O Ciclo Poetas Di(n)versos, baixo a dirección de Yolanda Castaño, organizado pola Concellaría de Cultura do Concello da Coruña interrompe a súa actividade durante os meses estivais celebrando este luns 23 de maio o último dos seus recitais poéticos, dirixido a todos aqueles que queiran achegarse a escoitar poesía galega e non galega de balde. O broche de ouro desta programación poética mensual estable poñerano dous poetas nacidos nos primeiros anos 60:

- Ana Romaní naceu en Noia en 1962. Escritora e xornalista, dende 1990 dirixe o programa “Diario Cultural” da Radio Galega, unha completa e puntual axenda cultural diaria con máis de 20 anos de traxectoria, recoñecido xa con diversos galardóns. É autora dos poemarios “Palabra de Mar” (1987), “Das últimas mareas” (1994), “Arden” (1998), “Love me tender. 24 Pezas mínimas para unha caixa de música” (2005) e o aínda recente “Estremas” (2010), co que conseguiu o Premio AELG 2011 de poesía. A súa obra está ademais recollida en diversos libros colectivos e antoloxías. Creou e participou en distintos proxectos artísticos interdisciplinares, entre eles “Son Delas” coordinado por Uxía Senlle, “O outro extremo do paraíso” e “Lob*s” (1998) con Antón Lopo, “Estalactitas” (2002) con Anxos Romeo e Lupe Gómez, “Catro poetas suicidas. Intervención poética contra a levidade” (2002) en solitario, e “A voz e o poema. Os periplos de Avilés de Taramancos” (2003) con Anxo Quintela. Todos eles supoñían novas maneiras de achegar a palabra ao público a través da música ou da escena. Realizou a “Antoloxía de Antón Avilés de Taramancos” (2003). Ademais, cooordina e promove o volume de relatos “Narradio. 56 historias no ar” (2003) do “Diario Cultural” da Radio Galega e o “Premio Diario Cultural de Teatro Radiofónico” organizado pola Radio Galega e o Centro Dramático Galego dende o ano 2006.

- Carlos Marzal naceu en 1961 en Valencia e licenciouse en Filoloxía Hispánica –sección de Literatura- pola universidade da mesma cidade. Ademais de poeta é narrador, ensaísta e tradutor. O seu primeiro libro de poemas foi “El último de la fiesta” (1987), logo virían “La vida de frontera” (1991) e “Los países nocturnos” (1996). A consagración chegaría da man de “Metales pesados” (2001) –Premio da Crítica Española e Premio Nacional de Poesía- seguidos máis tarde por “Fuera de mí” (2004) –galardoado co Premio Loewe de Poesía- e “Ánima mía” (2009). “El corazón perplejo” reunira a súa poesía en 2005. Do mesmo xeito, en 2002 e 2003 editáronse dúas antoloxías da súa obra poética: “Poesía a contratiempo (Poéticas y prosas)” e “Sin porqué ni a dónde”. Coa súa primeira novela, “Los reinos de la casualidad” (2005) obtivo o Premio da Crítica Valenciana, o pasado ano publicou tamén un libro de relatos: “Los pobres desgraciados hijos de perra”, e proximamente verá a luz un volume de aforismos, “La arquitectura del aire”. Ademais, é autor de dous libros de ensaio, “El cuaderno del polizón (Apuntes sobre arte)” (2007) e “Los otros de uno mismo” (2009). Conta tamén cunha traxectoria como tradutor de autores de lingua catalá, tales como Enric Sòria, Pere Rovira, Miquel de Palol, Joan Vinyoli ou Màrius Torres, para varias editoriais de prestixio. Foi co-director da revista de literatura e touros “Quites” durante a súa primeira década de existencia, e hoxe é colaborador habitual de revistas literarias tanto como columnista ou crítico literario en diarios como ABC, Levante ou El Mundo.

