posíbeis melloras no Certame e no Obradoiro.

Lugar: auditorio do Fórum Metropolitano.
Máis información: web A Coruña Son.

Sesión de mañá (10:00-14:00):
TEORÍA: A canción en Occidente desde a Antigüidade até os nosos días. O ritmo e a métrica do verso.
PRÁCTICA: Análise de metros e patróns rítmicos das cancións. Revisión das letras.

Sesión de tarde (17:00-20:00):
RELATORIO: "Sobre o substrato rítmico tradicional da canción folclórica na lingua galega", por Bieito Romero: . Exemplos e mostras, con intervención dos participantes.

Lugar: auditorio do Fórum Metropolitano.
Máis información: web A Coruña Son.

Mañá martes 24 de febreiro ás 10:00 no Fórum Metropolitano da Coruña comeza o obradoiro de canción A Coruña Son 2009, organizado polas Concellarías de Cultura e de Mocidade do Concello da Coruña co obxectivo de fomentar, descubrir e promocionar novos autores e autoras de canción popular en galego. Nesta segunda edición do certame o obradoiro volve estar dirixido polo cantante e compositor Santiago Auserón, e nel participarán os creadores e creadoras das dez cancións seleccionadas na primeira fase do certame: Sandrísima (canción Tic-Tac), Capitán Furilo (Pipermint), Fracasados de antemano (Menezes), Pulpiño Viascón (Quérote na praia do Orzán), Magritte (Alpinista), Supersound (Onde estás), Marisol Manfurada (Instinto básico), Maus vizinhos (Gira caindo), Ángeles Dorrio (O cativo) e La pelvis (Psicomuiñeira). Todas as cancións poden ser escoitadas e descargadas na web do certame.

O obradoiro celébrase en sesións de mañá e tarde no auditorio do Fórum Metropolitano. Polas mañás de 10 a 14 horas Santiago Auserón impartirá unha clase teórica e logo traballará directamente cos músicos na análise da métrica, patróns rítmicos e melodías das cancións. Polas tardes haberá conferencias do músico Bieito Romero, fundador de Luar na Lubre (martes de 17 a 20 horas) e Xurxo Souto (xoves de 17 a 20 horas). O mércores todos os participantes en A Coruña Son'09 cuxas cancións non foron escollidas como finalistas poderán pasar polo Fórum para escoitar a valoración e os comentarios de Santiago Auserón. Todas as persoas interesadas en asistiren coma oíntes ao obradoiro poden facelo enviando un correo electrónico co seu nome e un teléfono de contacto a este enderezo.

“A Coruña Son 09” remata o vindeiro sábado 28 de febreiro ás 20 horas co concerto final que terá lugar no Paraninfo da Universidade da Coruña (edificio do Rectorado, na Maestranza).

Podedes consultar cales son os dez escollidos na web do obradoiro, que tamén recolle a carta de Santiago Auserón xustificando a súa decisión. Ademais, aínda estades a tempo de apuntarvos coma oíntes ao obradoiro, que se celebrará no Fórum Metropolitano e cuxo programa fica detallado aquí. Para iso abonda con enviardes un correo electrónico a este enderezo indicando o nome e un número de teléfono de contacto.

Mañá martes 10 de febreiro remata o prazo para inscribir cancións no certame de canción popular A Coruña Son. Até hoxe xa se inscribiron máis de sesenta pezas, entre as cales serán escollidas as dez finalistas que participarán no obradoiro que conta por segundo ano coa dirección musical de Santiago Auserón.

Ademais, todas as persoas que desexen apuntarse como oíntes poden facelo xa enviando un correo electrónico cos seus datos a este enderezo

O vindeiro mércores 28 de xaneiro ás 20:30 no Fórum Metropolitano da Coruña celébrase o concerto de presentación do disco A Coruña Son 2008, que nace como resultado do obradoiro que baixo a dirección do cantante e compositor Santiago Auserón se desenvolveu na nosa cidade o pasado mes de marzo. A maior parte dos artistas que participaron naquela experiencia actuarán no Fórum nun concerto no que o público que asista recibirá ademais como agasallo a edición en formato digipack do disco. O prezo das entradas será de 3 €. As bandas que confirmaron a súa presenza no concerto son as seguintes:

Mr Carácter: “Xabarín Manía” (Rock galego)
Chámalle Xis!: “Canto aquí, canto onde me peta” (Son galego)
doGma'I: “A lagoa dos soños” (Pop psicodélico)
Pablo Díaz: “O moucho” (Novo folk)
Siesta continental: “Violoncello” (Cabaret-art)
Tonhito de Poi: “Mariñeira” (Rock galego)

O disco A Coruña Son 2008 complétase coas cancións de Nat (“Nunca te quixen”, canción de autor), O sonoro maxín (“A rúa do perigo”, reggae atlántico), D-Laxe (“Túas mans”, trip-hop atlántico) e “A misteriosa”, versión en galego de “La misteriosa” con tradución de Tati Mancebo e Alfredo Ferreiro e interpretada por Santiago Auserón.

Recordámosvos tamén que até o 10 de febreiro está aberto o prazo para inscribir cancións na segunda edición de ACoruñaSon’09, que terá lugar na Coruña entre o 24 e o 28 de febreiro. Organizado polas Concellarías de Cultura e de Mocidade do Concello da Coruña, este certame ten como obxectivo fomentar, descubrir e promocionar novos autores e autoras de canción popular en galego. Os dez artistas que sexan seleccionados terán como premio a asistencia a un obradoiro de canción popular dunha semana de duración impartido por Santiago Auserón, primeira figura da creación, a interpretación e o estudo da música popular peninsular, onde traballarán as súas propias composicións. A actividade final do obradoiro será a gravación dun disco colectivo e a celebración dun concerto ao que serán convidados representantes de todos os sectores da industria musical galega. Os solistas ou conxuntos interesados en participar poden subir xa as súas cancións en vídeo ou en formato mp3 na web do proxecto.

Até o 10 de febreiro está aberto o prazo para inscribir cancións en ACoruñaSon'09, obradoiro de canción popular organizado polas Concellarías de Cultura e de Mocidade do Concello da Coruña. Este certame, que ten como obxectivo fomentar, descubrir e promocionar novos autores e autoras de canción popular en galego, ábrese coa selección de dez autores. Os dez terán como premio a asistencia a un obradoiro de canción popular dunha semana de duración impartido por Santiago Auserón, primeira figura da creación, a interpretación e o estudo da música popular peninsular, onde traballarán as súas propias composicións. A actividade final do obradoiro será a gravación dun disco colectivo e a celebración dun concerto ao que serán convidados representantes de todos os sectores da industria musical galega.

Os solistas ou conxuntos interesados en participar poden subir xa as súas cancións en vídeo ou en formato mp3 na web do proxecto.