A Coruña Cultura » Caixanova na rúa

Caixanova na rúa: malabares con Javi Javichi e Roi Sixto

admin — Sat, 04 Jul 2009 20:00:24 +0000

Javi Javichi, coñecido como El Malabarista de la Pista, é un dos clowns máis polifacéticos do momento. Actor e malabarista, o seu espectáculo é unha mestura de humor e risco mediante o uso de malabares, diábolos, mazas ou pelotas; realiza equilibrios sobre cilindros e fusiona a técnica circense e o humor máis clásico. Con esta divertida produción de rúa, Javi Javichi logra conectar co público de xeito directo, cunha proposta artística fresca e orixinal que convence dende o primeiro momento.

JAVI JAVICHI: domingo 5 de xullo ás 12:30 no Obelisco e ás 17:00 no Paseo Marítimo.

No seu divertido espectáculo Roi Sixto crea unha personaxe imaxinaria da cal xorden unha infinidade de aparellos cos que facer malabares e espectaculares xogos. A pesar da destreza que demostra, Roi non se deixa vencer polo fácil virtuosismo e combina as súas rutinas con outras técnicas artísticas, coma o clown ou o teatro de rúa. Pelotas, mazas, aros, diábolos e até un monociclo saen da súa maleta nun orixinal número que constata que estamos ante un dos mellores shows unipersoais da escena galega. Roi Sixto é un novo malabarista ferrolán que representa a nova xeración de artistas de rúa e de novo circo que emerxeu en Galicia nos últimos anos e que, pouco a pouco, están conquistando as prazas e teatros galegos.

ROI SIXTO: domingo 5 de xullo ás 13:30 na Praza de Vigo e ás 18:00 no Paseo Marítimo

Caixanova na rúa: Cat People e Krakovia en concerto na Torre de Hércules

admin — Sat, 04 Jul 2009 12:00:08 +0000

Esta banda viguesa afincada en Barcelona converteuse en habitual na escena alternativa española e europea. A publicación do seu segundo disco en novembro de 2008 levounos a realizar unha xira por Europa, con concertos en países como Francia, Portugal, Alemaña ou a República Checa. Épico e melancólico son os dous primeiros adxectivos que se asocian ao falar de Cat People, unha auténtica referencia na escena indie nacional. De feito, foi portada da revista Mondo Sonoro, o referente máis indiscutible do panorama da música independente.

CAT PEOPLE: sábado 4 de xullo ás 22:30 na Torre de Hércules.

Krakovia parece unha banda de rock sacada dunha película de Tarantino: a espectacular cantante e bailarina de burlesque Vinila Von Bismark, o cantante Petra Flurr procedente de grupos de punk underground de Berlín… Contrabaixo, dúas guitarras, moogs, coristas orientales… As cancións, compostas de noite, rodeadas dun ambiente de malicia enormemente sedutora, van dende o punk-rock adrenalínico, contundente de estribillos tan contaxiosos e emocionantes que son case himnos aos medios tempos profundos e escuros. Krakovia son a banda do momento: imaxe poderosa, son estremecedor, cancións perfectas e un directo que é unha experiencia de enerxía perigosa e adictiva.

KRAKOVIA: sábado 4 de xullo ás 24:00 na Torre de Hércules.

Caixanova na rúa: música de todos os tempos ao son da guitarra portuguesa

admin — Sat, 04 Jul 2009 11:00:53 +0000

O Cuarteto de Guitarras de Lisboa é un proxecto novo e ambicioso que naceu en xaneiro de 2006 realizando, dende entón, diversas actuacións por todo o territorio en Portugal e logrando gran aceptación por parte do público. O repertorio que presentan é moi completo, percorrendo varios períodos e estilos da historia da música: de Bach a Tchaikovsky, da música sudamericana á música contemporánea portuguesa. Nas súas actuaciónss versionan aos grandes mestres a través das cordas das súas guitarras. CUARTETO DE GUITARRAS DE LISBOA: sábado 4 de xullo ás 19:00 na Praza de Vigo.

Caixanova na rúa: Banda de Gaitas da Deputación de Pontevedra

admin — Sat, 04 Jul 2009 10:30:03 +0000

A Banda de Gaitas da Deputación de Pontevedra é unha das formacións tradicionais con máis percorrido, non só en Galicia, senón en toda España. O sentimento popular común é o latexo do seu espectáculo: tambores, gaitas… Cun punto de diferenciación, a interacción co público. Non só se limita á interpretación da cultura musical galega máis ancestral, tamén fomenta a participación dos espectadores.