Dende que botara a andar en outono de 2009, este ciclo achegou ao público coruñés e galego un total de 26 dos máis salientables poetas nas 5 literaturas da Península: castelán, catalán, éuscaro, galego e portugués. Os actos, que sempre superaron o centenar de asistentes, significaron un xeito directo de achegar a escrita contemporánea máis diversa e de calidade a un constatable público interesado na poesía. Neste arquivo en .pdf pódese descargar máis información: Programa Poetas Di(n)versos maio 2011.

Prosegue o Ciclo de Poetas Di(n)versos, iniciado en novembro de 2009 baixo a dirección de Yolanda Castaño, no que ten lugar un recital poético dobre entre unha voz en galego e outra en calquera das outras catro linguas da Península. Este 11 de abril teremos dous representantes da poesía máis experimental que se produce hoxe en día nos extremos do norte peninsular:

- Eduard Escoffet, nado en 1979 en Barcelona, é poeta e axitador cultural. Practicou diversas vertentes da poesía (visual, escrita, oral, instalación, performance), sempre cun espírito experimental e de investigación. As súas influencias van dende a poesía sonora dos anos cincuenta á poesía catalá medieval, pasando polo text/sound sueco, a poesía concreta e a experimentación do barroco español. Nos últimos anos tense centrado no traballo oral e sonoro. Á parte dun intenso movemento dentro da escena contracultural de Barcelona, ten presentado o seu traballo en festivais e programacións doutras cidades de España e sobre todo no estranxeiro: Italia, Francia, Bélxica, Alemaña, Portugal, Arxentina, Estados Unidos, China, Chile, República Checa, Nicaragua e República Dominicana. Por otra banda, dirixiu o festival internacional de polipoesía PROPOSTA (Centro de Cultura Contemporánea de Barcelona, 2000-2004) e comisariou, xunta a Eugeni Bonet, un ciclo de cine letrista para o MACBA (Museo de Arte Contemporánea de Barcelona). Actualmente colabora, entre outros, co festival Yuxtaposiciones (Casa Encendida, Madrid) e codirixe o Festival Internacional de Poesía de Barcelona. Tamén exerceu como asesor de política cultural. Ademais, traballa na súa tese doutoral sobre literatura barroca en Barcelona. Non fai libros.

- Estevo Creus naceu en Cee en 1971, deuse a coñecer como poeta nos anos 90 no seo do “Batallón Literario da Costa da Morte” e foi membro fundador da editorial de poesía Letras de Cal e mais do grupo de teatro Talía. Como poeta debutou con “Poemas da Cidade Oculta” (1996), ao que seguiu “Areados” (1996), gañador do Premio Miguel González Garcés da Deputación da Coruña. Tres anos máis tarde sae do prelo “Teoría do Lugar”, grazas ao Premio Eusebio Lorenzo Baleirón, e en 2003 un novo libro, “Decrúa“, faise co Fiz Vergara Vilariño. En 2007 concibe e publica xunto a David Creus “Facer merzbau“, un proxecto que acolle textos, videocreación e performance, e, máis tarde, ve a luz “Máquina ou Móbil” (2009). Por último, “O libro dos cans”, que se publicara orixinalmente no ano 2000, reedítase en 2010. Tamén ten publicados os relatos “E a catro patas quilómetros”, recollido na publicación dos Premios Pedrón de Ouro (1994) e “Alguén matou a Bambi”, compilado en “Historia da Pusilaminidade e catro contos máis” (1996). Ademais, colaborou como músico en espectáculos de danza como: “Cos pés na terra” -do grupo de teatro D2- e diferentes propostas escénicas da compañía de danza contemporánea Traspediante.

Será unha nova oportunidade libre e gratuíta de coñecer de primeira man algúns dos mellores autores/as das literaturas peninsulares, comprobando a proximidade, a conexión e a calidade da boa poesía contemporánea. Ao termo do acto, presentado pola directora do ciclo e poeta Yolanda Castaño, Escoffet e Creus poderán asinar exemplares da súa obra. Esta iniciativa de periodicidade mensual e impulsada pola Concellaría de Cultura do Concello da Coruña, continuará de xeito estable ata ao mes de maio. Neste arquivo en .pdf pódese descargar máis información: Programa DinVersos Abril 2011.

