O Teatro Rosalía de Castro acolle hoxe o último concerto do Festival Iberojazz coa actuación de Baldo Martínez Grand Ensemble, que presentará o seu Projecto Minho. A formación está composta por Baldo Martínez (contrabaixo, composición e dirección), Maite Dono (voz), Germán Díaz (zanfona), Chiaki Mawatari (tuba), David Herrington (trompeta e fiscorno), Antonio Bravo (guitarra eléctrica), Alejandro Pérez (saxos tenor e soprano, clarinete), Pedro López (batería e percusión electrónica) e Lucía Martínez (vibráfono e percusión). A función comezará ás 21.00 horas e as entradas van desde os 6 aos 13 euros (carné xove, maiores de 65 anos ou desempregados/as, desconto dun 20% ).

Despois, e para pechar o festival Iberojazz, o dúo de baixistas ourensáns Loren Tabarés e David Cid ofrecerán un concerto no pub Garufa que baixo o nome Beatles Jazz Bass recreará a música dos Beatles.

Descargar dossier "Proxecto Miño": PDF, 115 KB

Roberto Somoza, un dos mellores saxofonistas e frautistas de jazz de Galicia, presenta o seu novo disco The Vangard coa súa gran formación Roberto Somoza Jazz Orquestra no auditorio do Forum Metropolitano no marco do Festival Iberojazz mañá xoves 28 de xaneiro ás 21 h. O auditorio do Forum convertiuse ao longo do ciclo nun auténtico clube de jazz onde poder escoitar o mellor jazz ibérico nun ambiente distendido e co servicio da cafetería ao dispor do público.

Roberto Somoza é hoxe por hoxe un dos grandes músicos de jazz do noso país. Con esta nova formación non só rinde homenaxe aos grandes formatos senón que ademáis experimenta coas súas propias composicións, fermosas melodías inspiradas nos grandes da historia do jazz mais tamén nas orixes desta música.

ROBERTO SOMOZA Jazz Orquestra:

ROBERTO SOMOZA, saxofonista, compositor e arranxador, é
profesor de Saxofón (especialidade de Jazz) no Conservatorio de Música
da Coruña, líder de varias formacións (coas que editou catro discos) e
saxofonista dos grupos Clunia e Atlantic Bridge.

The Vanguard (Xingra / Jazz) é un tributo ao saxofón alto, cheo de composicións e arranxos contemporáneos que explotan ao máximo o formato da orquestra moderna de Jazz. O disco que se presenta foi gravado nos estudos Bruar para a discográfica Xingra e está composto, arranxado e dirixido por Roberto Somoza. Unha sección de cinco ventos e trío de ritmo danlle forma a este disco, que conta tamén coa colaboración do gran pianista e compositor Nani García e coa produción de Javier Ferreiro.

MÚSICOS: Roberto Somoza (saxofón alto), Hansel Luís Díez (trompeta e fliscorno), Ricardo Costa (trompeta e fliscorno), Edward Machado (trombón), Nandor Kasza (trombón), Jacobo de Miguel Bueres (piano), Kin García (contrabaixo), Fernando Llorca (batería).

Máis información: web oficial / MySpace

Dentro da programación do festival Iberojazz esta fin de semana poderemos disfrutar do espectáculo Só de Carlos Blanco no Fórum Metropolitano de A Coruña. As dúas funcións programadas son o sábado 23 de xaneiro, ás 20:30, e o domingo 24 de xaneiro, ás 19:00. O prezo das entradas é de 7 euros (5 euros as entradas de prezo reducido).

Hoxe venres 22, ás 21.00 h, na Terraza Jazz do Fórum Metropolitano, o baterista coruñés Carlos López en formación de quinteto.

Carlos López dirixe un elenco de novos talentos do jazz español e portugués. Cunha actual posta en escena, presentará o seu novo The last minute experience, un traballo musical baseado en ritmos hip hop, funky, e clásicos de Pink Floyd, acompañados por un Videojockey.

Hoxe xoves 21 ás 21:00 no Teatro Rosalía presentarase por primeira vez no Iberojazz a Big Band do Conservatorio Superior de Música da Coruña dirixida polo seu titular, Pepe Evangelista e actuarán como director invitado o guitarrista Steve Brown, e como artista invitado o trompetista Walter. Este espectáculo está avalado polo proxecto educativo que vén desenvolvendo o Departamento de Jazz do dito conservatorio superior. Interpretaranse composicións do repertorio orixinal da orquestra, de Steve Brown e do propio Walter White.

