A Coruña Cultura » Ceida

“Encontro Internacional: Conservando a Riqueza da Vida na Terra” no Aquarium

admin — Tue, 12 Apr 2011 09:50:10 +0000

O mércores 13 de abril comeza o “Encontro Internacional: Conservando a Riqueza da Vida na Terra“, organizado polo Ceida e os Museos Científicos Coruñeses, que se celebrará do 13 ao 15 de abril no Castelo de Santa Cruz (Oleiros) e no Aquarium Finisterrae (A Coruña). A sesión inaugural terá lugar no Castelo de Santa Cruz ás 9:45 horas, coa intervención de José Jiménez García-Herrera, director xeral de Medio Natural e Política Forestal do Ministerio de Medio Ambiente e Medio Rural e Marino, que falará sobre “O desafío de conservar a riqueza da vida na Terra”. Neste Encontro participarán expertos internacionais e representantes de relevantes institucións relacionadas coa conservación e xestión dos recursos naturais. O obxectivo é dar a coñecer os desafíos aos que se enfronta a conservación da riqueza da vida na Terra, tanto desde unha perspectiva global como facendo referencia a diferentes lugares emblemáticos do planeta. Así mesmo, preténdese divulgar actuacións e traballos de investigación que se están a desenvolver desde distintas institucións a prol da biodiversidade, así como amosar distintas ferramentas e instrumentos que nos capacitan para a conservación dos valores naturais e das áreas protexidas. O Encontro está dirixido a xestores de espazos naturais, estudantes universitarios, educadores ambientais, guías de espazos naturais protexidos, grupos ecoloxistas, técnicos medioambientais, axentes de desenvolvemento local, público en xeral. Coa colaboración da Universidade da Coruña, Universidade de Vigo, Universidade de Santiago de Compostela, e o patrocinio de Nova Caixa Galicia e o Programa “Bo para o mar, bo para ti”.

II Seminario “A conservación en acción. Desafíos da conservación”

admin — Thu, 09 Dec 2010 09:39:42 +0000

Venres 10 de decembro – Castelo de Santa Cruz, sede do CEIDA.
Sábado 11 de decembro de 2010 – Domus
Domingo 12 de decembro de 2010 – Aquarium Finisterrae
Xoves 16 e Venres 17 de decembro de 2010 – Obradoiro on line

Dentro das actividades promovidas polo CEIDA, polos Museos Científicos Coruñeses e a Concellaría de Cultura en relación coa conmemoración no 2010 do Ano Internacional da Diversidade Biolóxica, organízase este Seminario no que se mostran experiencias de planificación, xestión, divulgación, participación e investigación, útiles para a conservación da biodiversidade. As experiencias e propostas seleccionadas permiten coñecer contidos, reflexións e exemplos de boas prácticas aplicables tanto no ámbito local como no rexional e o internacional. A matrícula é de 20 euros, e a inscrición pódese facer chamando ao teléfono 981-630618, enviando un correo electrónico ao enderezo formacion at ceida.org, ou neste enlace. Neste arquivo pódese descargar toda a información: Seminario Desafios Decembro 2010.

Maratón fotográfico dentro do II Congreso Internacional Natureza e Imaxe

admin — Fri, 09 Jul 2010 07:44:51 +0000

Sábado 10
De 11 a 14 h. e de 16 a 20 h.
Xardíns de Méndez Núñez.
Acceso libre. De 10 a 12 h. inscrición e entrega do percorrido do maratón fotográfico.

Máis información sobre o maratón fotográfico no CEIDA (Centro de Extensión Universitaria e Divulgación Ambiental de Galicia, o seu teléfono é o 981 630 618) ou aquí.
Ás 13 e ás 18 h. poderanse ver exhibicións de voo coas aves rapaces. Aquí se pode descargar o cartaz das xornadas.

A conservación dos océanos a debate en decembro na Domus

admin — Tue, 17 Nov 2009 13:00:31 +0000

Os días 10 e 11 de decembro terá lugar na Coruña e en Santa Cruz o seminario A conservación en acción. O desafío de conservar os océanos, organizado polo CEIDA e os Museos Científicos Coruñeses. Podedes descargar o programa completo e a ficha de inscrición premendo nesta ligazón.

Programa do Congreso Natureza e Imaxe

admin — Sat, 30 May 2009 08:00:25 +0000

Pica na imaxe para ampliala

I Congreso Internacional Natureza e Imaxe

admin — Tue, 19 May 2009 15:00:06 +0000

Do 27 ao 31 de maio vaise desenvolver o I Congreso Internacional Natureza e Imaxe, organizado polo CEIDA, a International Wildlife Photography Society, a Concellaría de Cultura do Concello da Coruña e mais os Museos Científicos Coruñeses.

Podedes descargar o programa de actividades e proxeccións picando aquí.

Conferencia de Jane Goodall hoxe no Palacio da Ópera

admin — Tue, 12 May 2009 09:00:20 +0000

Lembrámosvos que hoxe a naturalista e primatóloga Jane Goodall dará unha conferencia co título O que aprendín dos chimpancés. A conservación das especies ameazadas no Palacio da Ópera da nosa cidade. O acto comeza ás oito da tarde e está organizado polos Museos Científicos Coruñeses e o CEIDA.

Para saber máis: mira e escoita unha conferencia de Jane Goodall en 2002: What separates us from the apes (en inglés).

Jane Goodall dará unha conferencia na Coruña o próximo martes

admin — Fri, 08 May 2009 11:30:06 +0000

A naturalista e primatóloga Jane Goodall dará unha conferencia na Coruña o próximo 12 de maio convidada polos Museos Científicos Coruñeses e o Ceida. A recoñecida cientifica inglesa falará sobre O que aprendín dos chimpancés. A conservación das especies ameazadas, na Sala de Cámara do Palacio da Ópera ás 8 da tarde.

Despois de cinco décadas dedicada á investigación, a educación e a conservación, a doutora Jane Goodall cóntanos o camiño percorrido dende que arribase á selva Gombe en 1960 para estudar os chimpancés salvaxes, ata a tarefa de sensibilización ambiental que a leva a viaxar polo mundo 300 días ao ano.

Co obxectivo de promover a protección de especies e ecosistemas, o seu Instituto traballa no desenvolvemento sostible e a educación das comunidades locais, principais axentes no proceso de conservación. Así mesmo, recollerá as súas experiencias sobre o que se está a desenvolver e o que podemos facer para protexer as numerosas especies en perigo de extinción, co fin de que este planeta sexa un lugar mellor para todos.