Prosegue o Ciclo de Poetas Di(n)versos, iniciado en novembro de 2009 baixo a dirección de Yolanda Castaño, no que ten lugar un recital poético dobre entre unha voz en galego e outra en calquera das outras catro linguas da Península. A cita deste luns 21 de marzo coincidirá precisamente co Día Internacional da Poesía, celebrando así de pleno a confirmación de que existe na Coruña e en Galicia un verdadeiro público para a poesía. Os participantes desta nova edición serán:
- Luis Muñoz naceu en Granada en 1966, en cuxa universidade completou as licenciaturas en Filoloxía Española e en Filoloxía Románica. Publicou os libros de poemas “Septiembre” (1991), “Manzanas amarillas” (1995), “El apetito” (1998), “Correspondencias” (2001) -polo que obtivo os premios “Generación del 27″ e “Ojo Crítico”- e “Querido silencio” (2006). A súa obra poética ata 2005 está recollida no volume “Limpiar pescado. Poesía reunida 1991-2005″ (2005). Ademais, en 1994 preparou o libro colectivo “El lugar de la poesía”, e ten traducido, entre outros autores, a Giuseppe Ungaretti e a Eugenio Montale. Dende 1992 ata a súa desaparición en 2002 foi o director da revista de poesía “Hélice”. Dirixiu tamén os cursos de verán “Neruda personal” (2004) na Universidade Complutense de Madrid en El Escorial e “Poesía española reciente” (2005) na Universidade Menéndez Pelayo en Santander. En 2008 comisariou a exposición “Gallo. Interior de una revista”, sobre a publicación dirixida en 1928 por Federico García Lorca.
- Emma Couceiro naceu en Cospeito (Lugo) en 1977. En 1996 deuse a coñecer como poeta ao gañar o V Premio Espiral Maior co seu primeiro libro, “Humidosas” (1997), ao que seguirían “As entrañas horas” (1998, X Premio Eusebio Lorenzo Baleirón) e, xa no 2003, “(Cito)“. A súa obra está recollida en antoloxías publicadas en Galicia como “Río de Son e vento” (1999), “dEfecto 2000″ (1999), “A tribo das baleas” (2001), “25 Anos de poesía galega 1975-2000 III” (2002), e fóra de Galicia como “Mulher a fazer vento” (1998), “Mujeres de carne y verso” (2002), “Galeusca. Antoloxía poética (1990-2003)” (2004) ou “Das Sonorosas Cordas (15 poetas desde Galicia)” (2005), así como nos libros colectivos “Novas voces da poesía galega. Recital” (2000), “O trazo aberto. Poesías e debuxos” (2002), “O libro dos abanos” (2002), “Palabra de autor, Palabra de autora” (2005), “Os gozos e as Sombras” (2005) ou “Poética da Casa” (2006), entre outros. Paralelamente, ten colaborado en publicacións como Dorna, Xistral, Festa da Palabra Silenciada, A Xanela, Entellunu, Akadeemia, Zurgai, Piedra del Molino ou La Bella Varsovia.

Será unha nova oportunidade libre e gratuíta de coñecer de primeira man algúns dos mellores autores/as das literaturas peninsulares, comprobando a proximidade, a conexión e a calidade da boa poesía contemporánea. Ao termo do acto, presentado pola directora do ciclo e poeta Yolanda Castaño, Couceiro e Muñoz poderán asinar exemplares dos seus libros, postos á venta nesta ocasión pola libraría Nova Colón. Esta iniciativa de periodicidade mensual e impulsada pola Concellaría de Cultura do Concello da Coruña, continuará de xeito estable ata ao mes de maio. Neste arquivo en .pdf pódese descargar máis información: Programa DinVersos Marzo 2011.

