Venres 30 de setembro, sábado 1 e domingo 2 de outubro
Teatro Rosalía de Castro
20:30
Entradas: 6, 7, 9 e 13 euros (carné xove, maiores de 65 anos e desempregados: desconto dun 20%).

"O florido pensil", de Andrés Sopeña Monsalve, conta substancialmente as vicisitudes dun grupo de rapaces sometidos á absurda e ilóxica brutalidade do sistema educativo que dominou a España da posguerra. Os seus protagonistas descóbrennos un fresco no que se sucederán os escenarios da acción; en primeiro lugar a escola -centro de operacións fundamental para a propaganda do ideario fascista- e, máis tarde, o resto das tribunas dende onde o réxime mandaba os seus sinais de apoio: o cine de barrio, a radio familiar, a igrexa e a prensa, representada aquí polo aparentemente inofensivo cómic. O fresco inclúe tamén unha variada e interesante fauna de personaxes nos que se mesturan heroes do cine con casposos mestres e mozos (máis ou menos espelidos) con curas de alento tronante. Ademais inclúe voces de nomes míticos cuxos rostros nos roubou a historia: Matías Prats, Pedro Pablo Ayuso, Matilde Conesa. A obra está representada por cinco actores adultos: Xosé Manuel Olveira "Pico", Antonio Durán "Morris", Federico Pérez, Josito Porto e Alfonso Agra, baixo a dirección de Fernando Bernués e Mireia Gabilondo, unha parella de directores vinculados á compañía Tanttaka T.

As actas escuras de Roberto Vidal Bolaño chega ao Teatro Rosalía de Castro da man do Centro Dramático Galego. A obra, que se presentará o venres 19 e o sábado 20 ás 20:30 horas no Teatro Rosalía, recuperouse 18 anos despois de ser escrita da man do director Xúlio Lago e dun elenco integrado por 14 recoñecidos actores e actrices

Esta primeira posta en escena do texto gañador do Premio Xacobeo de Textos Teatrais en 1992 supón todo un fito no actual panorama escénico galego, achegando finalmente aos espectadores un gran drama sobre a ocultación da verdade e o sentido da ética no que se reflicten tanto a forza simbólica como o espírito crítico característicos de Vidal Bolaño, un dos grandes nomes do teatro galego contemporáneo. Xúlio Lago asumiu a dirección escénica desta produción desde a fidelidade á obra orixinal e á visión do teatro que tiña o propio autor, falecido en 2002. O espectáculo resultante obtivo un gran éxito de público durante a súa exhibición en Santiago, e agora desenvolve unha xira que se estenderá ata primeiros de abril na que visitará un total de sete localidades galegas.

Xosé Manuel Olveira "Pico" e Ricardo de Barreiro encabezan o elenco, do que tamén forman parte César Cambeiro, Ursia Gago, Jouse García, Mónica García, Teté García, César Goldi, Xoán Carlos Mejuto, Fernando Morán, Rodrigo Roel, Pepe Soto, Agustín Vega e Marcos Viéitez. Estes 14 intérpretes, moitos dos cales tiveron a oportunidade de traballar baixo as ordes de Vidal Bolaño en diferentes espectáculos, encarnan os trinta personaxes ideados polo autor para desenvolver esta trama, centrada nunha investigación sobre o redescubrimento dos restos do Apóstolo na Compostela da segunda metade do século XIX.

Pisando ovos é unha compañía de danza contemporánea liderada pola coreógrafa Ruth Balbís que se caracteriza por centrar os seus espectáculos en elementos que definen e condicionan a vida das persoas, procurando novos e persoais rexistros que van dende os movementos máis radicais aos máis minimalistas. Chegan mañá 27 de febreiro ao Rosalía coa súa última produción, Tres, na que amosan os encontros e desencontros de tres mulleres condicionadas pola súa sexualidade. Encontros que se definen entre o individual e o común, a fantasía e as obsesións, o mimetismo dos corpos, e todo iso nun mundo novo no que se redescobren as tres nelas mesmas. Nesta montaxe estarán con Ruth Balbís as bailarinas Janet Novás e Andrea Quintana. A función comezará ás 21 horas no Rosalía. O prezo das entradas é de 9 € (carné xove, maiores de 65 anos e desempregados/as, 6 €).

Tres años despois da súa estrea, o director, equipo artístico e reparto que participou na montaxe que o Centro Dramático Galego fixo de A piragua de Cándido Pazó, volven reunirse para dar vida a esta historia que aborda o tema da violencia de xénero. A peza levou catro premios María Casares en 2007 (mellor texto orixinal, mellor actriz protagonista, mellor iluminación e mellor música orixinal), e conta coas actuacións de Xosé Manuel Olveira “Pico”, Susana Dans, Marcos Orsi, Iolanda Muíños, César Martínez “Goldi”, Ricardo de Barreiro e Mariam Bañobre. Dirixe Cándido Pazó. A función será o domingo 28 de febreiro ás 19:00. O prezo das entradas é de 9 € (usuarios de carné xove, maiores de 65 anos e desempregados/as, 6 €)