O ciclo Iberojazz continúa mañá mércores 21 no Fórum Metropolitano co concerto da Brigada Bravo & Díaz “Músicas populares da Guerra Civil”. Un espectáculo multimedia que une música e cinema en clave de jazz da man do zanfonista Germán Díaz e o guitarrista Antonio Bravo, que percorrerán o cancioneiro popular da Guerra Civil Española baseado nun material recollido no libro de Luis Díaz Viana. A función comeza ás 21:00 e o prezo das entradas é de 7 € (usuarios de carné xove, maiores de 65 anos e desempregados, 5 €).

Por razóns inescusábeis alleas á vontade tanto da organización coma da propia banda, o concerto de Clunia previsto para o sábado 31 de xaneiro no Teatro Rosalía de Castro dentro do ciclo Iberojazz debe ser suspendido.

O ciclo Iberojazz chega á súa segunda etapa o venres 16 de xaneiro ás 21 horas no Fórum Metropolitano co concerto de Zé Eduardo Unit, que servirá para presentar o proxecto A jazzar é que a gente se entende. O prezo das entradas é de 9 € (7 € para usuarios de carné xove, maiores de 65 anos e desempregados).

Zé Eduardo é un dos nomes máis difíciles de abranguer do jazz portugués e europeo, tanto pola súa obra como compositor e intérprete, como polo papel que tivo, e continúa a ter, na divulgación e promoción deste xénero músical a través da creación e dirección de diversas escolas e orquestras. Nacido en 1952 en Lisboa, comezou aprendendo a tocar o piano mais acabou por apaixonarse polo baixo na adolescencia, cando, a falla doutros interesados, comezou a tocar este instrumento en bandas de garaxe que facían versións de temas en voga na época. É nesa altura cando descobre o jazz a través dun álbum da serie “Play Bach”, do pianista Jacques Loussier, de discos do Modern Jazz Quartet e doutras gravacións que o pai traía dos Estados Unidos. A chamada da música levouno a facer o curso do Conservatório Nacional na variante instrumental contrabaixo e deixando sen rematar a carreira de Arquitectura para converterse, no 1975, en músico de estudio, o que lle proporcionou a oportunidade de tocar e gravar con algún dos máis importantes músicos portugueses como José Afonso, Sérgio Godinho, Fausto, Júlio Pereira, Adriano Correia de Oliveira, Pedro Barroso, Paulo Carvalho, Fernando Tordo, Carlos Mendes, Carlos do Carmo e Luís Cília. Paralelamente, mantivo a conexión co jazz como membro do grupo Araripa e mentor da Orquestra Girassol. Do seu currículo consta aínda a participación no primeiro disco de jazz editado en Portugal Malpertuis de Rão Kyao (1976). No final da década de setenta fundou e dirixiu a Escola de Jazz do Hot Clube de Portugal e a Orquestra de Jazz do Hot Clube, antes de se mudar a Barcelona no 1982. .Ao longo de trece anos Zé Eduardo desenvolveu unha intensa actividade como director do Taller de Músics de Barcelona, alén de ter acompañado grandes nomes da escena internacional, como Art Farmer, Harold Land, Tete Montoliu, Steve Lacy e Kenny Wheeler. É deste período a creación do Zé Eduardo Unit no 1986, que gravou dous discos en España, no 1989 e 1990, e tocou en numerosos festivais por toda Europa. No ano 1994, por convite do Lisboa-Capital Europea da Cultura, escribiu e dirixiu unha obra para doce músicos estreada en novembro dese ano no Teatro Municipal de São Luiz. Retorna a Portugal no 1995 e instálase no Algarve, onde se dedicou sobre todo ao ensino, que conxugaba coas facetas de intérprete músical e orquestrador. Son desta época as súas creacións Improvisando nos Verdes Anos, unha homenaxe a Carlos Paredes composta para a Orquestra Metropolitana de Lisboa, e Divertimento para contrabaixo e Orquestra, en que é solista. Co Zé Eduardo Unit é convidado a abrir o Ciclo de Concertos de Jazz Portugués da Expo 98’, actuando nos tres primeiros días do certame. No Algarve creou a big band Jazz na Filarmónica, que dirixiu até o 2000, e asumiu a dirección artística dos festivais internacionais de jazz de Faro e de Loulé. Nesa mesma época desempeñou as funcións de director do Departamento de Jazz da Escola Profissional de Música de Almada e fundou a Escola de Jazz do Barreiro, alén de ensinar en innumerábeis obradoiros e noutras actividades formativas. No 2001, participou na banda sonora do filme de Fernando Trueba El embrujo de Shangai gravada en vivo en Madrid, onde dirixiu un grupo de músicos chineses. Ese ano no ámbito do Porto-Capital Europea da Cultura dirixiu a orquestra que interpretou en estrea dez obras encargadas a outros tantos compositores nacionais. Á vez que diversos actos de formación en España, e despois da gravación e edición de A Jazzar no Cinema Portugués (2002), participou co Zé Eduardo Unit, no 2003, no Festival de Jazz de Macau, que é convidado a dirixir, e no festival Atlantic Waves, en Londres. Aínda é do 2003 o seu videoclip Os Índios da Meia Praia, o primeiro jazz portugués, coa realización de Pedro Sena Nunes, que foi estreado en outubro na Cinemateca Nacional. Como resultado da prioridade que deu nos anos máis recentes á súa faceta de compositor e intérprete, editou no 2004 co Zé Eduardo Unit A Jazzar no Zeca, e no 2005, xunto Jack Walrath, Marc Miralta e Jesús Santandreuy, o álbum Bad Guys. Outro proxecto en que participa, e co que ten actuado en varios puntos do país, é Contra3aixos, que reúne tres contrabaixistas nacionais do máis alto nivel: o propio Zé Eduardo, Carlos Barretto e Carlos Bica.