O novo encontro de Poetas Di(n)versos, dirixido por Yolanda Castaño, reunirá aos amantes da poesía e mesmo a aqueles/as menos versados/as, que atoparán unha boa oportunidade para familiarizarse con este xénero considerado minoritario pero que está a conformar un nutrido público en Galicia. Os participantes desta edición son:
- Miren Agur Meabe. Nada en Lekeitio (Biscaia) en 1962, mestra e filóloga vasca, traballou no ensino e na elaboración de libros escolares en éuscaro. O seu primeiro libro editouse en 1986 e reunía contos baixo o título “Uneka… gaba” (”Por momentos… a noite”). Ata o pasado ano habería que agardar por unha nova entrega narrativa: “Zazpi orduak”. Meabe é, ademais, autora dunha extensa e premiada obra de literatura infantil e xuvenil pola que é moi coñecida en Euskadi, e que adoita acadar tamén edicións en castelán e outras linguas do Estado ["Bisita" (2001), "Itsaslabarreko etxea (A casa do cantil)" (2001) e "Urtebete tsasargian (Un ano no faro)" (2007)]. Como poeta debutou en 1999 con “Oi, hondarrezko emakaitz”, ao que seguiu, no 2000, o exitoso “Azalaren kodea (O código da pel)”, Premio da Crítica Española 2001. O seu novo e esperado poemario saiu hai poucos meses, en 2010, co título “Bitsa eskuetan (Escuma nas mans)”. Galardoada en 2007 co Premio Lauaxeta pola súa traxectoria literaria e profesional, ten participado en múltiples Encontros Literarios Internacionais, e textos seus teñen visto a luz en múltiples antoloxías e libros colectivos, ou foron traducidos a varias linguas europeas.
- Claudio Rodríguez Fer (Lugo, 1956), é, ademais de poeta, ensaísta, narrador, autor de teatro e de poesía visual. Foi catedrático de Literatura en Galicia, así como profesor en universidades de Nova York, Bretaña e Santiago de Compostela, onde actualmente dirixe a revista literaria Moenia e a Cátedra Valente de Poesía e Estética. Coordina a revista Unión Libre. Cadernos de vida e culturas. Publicou, disertou e recitou en numerosos lugares de Europa, América e África. Dirixiu diversos congresos e encontros e participou en decenas de actas, enciclopedias e revistas europeas e americanas. Como estudoso é autor de obras críticas, ensaios e edicións realizadas en torno a autores galegos e universais. Como poeta, traducido a unha decena de idiomas, publicou os poemarios eróticos “Poemas de amor sen morte” (1979), “Tigres de ternura” (1981), “Historia da lúa” (1984), “A boca violeta” (1987) e “Cebra” (1988), libros reunidos en “Vulva” (1990) e antologados en “A muller núa” (1992); así como “Cinepoemas” (1983), “Extrema Europa” (1996), “A unha muller descoñecida” (1997), “Moito máis que mil anos” (2000), “Viaxes a ti” (2006) e “Unha tempada no paraíso” (2010). “Lugo blues” (1987), “A loita continúa” (2004) e “Ámote vermella” (2009) compoñen a súa triloxía poética da memoria histórica.
Neste arquivo en .pdf pódese descargar máis información: Programa DinVersos Febreiro 2011.

