Venres 
22
Castelo de San Antón
22:00
Entrada libre até completar capacidade.
Dentro do ciclo "Son de noite", concerto de 3 Azoteas, trío de músicos que beben do rock e o jazz progresivos, máis empeñados en contar unha historia que en limitarse a xogar cunha progresión harmónica estandarizada. O grupo está formado polo pianista Iago Mouriño, Miguel Queixas na batería e o baixista Pablo Pérez.
Venres 
15
Castelo de San Antón
22:00
Entrada libre até completar capacidade.
Dentro do ciclo "Son de noite", concerto de Duplo Son. A fusión é a súa bandeira, e a lingua galega o vehículo de expresión, sen ningún tipo de prexuizo, onde os límites só se atopan na propia imaxinación de cada composición; os sons da música latina, o jazz, o funk, a mestizaxe e mesmo a tradición galega forman parte do seu abano sonoro.
Venres 
8
Castelo de San Antón
22:00
Entrada libre até completar capacidade.
Dentro do ciclo "Son de noite", concerto de Doa, no que presenta o seu último traballo "A fronda dos cervos" e unha escolma de pezas de discos anteriores. O grupo está formado por: Susana de Lorenzo (voz e harmonium), Óscar Fernández (zanfona), Bernardo Martínez (percusión, frautas) e Xoán Piñón (guitarras).
O ciclo Son de noite chega hoxe ao seu fin cunha figura que non precisa presentación, e menos aínda na Coruña. Mercedes Peón achegouse desde moi noviña á música tradicional galega para facer unha valiosa labor de recollida desde o grupo Xacarandaina ao que pertencía. 
Ao longo da súa vida foi adquirindo unha magnífica formación teórica e depurando as súas excepcionais aptitudes coma intérprete para se converter nunha das artistas máis singulares no panorama da música con raíces, e non só noso país. Grazas á súa persoalísima voz e a súa poderosa actitude no escenario Mercedes Peón ofrece sempre uns espectáculos inesquecíbeis pola súa impresionante forza e enerxía.
Un fin de festa apoteósico para a edición 2009 de Son de noite que poderemos disfrutar coma sempre de balde no Castelo de San Antón a partir das 23 horas.
O coñecido cantautor, intérprete e showman Pablo Bicho preséntase acompañado polo seu habitual equipo humano formado por unha excelente selección de veteranos músicos que conseguen fusionar diferentes estilos de rock, rumba… Nos seus concertos fan un percorrido pola súa obra de autor, música mestiza e positiva, chea de ritmos quentes que contaxian a todos os espectadores. Será hoxe a partir das 23 horas no Castelo de San Antón dentro do ciclo Son de noite.
A música tradicional, a poesía e a vangarda dun estilo musical ligado a Galicia fusiónanse en Roi Casal dunha forma natural e harmónica, sen imposicións e sen modas. Nace así Lendas Douradas, resultado dun proceso de interpretación da cultura dun país baixo a perspectiva dun cidadán do século XXI. Un disco para unha nova xeración de galegos e galegas que ven no feito diferencial de todas as culturas do mundo o meirande tesouro que posúe a humanidade.
Lendas Douradas recolle 12 temas maioritariamente cantados e compostos por Roi Casal, que dende o ano 2000 forma parte de Milladoiro e se abre agora un nome propio cun disco que nace dun coidado estudo das composicións tradicionais e da poesía galega onde se aposta polo idioma de noso como soporte fundamental.
O concerto de Roi Casal terá lugar o venres 17 de xullo a partir das 23 horas no Castelo de San Antón. A entrada é de balde.