Un ano máis o Festival Iberojazz presenta as novas perspectivas que afloran no jazz ao longo da Península coa mirada posta en novos talentos e novos proxectos. Este ano, a organización fixo fincapé nas creacións e adaptacións dos grandes formatos, desde a clásica Big Band até os proxectos máis vangardistas e actuais na creación orquestral. Para conseguir un amplo abano nesta disciplina, ampliouse a colaboración co Conservatorio Superior de Música da Coruña, que este ano presenta a súa orquestra en formato Big Band con dúas colaboracións artísticas de excepción no ámbito internacional.

O martes 19 de xaneiro, abrirá o festival o concerto que ofrecerá o trompetista Walter White (Detroit) no club Filloa ás 23.00 h, sen dúbida un dos máis importantes tiplistas do mundo. Gravou dúos históricos con Maynard Ferguson no Ronnie Scott, rexistrados no CD Live from London, e destacou tamén como intérprete de jazz e clásica nas súas colaboracións coa Lincoln Center con Wynton Marsalis, a Woody Herman, a Jaco Pastorius e a Mingus Big Bands, e como solista da Sinfónica de Detroit, á parte de colaboracións con Bob James, Dave Holland ou Kenny Wheleer. Neste concerto, formará cuarteto co trío galego-asturiano-arxentino composto por Miguel Queixas (batería), Jacobo de Miguel (piano) e Gustavo Hernán (contrabaixo), e interpretará composicións do propio Walter e do pianista Jacobo de Miguel.

O ano comeza con jazz na cidade da Coruña. O pasado venres foi presentada a quinta edición de Iberojazz, que ofrecerá sete concertos e dúas master class en diferentes espazos da cidade: o Teatro Rosalía, o Fórum Metropolitano e os clubs Filloa e Garufa, que se verán incrementados co Auditorio Andrés Gaos do Conservatorio Superior de Música da Coruña e coa Terminal, club de recente creación situado na Termaria Casa da Auga.

O martes 19 de xaneiro abrirá o festival o concerto que ofrecerá o trompetista Walter White (Detroit) no club Filloa ás 23.00 h, sen dúbida un dos máis importantes tiplistas do mundo. Gravou dúos históricos con Maynard Ferguson no Ronnie Scott, rexistrados no CD Live from London, e destacou tamén como intérprete de jazz e clásica nas súas colaboracións coa Lincoln Center con Wynton Marsalis, a Woody Herman, a Jaco Pastorius e a Mingus Big Band, e como solista da Sinfónica de Detroit, á parte de colaboracións con Bob James, Dave Holland ou Kenny Wheleer. Neste concerto, formará cuarteto co trío galego-asturiano-arxentino composto por Miguel Queixas (batería), Jacobo de Miguel (piano) e Gustavo Hernán (contrabaixo), e interpretará composicións do propio Walter e do pianista Jacobo de Miguel.

O mércores 20, entre as 10.00 e as 14.00 h, o guitarrista Steve Brown (Nova Iorque), director dos estudos de jazz de Ithaca College, membro do Chuck Israels-Nacional Jazz Ensemble of New York, que colaborou e tocou con músicos como Ray Charles, Chuck Mangione, Phill Woods ou Jimmy Smith. Impartirá unha master class no Auditorio Andrés Gaos do Conservatorio Superior de Música da Coruña, centrada principalmente na improvisación e na historia do jazz. Paralelamente, o trompetista Walter White ofrecerá outra master class na Terraza do Fórum Metropolitano, entre as 10.00 e as 14.00 h da mesma data.

O xoves 21, ás 21.00 h, no Teatro Rosalía, presentarase por primeira vez no Iberojazz a Big Band do CSM da Coruña dirixida polo seu titular, Pepe Evangelista e actuarán como director invitado o guitarrista Steve Brown, e como artista invitado o trompetista Walter. Este espectáculo está avalado polo proxecto educativo que vén desenvolvendo o Departamento de Jazz do dito conservatorio superior. Interpretaranse composicións do repertorio orixinal da orquestra, de Steve Brown e do propio Walter White.

O venres 22, ás 21.00 h, na Terraza Jazz do Fórum Metropolitano, o baterista coruñés Carlos López en formación de quinteto, dirinxindo un elenco de novos talentos do jazz español e portugués e cunha actual posta en escena, presentará o seu novo The last minute experience, un traballo musical baseado en ritmos hip hop, funky, e clásicos de Pink Floyd, acompañados por Videojockey.