O concerto de hoxe no Fórum Metropolitano será a presentación de “DÚO”, o primeiro disco do proxecto formado por Jacobo de Miguel (piano) e Ton Risco (vibráfono) que amosa unha perspectiva camerística da música de jazz. É a culminación de anos de traballo musical e a mestura de dúas persoalidades de experiencias diferentes mais con puntos converxentes en aspectos cruciais: o entendemento musical, o gusto pola delicadeza e o compromiso coa música improvisada. Neste sentido, a concepción das súas composicións participa destes feitos tanto no labor compositivo coma nas secións improvisatorias. En “Dúo” converxen diferentes tradicións musicais: a clásica, a americana e a europea. Non é casualidade daquela que ambos os dous teñan formación clásica e participen non só da tradición jazzística americana senón tamén do gusto pola chamada “música seria”. Coma músicos do noroeste da península participan dunha corrente de interpretación europea crucial no desenvolvemento do jazz ao longo do século XX. Máis alá destas consideracións, “Dúo” é, sobre todo, a suma de dúas individualidades musicais que están a atopar un espazo común no que construír a súa obra.

Jacobo de Miguel é un pianista ovetense de formación clásica que ben axiña centrou o seu interese na música improvisada e o jazz. Foi profesor nos talleres de músicos de Oviedo e Gijón e actualmente é profesor na Fundación de Música Moderna de Avilés onde dirixe o Departamento de Improvisación e Jazz. Completa o seu labor pedagóxico impartindo cursos e seminarios desa especialidade. Toca con diferentes formacións en festivais de jazz por toda a xeografía nacional así coma en diferentes salas e clubes do país.

O ourensán Ton Risco comezou os seus estudios de batería e percusión con Fernando Martínez-Risco. En 1998 recibiu clases en Madrid do batería de jazz Pedro López. En 1999 é aceptado na Escola de Altos Estudios Musicais de Galicia, e no Real Conservatorio da Haia (Holanda) cos profesores Wim Vos e Aly N'Diaye Rose; e con Erik Ineke e Frits Landesbergen (batería e vibráfono) no departamento de jazz. Licénciase en 2004 e 2006 en Percusión Clásica e Vibráfono de Jazz, respectivamente. Na actualidade é profesor de percusión do Conservatorio Profesional de Música de Santiago de Compostela á vez que desenvolve a súa carreira concertística como membro de “Odaiko Percussion Group” e traballando no proxecto “Dúo” co pianista asturiano Jacobo de Miguel.

Coa actuación de Jacobo de Miguel e Ton Risco, dúo de vibráfono e piano que presenta o seu primeiro disco, dá comezo hoxe unha nova edición de Iberojazz. O concerto terá lugar ás 21 horas no auditorio do Fórum Metropolitano. Unha hora antes e no mesmo recinto haberá unha mesa redonda coordinada por Juan Torreiro co título "O jazz nos tempos de crise". O prezo das entradas é de 7 € (5 € para maiores de 65 anos, desempregados e posuídores do carné xove)

Cartaz (1260 x 1800, 2,2 MB): [descargar]
Programación en PDF: [descargar]

Coincidindo co inicio do ano, a Concellaría de Cultura do Excmo. Concello da Coruña abre as súas portas á cuarta edición do Iberojazz, festival que se está a converter nunha cita ineludible do mes de xaneiro nesta cidade para afeccionados e músicos. Como vén sendo habitual cada ano, a organización esfórzase en amosar as novidades musicais coa máxima calidade neste xénero que se están a facer na Península Ibérica, facendo fincapé no jazz de Galiza.