BANDA DE GAITAS DE DEPUTACIÓN DE PONTEVEDRA: sábado 4 de xullo ás 19:00 no Paseo Marítimo

Caixanova na rúa: humor sen palabras co mimo Maku Jarrak

admin — Fri, 03 Jul 2009 19:30:14 +0000

Maku Jarrak recorre á linguaxe universal: a xestual ou mímica, que rompe as barreiras lingüísticas, algo que xa fixera no seu momento o xenial Chaplin. Os momentos lúdicos se suceden dinamicamente durante o espectáculo e son parte dun universo cheo de equilibrios, malabares e instantes cómicos e únicos que desencadean un final sorprendente e inesperado. Nos últimos anos estiveron xirando por festivais e prazas de Arxentina, España, Brasil, Venezuela e Bolivia e, ademais, dende o ano 2001 os seus números forman parte do popular CircoVachi. MAKU JARRAK: sábado 4 de xullo ás 12:30 na Praza de Lugo e ás18:00 na Praza de Vigo.

Caixanova na rúa: novo circo con Los Chatos

admin — Fri, 03 Jul 2009 19:00:05 +0000

O dúo Los Chatos ofrece un show variado e de gran calidade no que o espectador é transportado a un fascinante mundo sen fronteiras: danza, teatro, acrobacia, lume e maxia mestúranse harmoniosamente creando unha atmosfera onde todo é posible. E sempre, cun mesmo obxectivo: a risa do público. Veñen de presentar o seu espectáculo en diversos festivais e cidades de España, Italia, Suiza, Austria e Alemaña onde recolleron un gran éxito. No ano 2006 resultaron gañadores do Festival degli artisti di strada di Aosta (Italia). En 2007, Los Chatos gañaron o Festival Et Voilà en Castell’Arquato (Italia) e quedaron segundos no Milano Clown Festival (Italia) .

LOS CHATOS: sábado 4 de xullo ás 12:00 no Obelisco e ás 19:30 na Praza de Lugo.

Caixanova na rúa: pasacalles pirotécnico con Kull D'Sac

admin — Fri, 03 Jul 2009 12:30:14 +0000

Unha vez iniciada a noite, coa escuridade como pano de fondo, un pasacalles pirotécnico devolve a luz do día… Un espectáculo cheo de color e orixinalidade no que se usarán diversos elementos de lume como abanos, lanzadeiras e un gran vehículo de 4 metros de altura dende o cal os membros de Kull d’Sac realizarán acrobacias e técnicas circenses. Unha fusión sorprendente de lume e música que percorrerá os espazos urbanos coa pirotecnia e o malabarismo coma protagonistas.

KULL D’SAC: venres 3 de xullo ás 23:30 dende Praza de Mina ata Correos

Caixanova na rúa: hoxe e mañá, concertos da Mr Dixie

admin — Fri, 03 Jul 2009 12:00:46 +0000

Unha banda de jazz do Chicago dos anos 30 e 40. As súas notas evocan as beiras do Mississipi, o son dos metais lembra a xenios como Louis Armstrong, King Oliver ou Jelly Roll Morton. Mr. Dixie é unha banda que parece ter escapado de calquera club da mítica Nova Orleáns. Fundada no ano 1999 polo trompetista Guillermo Lancelotti, Mr. Dixie Jazz Band foi renovando algún dos seus membros, pero nunca deixou de xirar e dar espectáculo.

MR DIXIE:venres 3 de xullo ás 20:00 no Praza de Vigo; sábado 4 de xullo ás 20:00 na Rúa Real.

Caixanova na rúa: pasacalles festivo con Hortzmuga

admin — Fri, 03 Jul 2009 11:00:47 +0000

Este grupo de teatro activo é responsable dun espectáculo dinámico, un pasacalles capaz de chegar a todos los públicos, independentemente da súa idade. Algarada e invasión nun regreso ao carnaval e á bufonería, unha gran festa na rúa onde todo paseante ou espectador é susceptible de converterse en protagonista mediante a mestura de diversas técnicas teatrais. Hortzmuga está máis cerca do activismo cultural que da mera expresión plástica, e une a animación artística coa manifestación social.

HORTZMUGA: venres 3 de xullo ás 18:00 dende o Obelisco ata os Cantóns.

Caixanova na rúa: os ritmos de Bollywood chegan ás prazas da Coruña

admin — Thu, 02 Jul 2009 12:00:15 +0000

Unha voda india é unha das festas máis espectaculares ás que se pode asistir, polas súas cores e polo seu son… The Bollywood Brass Band recolle esta tradición e a leva aos escenarios e ás rúas mediante saxofóns, trompetas, trombóns, tubas, bombos e o tambor do Punjab utilizado na música Bhangra. Un espectáculo sen igual, como se pode comprobar no cine procedente de Bollywood ou en películas como A voda do Monzón ou na oscarizada Slumdog Millonaire. Cultura do “Bhangra” e arranxos de metal, con influenzas do jazz e outras músicas do mundo coma o samba, o reggae, o funk ou o jazz. Co seu estilo forte e enérxico son os perfectos animadores para unha gran festa. Non hai máis que asomarse ás salas de baile e concertos londinenses para darse de conta do gran empuxe que teñen os ritmos indios e esta banda é un bo exemplo disto.