O ciclo Poetas Di(n)versos, dirixido por Yolanda Castaño e organizado pola Concellaría de Cultura, retoma as súas actividades, co obxectivo de centrarse en achegar a poesía ao público en xeral amosando outra forma de disfrutar a poesía dun xeito case escénico, constituindo o único ciclo estable de lecturas poéticas públicas contando con autores/as de dentro e fóra de Galicia, unha oportunidade única de degustar a poesía producida hoxe en castelán, catalán, éuscaro ou portugués na voz dos propios creadores/as. Os protagonistas do recital deste día son:
- Xavier Seoane (A Coruña, 1954). Dende 1975 ven desenvolvendo a súa actividade nos terreos da creación literaria, da arte e na animación cultural. Así, organiza conferencias e debates, coordina premios ou participa en cursos literarios. Impulsor de innúmeros proxectos de dinamización cultural no noso país, ten comisariado dende exposicións ata libros colectivos, e desenvolveu tanto proxectos videográficos ou mostras de poesía visual como colaboracións escritas en multitude de publicacións periódicas, catálogos de arte, obras colectivas e antoloxías dentro e fóra de Galicia. Poeta con obra traducida a varios idiomas e tamén conferenciante, ten publicado igualmente libros de aforismos, de ensaio, compilacións de textos, novelas, estudos sobre multitude de artistas galegos, reflexións teórico-críticas sobre arte ou escrita, ou obras dirixidas a público infanto-xuvenil.
- Rosa Alice Branco (Aveiro, 1950). Doutora en Filosofía Contemporánea -nas áreas de Filosofía e Psicoloxía da Percepción- pola Universidade Nova de Lisboa. Actualmente ensina Teoría da Percepción na Escola Superior de Artes e Design do Porto (en Matosinhos), mentres dirixe a revista “logovemos” (on line) e fai parte da Unidade de investigación en Design, Media e Cultura (ID+). Ademais diso, ten xestionado publicacións, coloquios e Encontros Internacionais de Poesía. Autora tamén de libros de ensaio, artigos en revistas especializadas e textos traducidos a outras linguas, Rosa Alice Branco participou en encontros e festivais de poesía de todo o mundo e ten libros de poemas publicados no Brasil, Suíza, Luxemburgo, Canadá, Tunicia, Venezuela ou Córcega.

Pódese descargar máis información neste ficheiro en .pdf: Programa Ciclo DinVersos xaneiro 2011.

O ciclo Poetas Di(n)versos, dirixido por Yolanda Castaño, retoma as actividades coas que arrancara o ano pasado, con grande éxito de público. O obxectivo desta iniciativa céntrase en achegar a poesía ao público en xeral amosando outra forma de disfrutar a poesía dun xeito case escénico a través do que se busca animar a todo o mundo a achegarse a ela. Os protagonistas do recital deste día son:
- Andrés Neuman (Buenos Aires, 1977). O último Premio Alfaguara de Novela foi e será sempre, ademais, un lúcido poeta que se prodiga en múltiples formas dende o haiku ata o aforismo. Este arxentino-granadino, tamén autor de contos e microensaios, xa foi sinalado como un dos nomes clave da literatura do século XXI por mestres como Bolaño.
- Olga Novo (Vilarmao, Pobra do Brollón, 1975). Autora de culto das últimas xeracións galegas e unha das poéticas máis desacougantes do panorama contemporáneo, o seu traballo como profesora na Universidade da Bretaña Sur fainos escasas as ocasións de escoitar a forza vivencial e o erotismo.

Pódese descargar máis información neste ficheiro en .pdf: Programa Ciclo DinVersos Decembro 2010.

- 20 de decembro:
- Andrés Neuman. O último Premio Alfaguara de Novela foi e será sempre, ademais, un lúcido poeta que se prodiga en múltiples formas dende o haiku ata o aforismo. Este arxentino-granadino, tamén autor de contos e microensaios, xa foi sinalado como un dos nomes clave da literatura do s. XXI por mestres como Bolaño.
- Olga Novo. Autora de culto das últimas xeracións galegas e unha das poéticas máis desacougantes do panorama contemporáneo, o seu traballo como profesora na Universidade da Bretaña Sur fainos escasas as ocasións de escoitar a forza vivencial e o erotismo.

- 17 de xaneiro:
- Rosa Alice Branco. Unha das poetas portuguesas máis importantes de hoxe, a súa obra ten participado en multitude de antoloxías e festivais poéticos de todo o mundo. Profesora de Estética e Teoría da percepción, a súa radical sensibilidade ponse de manifesto nos seus 8 poemarios entre os que consta o Premio Espiral Maior do pasado ano.
- Xavier Seoane. Nado e residente na nosa cidade, o dono dunha das poéticas máis rigorosas e fondas da Xeración dos 80 é tamén un fino e sagaz crítico literario e de arte. Profesor de Lingua e Literatura, ten tamén unha traxectoria como fndamentado xestor e dinamizador cultural.