O sábado 23, ás 23.30 h, no club A Terminal, presentará o seu primeiro proxecto artístico en solitario o trompetista cubano afincado na Coruña, Hansel Luis, que actuará en formación de cuarteto cun proxecto baseado na fusión da tradición cubana co jazz de vangarda europeo. Estará acompañado por recoñecidos músicos da escena coruñesa, como o pianista Sergio Delgado, o baterista Miguel Cabana e o baixista Octavio Vargas.

Na seguinte semana, o xoves 28, ás 21.00 h, na Terraza Jazz do Fórum, o saxofonista Roberto Somoza presentará o seu novo CD The vanguard, disco gravado para unha formación de octeto e dedicado ao saxo alto, cunha sección rítmica de luxo formada polo baixista Kin García e polo baterista Fernando Llorca, onde o metal adquire un gran protagonismo e onde o saxofonista galego amosa a súa versatilidade musical a través deste instrumento.

O venres 29, ás 21.00 h, e coincidindo co peche do festival, o contrabaixista ferrolán afincado en Madrid, Baldo Martínez, presentará no Teatro Rosalía o seu último traballo discográfico Projecto Minho, en formación de Grande Ensamble, que vén de estar nominado aos Premios da Música pola SGAE e considerado mellor disco de jazz do ano 2008 pola revista Cuadernos de Jazz, conta cun elenco de intérpretes e solistas de alta calidade, como a vocalista Maite Dono, o saxofonista Alejandro Pérez, o trompetista David Herrigton, o zanfoñista Germán Díaz, o guitarrista Antonio Bravo, e a percusionista Lucía Martínez, o baterista Pedro López e o tubista Chiaki Mawatari.

Para o peche, o mesmo venres 29, no club Garufa, o dúo de baixistas ourensáns Loren Tabarés e David Cid, nun novo proxecto co pseudónimo Beatles Jazz Bass, recreará a música dos Beatles adaptada a ese instrumento como solista e en formación de cuarteto.

Remata hoxe venres 30 o ciclo Iberojazz co concerto que ofrecerán no Fórum Metropolitano a vocalista Terela Grandín e o pianista Manolo Gutiérrez, que presentarán o seu novo traballo Pascala, un disco que afonda no pop de Radiohead e nas creacións propias desde a estética do Jazz. A banda estará formada por Terela Grandín, Manuel Gutiérrez (piano), Thomas Warbultan (baixo), Marcelino Galán (guitarra), Dani Domínguez (batería). A función comeza ás 21 horas e o prezo das entradas é de 7 € (carné xove, maiores de 65 anos e desempregados, 5 €).

A serie paralela de concertos nos clubes tamén conclúe hoxe coa actuación a partir das 23 horas no Jazz Filloa do trío Citric, que presentará o seu primeiro traballo discográfico. Citric é un trío que vén de participar no circuíto de jazz do Injuve 2008 e está composto polo saxofonista Luis Verde, o contrabaixista Ander García e o baterista Hilario Rodeiro. A entrada é de balde.

Lembramos que o concerto de Clunia inicialmente previsto para mañá sábado 31 foi suspendido hai unhas semanas por causas alleas á vontade da organización e da banda.

En colaboración coa Dirección Xeral de Formación Profesional e Ensinanzas Especiais da Consellaría de Educación e Ordenación Universitaria da Xunta de Galicia, Iberojazz 2009 ofrece un novo intercambio entre músicos de diferentes escolas superiores da Península e un grupo da nosa comunidade. Nesta edición compartirán escenario un combo da Esmae (Escola Superior de Música e Artes do Espectáculo de Porto) con outro de diferentes características do Conservatorio Superior de Música da Coruña. A función será hoxe xoves a partir das 21 horas no auditorio do Fórum Metropolitano. A entrada é libre até completar o aforo.

O ciclo Iberojazz 09 chega mañá venres 23 ao Teatro Rosalía de Castro, que se encherá de sons flamencos e de jazz coa presentación do disco Desvaríos de Jorge Pardo e Antonio Carbonell “El Bola”, editado polo selo RTVE-Música dentro da colección Jazz en España. A banda que se subirá ao escenario do Rosalía está formada por Jorge Pardo (saxo e frauta), Agustín Carbonell “El Bola” (guitarra), Ariadna Rivas (piano), José Miguel Guzmán (contrabajo), Sergio Martínez (percusión), Antonio Amador “El Ciervo” (cantaor) e Raúl Márquez (violín). A función comeza ás 21:00 e o prezo das entradas é de 6, 7, 9 e 13 € (os usuarios de carné xove, maiores de 65 anos e desempregados teñen un desconto dun 20%).