THE BOLLYWOOD BRASS BAND: xoves 2 de xullo ás 18:00 dende Praza de Lugo ata Praza de Pontevedra e ás 20:00 na Praza de Vigo.

Caixanova na rúa: perruquería a ritmo de música con "Sienta la cabeza"

admin — Thu, 02 Jul 2009 11:00:14 +0000

Unha das montaxes máis innovadoras da actualidade: uns atrevidos perruqueiros converten ao público en protagonista convidándoo a participar e cambiar a súa imaxe… até puntos insospeitados. Peiteados e maquillaxes coloristas, música en directo, looks arriscados e sorprendentes mediante o uso de elementos cotiás que fan as delicias de pequenos, maiores e adultos nun espectáculo de 3 horas sen precedentes. Esta formación de rúa, con actuacións en medio mundo, realiza unha transgresión da orde das cosas: o espectador convértese en actor e pasa a ser o total protagonista do espectáculo.

SIENTA LA CABEZA: xoves 2 de xullo ás 18:00 na Rúa Real con Rúa Agar.

Caixanova na rúa: o sorprendente show do alemán Dado

admin — Thu, 02 Jul 2009 09:00:58 +0000

Este artista alemán ofrece un sorprendente número de variedades. A representación deste incrible e grotesco bufón (Mon Oncle) e o seu novo espectáculo The Hunch Back Ballet inclúe danza, canto e música. O show desenvólvese con varias estrañas e marabillosas axudas, ademais de con instrumentos musicais que fan do seu espectáculo un tremendo éxito. Que máis se pode pedir?

DADO: xoves 2 de xullo ás 12:30 no Paseo Marítimo e ás 18:30 na Praza de Vigo

Caixanova rúa: música en movemento con Macadam Piano

admin — Wed, 01 Jul 2009 09:00:56 +0000

Un pianista a motor realizando unha alegoría musical, visual e poética en pleno movemento. Macadam Piano realiza unha fusión entre o real e o fantástico, unindo protagonistas culturais coma o pregoeiro de Londres, o bufón de París ou o vendedor ambulante de Viena. Deambulación musical, visual e poética na rúa.

MACADAM PIANO: Mércores 1 de xullo, ás 12:30 no Obelisco; ás 18:00 na Rúa Real; ás 19:30 na Praza de Vigo.

Caixanova na rúa: gran espectáculo de malabares do alemán Djuggledy

admin — Wed, 01 Jul 2009 08:00:26 +0000

O alemán Djuggledy é un artista malabar e showman, cunha ampla experiencia actuando en rúas e festivais de toda Europa. Co seu show El Diábolo participou en festivais coma o Berlin Lacht! (Alemaña), TheaterfestivalBoulevard (Holanda), La Mercé (Barcelona) ou Menen Zomer (Bélxica). Este “tolo guiri alemán” presenta neste espectáculo 1-2-3 diábolos dun modo fabuloso, provocando risas e enerxía positiva ao público. A música marca o ritmo quente dos xogos malabares cos que ambienta o seu espectáculo. Trucos orixinais, boas ideas e un número excepcional cun inquedo e atrevido diábolo que non para en ningún momento, facendo participar a todos os espectadores.

DJUGGLEDY: Mércores 1 de xullo ás 12:30 na Praza de Lugo e ás 18:30 na Praza de Vigo.

Caixanova na rúa: Obradoiro "Ciencia Máxica"

admin — Tue, 30 Jun 2009 13:30:52 +0000

Ovos que se friten sen aceite, auga que se converte en vino, cristais que desaparecen…..todos estes incribles desafíos, máis propios dun número de maxia que da realidade, terán a súa explicación racional e científica neste obradoiro lúdico de características principalmente formativas.

Cal é a fronteira entre ciencia e maxia? Nunha cúpula inchable e ante os ollos dos visitantes levaranse a cabo un conxunto de experiencias que desafiarán a nosa lóxica e que nos levarán a pensar nun truco de maxia. Mais por sorte, a ciencia non ten trucos, e tras cada experiencia entre todos atoparemos a explicación do fenómeno observado. Así, de forma amena e divertida, este taller achegará aos sorprendidos espectadoras aos aspectos menos coñecidos deste mundo fascinante que chamamos ciencia.

CÚPULA CAIXANOVA: OBRADOIRO CIENCIA MÁXICA. No Obelisco, do mércores 1 ao domingo 5 de xullo de 11:00 a 14:00 e 17:30 a 20:30 horas.