Esta banda nace co fin de cristalizar a música de Carmen Rey nun disco, MEU, que viu a luz en novembro de 2007; un traballo que representa as inquedanzas da compositora tanto musicalmente como na súa faceta de letrista. A súa longa traxectoria dentro do jazz e da música negra en xeral está reflectida na súa totalidade neste disco enriquecido coas influencias dos músicos cos que realizou os arranxos: Miguel Cabana na batería, Rubén Appratto no baixo, Tito Calviño na guitarra e Sergio Delgado nos teclados conseguen que a forza e a expresividade da voz de Carmen Rey resalte todavía máis usando como vehículo lingüístico principalmente o galego. Para os directos contan coa forza de dúas grandes voces, Aixa Romay e Ángeles Dorrio, que se fan cargo dos coros.
A banda de Carmen Rey tocará hoxe venres 10 de xullo no Castelo de San Antón dentro do ciclo Son de noite. Será a partir das 23 horas, con entrada de balde.
Mañá venres 10 de xullo arranca o ciclo Son de Noite coa actuación do grupo de Carmen Rey no Castelo de San Antón ás 23.00 horas. Este ciclo de concertos realizarase en dous espazos singulares como son o Castelo de San Antón e a escalinata da Domus e acolle a artistas como Pablo Bicho, Roi Casal ou Mercedes Peón. O calendario previsto será o seguinte:
Castelo de San Antón - Venres ás 23.00 horas
10 xullo - Camen Rey
17 xullo - Roi Casal
24 xullo - Pablo Bicho
31 xullo - Mercedes Peón
Domus - Sábados ás 22.00 horas
Día 11- 3 Azoteas
Día 18- Balakandra
Día 25- Miñor Swing
A entrada a todos os concertos será libre ata completar aforo no caso do Castelo de San Antón.
Todos os sábados do ano a entrada ao Museo Arqueolóxico e Histórico da Coruña ubicado no Castelo de San Antón é de balde. O resto da semana o prezo da entrada é de 2 € (1 € con tarifa reducida). O horario de funcionamento do Museo é de martes a sábados de 10:00 a 19:30 e os domingos e festivos de 10:00 a 14:30. Poden concertarse visitas por parte de centros escolares e grupos en xeral á exposición no enderezo electrónico museo at sananton.org ou ben chamando ao teléfono 981189850.
Alén dos seus excepcionais contidos permanentes, o Castelo de San Antón acolle actualmente a exposición "Onde as rúas non teñen nome: unha ollada etnoarqueolóxica ao pobo Gumuz”, que poderá visitarse até o mes de marzo.
O pasado venres 2 de xaneiro presentamos nun Castelo de San Antón ateigado de público a Guía do Ceo 2009, unha publicación preparada pola editorial Le Pourquoi Pas que se distribuirá gratuitamente en diversos puntos da Coruña ao longo dos próximos meses. Esta é a primeira das iniciativas coas cales a Concellaría de Cultura vai sumarse á celebración do Ano Internacional da Astronomía, unha das dúas grandes efemérides científicas do ano (a outra é o bicentenario de Charles Darwin), que recibirán, por suposto, unha atención especial nos Museos Científicos Coruñeses. As fotos que aparecen nesta anotación pertencen a esta colección en Flickr do blogueiro galego ghanito.
A Concellaría de Cultura do Concello da Coruña e o Museo Arqueolóxico e Histórico convidan a todos os coruñeses e coruñesas a unha sesión de astronomía urbana nun espazo privilexiado, o Castelo de San Antón, para celebrar a chegada de 2009, designado Ano Internacional da Astronomía pola Organización das Nacións Unidas. A cita é o vindeiro venres 2 de xaneiro a partir das 21 horas: unha noite para gozar do ceo a simple vista coa axuda dos membros da Agrupación Astronómica Io e recoñecer as constelacións e os planetas que protagonizan as primeiras horas da noite, e mirar algúns obxectos singulares a través do telescopio. Todos os asistentes recibirán ademais como agasallo un exemplar da “Guía do ceo 2009” editada pola Concellaría de Cultura e os Museos Científicos Coruñeses. Durante a observación o Museo Arqueolóxico permanecerá aberto para que o público que o desexe poida visitar as súas dependencias
O tempo na Coruña