Kirmen Uribe “naceu nunha familia vencellada á pesca. Licenciouse en Filoloxía Vasca en Vitoria e cursou estudos de postgrao de Literatura Comparada en Trento (Italia). O seu primeiro premio literario importante recolleuno en 1995 cando estaba a cumprir condena por ser insumiso e negarse a ir ao servizo militar obrigatorio. O 14 de outubro de 2009 concédenlle o Premio Nacional de Narrativa 2009 pola súa obra Bilbao-New York-Bilbao.” (Wikipedia)

«A maría lado parírona alá por 1979 nun coche da velvet underground nalgún lugar da nada que une a nada do cee que figura oficialmente como lugar de nacemento e santiago de compostela, a gran nada no centro da nada.

Pero ela non podía con ese baldeiro e medrou enchéndoo de pegadas. ten publicados tres libros con textos deses que non chegan ao final da liña: a primeira visión (letras de cal, 1997), casa atlántica casa cabaret (xerais, 2002) e berlín (concello de santiago-El correo gallego-aelg, 2005). [...]» (AELG)

Os poetas Luis Alberto de Cuenca e Luisa Castro participarán hoxe martes 16 de marzo nunha nova sesión do exitoso ciclo Poetas Di(n)versos. Será na Casa da Cultura Salvador de Madariaga, a partir das 20:30 e con entrada libre.

Continúa o ciclo de recitais poéticos dirixido pola poeta Yolanda Castaño e organizado pola Concellaría de Cultura do Concello da Coruña coa participación mañá martes 23 de febreiro dos escritores José Luís Peixoto e Miguel Anxo Fernán Vello. O acto comezará ás 20:30 na Casa da Cultura Salvador de Madariaga (rúa Durán Loriga, 10).

José Luís Peixoto é unha das principais revelacións literarias da última década en Portugal, cunha proxección extraordinaria que o levou a ser traducido xa a vinte idiomas e a acadar un gran recoñecemento tanto no seu propio país coma no estranxeiro. Literariamente polifacético e ambicioso, Peixoto é todo un ídolo das letras portuguesas actuais que chegou a vender quince mil exemplares dun dos seus poemarios.

Miguel Anxo Fernán Vello non precisa presentación no noso país. Dende os oitenta até a actualidade a obra poética de quen tamén é o meirande editor de poesía en galego foise convertendo nunha das máis sólidas e prolíficas do noso panorama. Finalista do Nacional e gañador do Premio da Crítica Española en varias ocasións, Miguel Anxo é un dos autores galegos máis respectados fóra de Galicia.

Descargar dossier en PDF (311 KB)

Apúntate ao recital no evento en Facebook.

Lembrámosvos que hoxe martes 19 de xaneiro terá lugar a terceira sesión do ciclo Poetas Di(n)versos, desta volta coa participación do catalán Joan Margarit, Premio Nacional de Poesía 2008, e o galego Xosé María Álvarez Cáccamo. Será ás 20:30 na Casa de Cultura Salvador de Madariaga (Durán Loriga, 10, A Coruña), con entrada libre.

O martes 19 de xaneiro terá lugar a terceira sesión do ciclo Poetas Di(n)versos, desta volta coa participación do catalán Joan Margarit, Premio Nacional de Poesía 2008, e o galego Xosé María Álvarez Cáccamo. Será ás 20:30 na Casa de Cultura Salvador de Madariaga (Durán Loriga, 10, A Coruña), con entrada libre.

Hoxe martes 15 de decembro ás 20:30 na Casa da Cultura Salvador de Madariaga (Rúa Durán Loriga, 10), recital de Luz Pozo e Luís García Montero. Entrada libre.