O ciclo Iberojazz continúa mañá mércores 21 no Fórum Metropolitano co concerto da Brigada Bravo & Díaz “Músicas populares da Guerra Civil”. Un espectáculo multimedia que une música e cinema en clave de jazz da man do zanfonista Germán Díaz e o guitarrista Antonio Bravo, que percorrerán o cancioneiro popular da Guerra Civil Española baseado nun material recollido no libro de Luis Díaz Viana. A función comeza ás 21:00 e o prezo das entradas é de 7 € (usuarios de carné xove, maiores de 65 anos e desempregados, 5 €).

Por razóns inescusábeis alleas á vontade tanto da organización coma da propia banda, o concerto de Clunia previsto para o sábado 31 de xaneiro no Teatro Rosalía de Castro dentro do ciclo Iberojazz debe ser suspendido.

O ciclo Iberojazz chega á súa segunda etapa o venres 16 de xaneiro ás 21 horas no Fórum Metropolitano co concerto de Zé Eduardo Unit, que servirá para presentar o proxecto A jazzar é que a gente se entende. O prezo das entradas é de 9 € (7 € para usuarios de carné xove, maiores de 65 anos e desempregados).

Zé Eduardo é un dos nomes máis difíciles de abranguer do jazz portugués e europeo, tanto pola súa obra como compositor e intérprete, como polo papel que tivo, e continúa a ter, na divulgación e promoción deste xénero músical a través da creación e dirección de diversas escolas e orquestras. Nacido en 1952 en Lisboa, comezou aprendendo a tocar o piano mais acabou por apaixonarse polo baixo na adolescencia, cando, a falla doutros interesados, comezou a tocar este instrumento en bandas de garaxe que facían versións de temas en voga na época. É nesa altura cando descobre o jazz a través dun álbum da serie “Play Bach”, do pianista Jacques Loussier, de discos do Modern Jazz Quartet e doutras gravacións que o pai traía dos Estados Unidos. A chamada da música levouno a facer o curso do Conservatório Nacional na variante instrumental contrabaixo e deixando sen rematar a carreira de Arquitectura para converterse, no 1975, en músico de estudio, o que lle proporcionou a oportunidade de tocar e gravar con algún dos máis importantes músicos portugueses como José Afonso, Sérgio Godinho, Fausto, Júlio Pereira, Adriano Correia de Oliveira, Pedro Barroso, Paulo Carvalho, Fernando Tordo, Carlos Mendes, Carlos do Carmo e Luís Cília. Paralelamente, mantivo a conexión co jazz como membro do grupo Araripa e mentor da Orquestra Girassol. Do seu currículo consta aínda a participación no primeiro disco de jazz editado en Portugal Malpertuis de Rão Kyao (1976). No final da década de setenta fundou e dirixiu a Escola de Jazz do Hot Clube de Portugal e a Orquestra de Jazz do Hot Clube, antes de se mudar a Barcelona no 1982. .Ao longo de trece anos Zé Eduardo desenvolveu unha intensa actividade como director do Taller de Músics de Barcelona, alén de ter acompañado grandes nomes da escena internacional, como Art Farmer, Harold Land, Tete Montoliu, Steve Lacy e Kenny Wheeler. É deste período a creación do Zé Eduardo Unit no 1986, que gravou dous discos en España, no 1989 e 1990, e tocou en numerosos festivais por toda Europa. No ano 1994, por convite do Lisboa-Capital Europea da Cultura, escribiu e dirixiu unha obra para doce músicos estreada en novembro dese ano no Teatro Municipal de São Luiz. Retorna a Portugal no 1995 e instálase no Algarve, onde se dedicou sobre todo ao ensino, que conxugaba coas facetas de intérprete músical e orquestrador. Son desta época as súas creacións Improvisando nos Verdes Anos, unha homenaxe a Carlos Paredes composta para a Orquestra Metropolitana de Lisboa, e Divertimento para contrabaixo e Orquestra, en que é solista. Co Zé Eduardo Unit é convidado a abrir o Ciclo de Concertos de Jazz Portugués da Expo 98’, actuando nos tres primeiros días do certame. No Algarve creou a big band Jazz na Filarmónica, que dirixiu até o 2000, e asumiu a dirección artística dos festivais internacionais de jazz de Faro e de Loulé. Nesa mesma época desempeñou as funcións de director do Departamento de Jazz da Escola Profissional de Música de Almada e fundou a Escola de Jazz do Barreiro, alén de ensinar en innumerábeis obradoiros e noutras actividades formativas. No 2001, participou na banda sonora do filme de Fernando Trueba El embrujo de Shangai gravada en vivo en Madrid, onde dirixiu un grupo de músicos chineses. Ese ano no ámbito do Porto-Capital Europea da Cultura dirixiu a orquestra que interpretou en estrea dez obras encargadas a outros tantos compositores nacionais. Á vez que diversos actos de formación en España, e despois da gravación e edición de A Jazzar no Cinema Portugués (2002), participou co Zé Eduardo Unit, no 2003, no Festival de Jazz de Macau, que é convidado a dirixir, e no festival Atlantic Waves, en Londres. Aínda é do 2003 o seu videoclip Os Índios da Meia Praia, o primeiro jazz portugués, coa realización de Pedro Sena Nunes, que foi estreado en outubro na Cinemateca Nacional. Como resultado da prioridade que deu nos anos máis recentes á súa faceta de compositor e intérprete, editou no 2004 co Zé Eduardo Unit A Jazzar no Zeca, e no 2005, xunto Jack Walrath, Marc Miralta e Jesús Santandreuy, o álbum Bad Guys. Outro proxecto en que participa, e co que ten actuado en varios puntos do país, é Contra3aixos, que reúne tres contrabaixistas nacionais do máis alto nivel: o propio Zé Eduardo, Carlos Barretto e Carlos Bica.