A pasada edición estivo dedicada a reflectir os sesenta anos de historia do jazz en España homenaxeando as figuras de Tete Monteliú da man do seu contrabaixista Horacio Fumero e a Pedro Iturralde, que participou como cabeza visible do Iberojazz 2008. Nesta nova edición marcada pola continuidade histórica, é de rigor a presenza de dous músicos que diferenciados artisticamente polo seu estilo, pertencen ao que poderiamos denominar como segunda xeración de músicos de jazz da Península. Estamos a falar por unha banda do contrabaixista lisboeta Zé Eduardo que dirixira nos anos oitenta a Big-band do Taller de Músicas de Barcelona acompañando ao propio Tete Monteliú. Zé Eduardo ofreceranos no Fórum Metropolitano a súa visión contemporánea do jazz co seu grupo Zé Eduardo Unit co que leva varios discos editados, entre eles un dedicado á música de José Afonso co título A Jazzar no Zeca. Por outra banda, o saxofonista-flautista madrileño Jorge Pardo xunto ao guitarrista Antonio Carbonell "El Bola", impregnarán de sons flamenco-jazz o Teatro Rosalía de Castro coa presentación do seu álbum Desvarios editado polo selo RTVE Música, dentro da colección Jazz en España.

Dentro do ámbito autonómico crimos necesario que un grupo con personalidade propia que gravou, entre outros, un disco nos anos oitenta co propio Jorge Pardo, clausurase este Iberojazz 2009 no mesmo Teatro Rosalía. Clunia, que xa ten representado ao jazz galego en múltiples certames e festivais nacionais e internacionais ao longo da súa traxectoria, está a celebrar o seu vintecinco aniversario como formación e fará coincidir a súa presenza no Iberojazz coa gravación do seu próximo traballo discográfico.

Sen esquecer a filosofía que lle deu vida a este festival e en colaboración coa Dirección Xeral de Formación Profesional e Ensinanzas Especiais da Consellaría de Educación e Ordenación Universitaria da Xunta de Galicia, esta nova edición do Iberojazz contará cun novo intercambio entre músicos de diferentes escolas superiores da Península, coa permanente presenza dun grupo da nosa comunidade. Se o ano pasado lle tocaba compartir o escenario do Fórum Metropolitano a un combo de Musikene (Euskadi) cun combo do Departamento de Jazz do Cosmac (Conservatorio Superior de Música da Coruña), nesta nova edición compartirao un combo da Esmae (Escola Superior de Música e Artes do Espectáculo de Oporto) con outro de diferentes características do devandito Conservatorio Superior de Música da Coruña.

O Jazz Galego seguirá a ter gran presenza no Fórum Metropolitano coa presentación dun novo traballo discográfico da vocalista Terela Gradín e o pianista Manolo Gutiérrez co título de Pascala, un traballo que afonda no pop de Radiohead e nas creacións propias desde a estética do Jazz.

As novidades neste certame 2009 veranse reflectidas en dúas vertentes. A primeira, arredor dunha mesa redonda co título "O Jazz en tempos de crise" que abrirá o Festival no Fórum e será conducida e coordinada por Juan Torreiro (xornalista de La Voz de Galicia) xunto a músicos, críticos e programadores da comunidade. Despois, darase paso a un concerto no mesmo Fórum do dúo Ton Risco e Jacobo de Miguel, dúo de vibráfono e piano que presentarán oficialmente en Galiza o seu primeiro traballo discográfico Duo. A segunda novidade terá como orixinalidade a unión da música ao cinema nun espectáculo multimedia en clave de jazz a cargo do zanfonista Germán Díaz e o guitarrista Antonio Bravo, tratándose dun novidoso espectáculo que percorrerá o Cancioneiro popular da Guerra Civil Española baseado nun material recollido no libro de Luis Díaz Viana.

Os clásicos clubs da cidade onde o jazz soa cada noite, non pasarán desapercibidos ofrecendo tres concertos, un en cada club, de tres grupos noveis que ofrecerán a súa visión do jazz actual. No Jazz Vides, o trío 3 Azoteas, presentará un repertorio de composicións propias da man do pianista Iago Mouriño, o contrabaixista Pablo Pérez e o batería Miguel Queixas, que se verá reflectido no que será o seu primeiro traballo discográfico. O pub Garufa acollerá a presentación, por primeira vez na súa cidade, da cantante coruñesa Ángeles Dorrio que acompañada polo pianista-teclista Sergio Delgado, o baixista Octavio Vargas e o batería Miguel Cabana amosarán un repertorio orixinal e de versións propias sobre diferentes cantantes do soul-jazz, en arranxos do propio Sergio Delgado. Xa para rematar, o Filloa será o club onde o trío Citric presente o seu primeiro traballo discográfico. Citric é un trío que vén de participar no circuíto de jazz do Injuve 2008 e está composto polo saxofonista Luis Verde, o contrabaixista Ander García e o baterista Hilario Rodeiro.

Desde a concellaría, a xerencia e a dirección deste festival desexamos que esta nova edición cumpra coas esixencias dun público cada día máis crítico e apaixonado por esta música.Que o gocedes!

Alberto Conde
Director artístico