O concerto de hoxe no Fórum Metropolitano será a presentación de “DÚO”, o primeiro disco do proxecto formado por Jacobo de Miguel (piano) e Ton Risco (vibráfono) que amosa unha perspectiva camerística da música de jazz. É a culminación de anos de traballo musical e a mestura de dúas persoalidades de experiencias diferentes mais con puntos converxentes en aspectos cruciais: o entendemento musical, o gusto pola delicadeza e o compromiso coa música improvisada. Neste sentido, a concepción das súas composicións participa destes feitos tanto no labor compositivo coma nas secións improvisatorias. En “Dúo” converxen diferentes tradicións musicais: a clásica, a americana e a europea. Non é casualidade daquela que ambos os dous teñan formación clásica e participen non só da tradición jazzística americana senón tamén do gusto pola chamada “música seria”. Coma músicos do noroeste da península participan dunha corrente de interpretación europea crucial no desenvolvemento do jazz ao longo do século XX. Máis alá destas consideracións, “Dúo” é, sobre todo, a suma de dúas individualidades musicais que están a atopar un espazo común no que construír a súa obra.

Jacobo de Miguel é un pianista ovetense de formación clásica que ben axiña centrou o seu interese na música improvisada e o jazz. Foi profesor nos talleres de músicos de Oviedo e Gijón e actualmente é profesor na Fundación de Música Moderna de Avilés onde dirixe o Departamento de Improvisación e Jazz. Completa o seu labor pedagóxico impartindo cursos e seminarios desa especialidade. Toca con diferentes formacións en festivais de jazz por toda a xeografía nacional así coma en diferentes salas e clubes do país.

O ourensán Ton Risco comezou os seus estudios de batería e percusión con Fernando Martínez-Risco. En 1998 recibiu clases en Madrid do batería de jazz Pedro López. En 1999 é aceptado na Escola de Altos Estudios Musicais de Galicia, e no Real Conservatorio da Haia (Holanda) cos profesores Wim Vos e Aly N'Diaye Rose; e con Erik Ineke e Frits Landesbergen (batería e vibráfono) no departamento de jazz. Licénciase en 2004 e 2006 en Percusión Clásica e Vibráfono de Jazz, respectivamente. Na actualidade é profesor de percusión do Conservatorio Profesional de Música de Santiago de Compostela á vez que desenvolve a súa carreira concertística como membro de “Odaiko Percussion Group” e traballando no proxecto “Dúo” co pianista asturiano Jacobo de Miguel.

Coa actuación de Jacobo de Miguel e Ton Risco, dúo de vibráfono e piano que presenta o seu primeiro disco, dá comezo hoxe unha nova edición de Iberojazz. O concerto terá lugar ás 21 horas no auditorio do Fórum Metropolitano. Unha hora antes e no mesmo recinto haberá unha mesa redonda coordinada por Juan Torreiro co título "O jazz nos tempos de crise". O prezo das entradas é de 7 € (5 € para maiores de 65 anos, desempregados e posuídores do carné xove)